ក្រោយឆ្លងកាត់ការហ្វឹកហាត់បានប៉ុន្មានសប្តាហ៍ ម្ចាស់មកុដ MUC 2024 ប្រាសាទ ដាវីន និងអ្នកគ្រប់គ្រងថ្នាក់ជាតិ​ MUC 2025 លោក ឈួង យីវឆួយ បាន​បង្ហាញ​ការ​ភ្ញាក់ផ្អើលចំពោះការវិវត្ដសមត្ថភាពយ៉ាង​ឆាប់​រហ័ស​របស់បេក្ខភាព Miss Universe Cambodia 2025​ ដែល​ត្រៀម​ចេញ​ទៅ​ប្រកួត​លើ​ឆាកអន្ដរជាតិក្នុង​រយៈ​ពេល​ដ៏ខ្លី​ខាង​មុខ។

ខណៈដែលវិញ្ញាសារលំបាកៗ​ ត្រូវបានដាក់ចេញជាបន្តបន្ទាប់ គ្រប់​បេក្ខភាព​បាន​បញ្ចេញ​សមត្ថភាព​កាន់​តែអស្ចារ្យ​មិន​នឹកស្មាន តាម​រយៈវគ្គប្រឡង​ជម្រុះ​ថ្នាក់​ជាតិ។ តួយ៉ាង ក្រោយឆ្លងកាត់ហ្វឹកហាត់ និងការរៀនសូត្រចំណេះដឹងជាច្រើនផ្នែករួចមក បេក្ខភាពម្នាក់ៗរឹតតែមានភាពជឿជាក់ខ្លាំងឡើង បើនិយាយពីការរៀបចំខ្លួនវិញនោះ គឺខ្ញង់ខ្លាំងតែម្តង រហូតសូម្បីតែ លោក ឈួង យីវឆូយ អ្នកគ្រប់គ្រងថ្នាក់ជាតិ MUC 2025 និង អ្នកនាង ប្រាសាទ ដាវីន Miss Universe Cambodia 2024 ក៏ស្រឡាំងកាំងពេលឃើញការវិវត្តន៍យ៉ាងឆាប់រហ័សរបស់បេក្ខភាពទាំងអស់។

ផ្តល់បទសម្ផាសន៍ក្នុងថ្ងៃចុះ MOU ជាមួយ Unilever Cambodia ៤ប្រភេទ កាលពីថ្ងៃទី ២០ ខែមិថុនា អ្នកគ្រប់គ្រងថ្នាក់ជាតិ MUC 2025 លោក ឈួង យីវឆូយ បានឱ្យដឹងថា ឆ្នាំនេះយើងបានសម្រិតសម្រាំងទម្រង់នៃការប្រកួតមួយចំនួន ដែលមានភាពខុសប្លែកពីឆ្នាំរាល់ដង និងមានភាពថ្មីប្លែកសម្រាប់វិស័យប្រកួតសម្រស់នៅក្នុងប្រទេសកម្ពុជាផងដែរ។

លោកបានពួតដៃគ្នាជាមួយម្ចាស់មកុដ ប្រាសាទ ដាវីន ក្នុងការដុះខាតសមត្ថភាពរបស់បេក្ខភាពឱ្យអស់ពីលទ្ធភាព ទាំងចំណេះដឹង សម្រស់ និងការប្រតិបត្តិខ្លួនផ្សេងៗ និងបានបញ្ចូលនូវវិញ្ញាសារថ្មីៗពុំធ្លាប់មានពីមុនមកទៀតផង។ ទោះជាយ៉ាងណាជាមួយនឹងឆន្ទៈ និងចក្ខុវិស័យច្បាស់លាស់ លោក ឈួង យីវឆូយ ក៏សង្ឃឹមថា កម្ពុជានឹងកាន់តែមានកេរ្តិ៍ឈ្មោះរីកសុះសាយនៅលើពិភពលោក តាមរយៈវេទិកាប្រកួតសម្រស់បវរកញ្ញាចក្កវាឡកម្ពុជានេះផងដែរ៕