មិនត្រឹមតែជាសិស្សពូកែ ទទួលបានពានរង្វាន់ និងមេដាយពីការសិក្សា និងការប្រកួតផ្សេងៗ កូនស្រីពិធីការិនី គង់ សុជាតិ គឺកញ្ញា ម៉ៅ សាលភាពនែលលី ហៅនីម៉ូ ក៏មានសមត្ថភាពខ្ពស់ក្នុងការរចនាម៉ូដសម្លៀកបំពាក់យ៉ាងប្រណីតប្រកបដោយគំនិតច្នៃប្រឌិតដែរ។

តាមរយៈព្រឹត្តិការណ៍ Unfiltered Fashion Show របស់សាលាច្នៃម៉ូដអន្ដរជាតិ Raffles International College Phnom Penh ដែលទើបបញ្ចប់ទៅកាលពីពេលថ្មីៗនេះ ស្នាដៃរចនាម៉ូដដ៏របស់ នីម៉ូ ត្រូវបង្ហាញនៅលើឆាកដ៏អស្ចារ្យចំពោះភ្ញៀវជាតិ-អន្ដរជាតិដែលបានចូលរួមក្នុងកម្មវិធីរាប់រយនាក់។

ពិធីការិនី គង់ សុជាតិ ដែលត្រូវជាម្ដាយបង្កើតនីម៉ូ បង្ហាញការពេញចិត្ដចំពោះស្នាដៃរបស់កូនថា លទ្ធផលល្អបែបនេះ គឺកើតចេញពីគំនិតឆ្នៃប្រឌិត និងខិតខំរបស់កូនស្រី Mao SalpheapNelly និងមិត្តរួមថ្នាក់សំរាប់មុខជំនាញ Fashion Marketing & Management។

នេះមិនមែនជាលើកដំបូងដែលអ្នកម្តាយរូបនេះបង្ហាញមោទនភាពចំពោះកូនស្រីរបស់ខ្លួន ព្រោះកន្លងមក ពិធីការនីឆ្នើម គង់ សុជាតិ និងស្វាមី តែងបង្ហាះសារអបអរសាទរចំពោះភាពជោគជ័យ និងសមិទ្ធិផលស្នាដៃដែលកូនស្រីរូបនេះសម្រេចបាន មិនថាការសិក្សា និងការប្រកបកិច្ចការអ្វីនោះឡើយ ដោយសារ នីម៉ូ ជាសិស្សរៀនពូកែខ្លាំង និងតែងតែទទួលបានពានរង្វាន់ ព្រមទាំងមេដាយពីការសិក្សា និងការប្រកួតប្រជែងផ្សេងៗទាំងក្នុង និងក្រៅប្រទេស៕