ចន្លោះពីខែមករា ដល់ខែមិថុនា ឆ្នាំ២០២៥ គ្រឹះស្ថានអង្គរ បានលក់សំបុត្រចូលទស្សនារមណីដ្ឋានអង្គរ ជូនភ្ញៀវទេសចរបរទេស បានសរុបចំនួន ៥៦៧ ៦៧៣ នាក់ ដែលសរុបជាទឹកប្រាក់ប្រមាណ ២៦,៣ លានដុល្លារ មានអត្រាកើនឡើងប្រមាណ ៨% ធៀបទៅនឹងរយៈពេលដូចគ្នា កាលពីឆ្នាំ២០២៤។

របាយការណ៍ចេញផ្សាយដោយគ្រឹះស្ថានអង្គរ បានបញ្ជាក់ថា សម្រាប់ភ្ញៀវទេសចរបរទេស ត្រូវទិញប័ណ្ណចូលទស្សនារមណីដ្ឋានអង្គរ ក្នុងតម្លៃ ៣៧ ដុល្លារក្នុងម្នាក់ សម្រាប់រយៈពេល ១ ថ្ងៃ ឬ ៦២ ដុល្លារសម្រាប់រយៈពេល ៣ ថ្ងៃ និង ៧២ ដុល្លារសម្រាប់រយៈពេល ១ សប្ដាហ៍។ ដូចនេះ ចំណូលដែលទទួលបានពីការលក់ប័ណ្ណចូលទស្សនារមណីដ្ឋានអង្គរ មានចំនួន ២៦,៣ លានដុល្លារ ក្នុងរយៈពេល ៦ ខែកន្លងមក ចំណូលនេះក៏ត្រូវបរិច្ចាគចូលមូលនិធិ គន្ធបុប្ផាកម្ពុជា ប្រមាណ ១,១ លានដុល្លារ។

ដោយឡែក សម្រាប់ការលក់ប័ណ្ណទេសចរណ៍នៅតំបន់រមណីដ្ឋានផ្សេងទៀត មានដូចជា៖ • ប្រាសាទកោះកេរ ទទួលបានភ្ញៀវទេសចរ ១២ ០៧៦ នាក់ ទទួលបានចំណូល ១៨១ ១៤០ ដុល្លារ • នៅប្រាសាទបឹងមាលា ទទួលបានភ្ញៀវទេសចរ ៨ ១៩៩ នាក់ ទទួលបានចំណូល ៨១ ៩៩០ ដុល្លារ • នៅភ្នំក្បាលស្ពាន ៦៤៤ នាក់ ទទួលបានចំណូល ៣ ២២០ ដុល្លារ • និងចំណូលពីសំបុត្រទូក នៅកំពង់ផែចុងឃ្នៀស មានចំនួន ១៧ ៣៦៨ ទូក ទទួលបានចំណូល ៣៧៣ ៩៩៤ ដុល្លារផងដែរ។