ព្រំ រដ្ឋា ប្រកាសលើកក្មួយឡើងតួឯក ក្នុងថ្ងៃខួប១៨ឆ្នាំ

2015-09-15 18:37:42
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងជាពិធីការិនី អ្នកនាង ព្រំ រដ្ឋា បានប្រកាសថា គ្រោងលើកក្មួយស្រីបង្កើតរបស់ខ្លួនឈ្មោះ សិទ្ធី នីកា ធ្វើជាតួឯក ក្នុងរឿងភាគថ្មីរបស់ខ្លួនដែលគ្រោងថតក្នុងពេលឆាប់ៗខាងមុននេះ។ ការប្រកាសនេះបានធ្វើឡើង កាលពីយប់មិញ ក្នុងពិធីខួបកំណើតគម្រប់១៨ឆ្នាំ របស់ក្មួយស្រីតែម្ដង។

រាប់ពីឆ្វេង ព្រំ រដ្ឋា ពៅ លីដា យុគ ចិន្ដា និង សិទ្ធី នីកា

រឿងដែល អ្នកនាង ព្រំ រដ្ឋា គ្រោងថតនោះ ជាប្រភេទរឿងភាគមានឈ្មោះថា "បំណុលស្នេហ៍" ដោយដំណើរនៅចុងខែ វិច្ឆិកា ខាងមុខនេះ។ ព្រំ រដ្ឋា មិនបានពន្យល់នៃសាច់រឿងទាំងមូលឡើយ ដោយនាងគ្រាន់តែបញ្ជាក់ប្រាប់ថា ក្នុងរឿងមួយនេះ ក្មួយស្រីបង្កើតរបស់នាង សិទ្ធី នីកា គឺជា តួឯក។ មូលហេតុដែលនាំឲ្យ តារាស្រីម្នាក់នេះទាញក្មួយស្រីមកដើរលើ វិថីសិល្បៈជាមួយខ្លួននេះ ក៏ព្រោះតែនាង គិតថា វិធីមួយនេះ នឹងធ្វើឲ្យក្មួយស្រីមាន អនាគតដូចខ្លួន។ "ខ្ញុំមានថ្ងៃនេះក៏ព្រោះសិល្បៈ ក្មួយខ្ញុំវាចង់ខាងនឹងដែរ ចឹងខ្ញុំបំពេញបំណងគាត់ទៅ" ព្រំ រដ្ឋា ថ្លែងបញ្ជាក់។

តាមការរៀបរាប់ពីម្ដាយមីង កញ្ញា សិទ្ធី នីកា ធ្លាប់បានថតរឿង ៣ទៅ៤ រឿងមកហើយ ក្នុងនោះ មានដូចជា រឿងអប់រំខ្លីៗរបស់មណ្ឌលព័ត៌មានស្ត្រីកម្ពុជា រឿង "វិថីនារី" និងរឿង "វេរាស្នេហ៍ឆ្លងភព" ជាដើម។ ជាមួយគ្នានោះ នីកា ក៏ធ្លាប់ថត MV និង ស្ប៉តពាណិជ្ជកម្ម ជាច្រើនផងដែរ។

បច្ចុប្បន្ន ក្មួយស្រីម្នាក់នេះ គឺជា ពិធីការិនី ក្នុងកម្មវីធីបង្ហាញម៉ូដមួយរបស់ស្ថានីយទូរទស្សន៍ប៉ុស្តិ៍លេខ៣។ ព្រំ រដ្ឋា រំពឹងថា ក្រោមការជួយជ្រោមជ្រែងយ៉ាងយកចិត្តទុកដាក់របស់ខ្លួន ទៅថ្ងៃអនាគត កញ្ញា សិទ្ធី នីកា ច្បាស់ជាមានប្រជាប្រិយភាពខ្ពស់៕

ទស្សនាទិដ្ឋភាពតារាៗចូលរួមខួបកំណើត សិទ្ធី នីកា យប់មិញ!