នេះគឺជាជំពូកថ្មីមួយនៃមោទនភាពជាតិ ដែលកម្ពុជាបានបង្ហាញខ្លួនយ៉ាងត្រចះត្រចង់នៅលើឆាកអន្តរជាតិ មិនមែនតាមរយៈជម្លោះ ប៉ុន្តែតាមរយៈ «អំណាចនៃសន្តិភាព»។ បច្ចុប្បន្ន សៀវភៅជីវប្រវត្តិបែបយុទ្ធសាស្ត្រ "The Father Who Shielded and Never Left" កំពុងក្លាយជាប្រធានបទដ៏ក្ដៅគគុកដែលត្រូវបានបណ្ដាញសារព័ត៌មានល្បីៗនៅបរទេសសម្រុកចុះផ្សាយយ៉ាងព្រោងព្រាត ដែលនេះគឺជាសក្ខីភាពបញ្ជាក់ពីឥទ្ធិពលនៃភាពជាអ្នកដឹកនាំរបស់កម្ពុជាលើឆាកអន្តរជាតិ។

យោងតាមការចុះផ្សាយរបស់សារព័ត៌មានបរទេស អ្វីដែលធ្វើឱ្យអន្តរជាតិមានការចាប់អារម្មណ៍ខ្លាំងលើសៀវភៅដែលនិពន្ធដោយលោកស្រី Fari មួយនេះ គឺដោយសារវាបានលាតត្រដាងនូវការពិតនៃយុទ្ធសាស្ត្រ «ឈ្នះ-ឈ្នះ» ដែលបានប្រែក្លាយកម្ពុជាពីវាលពិឃាត មកជាដែនដីមានស្ថិរភាពរឹងមាំ។

ចំណុចដែលធ្វើឱ្យអ្នកអានបរទេសរំជួលចិត្តបំផុត គឺការបង្ហាញពីស្មារតីដឹកនាំបែប «ខែលការពារ» (The Shield) ដែលមេដឹកនាំម្នាក់ហ៊ានលះបង់គ្រប់យ៉ាង និងឈរយ៉ាងរឹងមាំបំផុតដើម្បីការពារប្រជាជនឱ្យរួចផុតពីមហន្តរាយសង្គ្រាម។ ស្មារតី «មិនដែលបោះបង់ចោល» (Never Left) ទោះបីក្នុងស្ថានភាពស្លាប់រស់ ឬមានសម្ពាធពីខាងក្រៅយ៉ាងណាក៏ដោយ គឺជាតម្លៃពិតនៃភាពជាអ្នកដឹកនាំដែលអន្តរជាតិកំពុងកោតសរសើរ និងផ្ដល់តម្លៃយ៉ាងខ្ពង់ខ្ពស់ដល់ថ្នាក់ដឹកនាំកម្ពុជា។

លើសពីការរំលឹកប្រវត្តិសាស្ត្រ សារព័ត៌មានអន្តរជាតិក៏បានមើលឃើញពីភាពចាស់ទុំនយោបាយរបស់កម្ពុជានាពេលបច្ចុប្បន្ន ក្រោមការដឹកនាំរបស់សម្ដេចធិបតី ហ៊ុន ម៉ាណែត ដែលបានបន្តរក្សាមរតកសន្តិភាពនេះយ៉ាងខ្ជាប់ខ្ជួន។ ជាក់ស្ដែង ភាពឆ្លាតវៃក្នុងការដោះស្រាយវិបត្តិព្រំដែនឆ្នាំ ២០២៥-២០២៦ ដោយតម្កល់ជីវិតពលរដ្ឋ និងសន្តិភាពជាធំ បានបង្ហាញពិភពលោកឱ្យកាន់តែច្បាស់ថា «សេចក្ដីស្រឡាញ់សន្តិភាព» បានក្លាយជាអត្តសញ្ញាណជាតិកម្ពុជាទៅហើយ។

សៀវភៅ "The Father Who Shielded and Never Left" មិនត្រឹមតែនាំយកប្រវត្តិសាស្ត្រពិតរបស់ខ្មែរទៅកាន់ឆាកអន្តរជាតិប៉ុណ្ណោះទេ ប៉ុន្តែវាគឺជាការលើកកម្ពស់កិត្តិយសជាតិឱ្យកាន់តែត្រចះត្រចង់ ដែលធ្វើឱ្យកូនខ្មែរគ្រប់រូបមានមោទនភាព និងកាន់តែសាមគ្គីគ្នាថែរក្សាសន្តិភាពដ៏មានតម្លៃនេះជារៀងរហូត៕