អតីតអ្នកប្រដាល់ ឡោ សំណាង ក្លាយជាឈ្មួញកណ្ដាលរកស៊ីនៅខេត្តកំពង់ចាម
- 2015-09-28 21:49:19
- ចំនួនមតិ 0 | ចំនួនចែករំលែក 0
អតីតអ្នកប្រដាល់ ឡោ សំណាង ក្លាយជាឈ្មួញកណ្ដាលរកស៊ីនៅខេត្តកំពង់ចាម
ចន្លោះមិនឃើញ
អតីតអ្នកប្រដាល់មានស្នៀតប្រយុទ្ធល្អមួយកំផ្លេ ឡោ សំណាង បានបាត់មុខពីអ្នកគាំទ្រអស់ជាច្រើនឆ្នាំមកហើយ ដោយបច្ចុប្បន្ននេះបានក្លាយខ្លួនជាឈ្មួញកណ្ដាលរកស៊ីទិញស្រូវអង្គរ ពោត សណ្ដែក និងរបស់ផ្សេងៗទៀតនៅខេត្តកំពង់ចាម បន្ទាប់ពីបាត់បង់ការងារជាអ្នករកស៊ីកិបសំបុត្រម៉ូតូ-កងនៅវិទ្យាល័យព្រះស៊ីសុវត្ថិ ក្នុងរាជធានីភ្នំពេញ។
បន្ទាប់ពីបញ្ចប់អាជីពជាអ្នកប្រដាល់ទាំងវ័យក្មេង ឡោ សំណាង បានចាប់អាជីពជាអ្នករកស៊ីវិញម្ដង ដោយកាលពីមុនធ្វើជាអ្នកកិបសំបុត្រកង់-ម៉ូតូនៅវិទ្យាល័យស៊ីសុវត្ថិ។ បានប៉ុន្មានឆ្នាំ មុខរបរនេះមិនសូវជាកាក់កបដោយសារតែមានគេដេញថ្លៃខ្ពស់ពេក រូបលោកក៏បានទៅរកស៊ីជាឈ្មួញកណ្ដាលទិញភោគផលរបស់ប្រជាពលរដ្ឋនៅខេត្តកំពង់ចាមវិញម្ដង។
ចំពោះមុខរបរថ្មីនេះដែរ អតីតអ្នកប្រដាល់ដែលពូកែទាំងកណ្ដាប់ដៃ ទាត់ ធាក់និងកែងខាងលើបាននិយាយប្រាប់ Sabay ថា ៖ “វាមិនចំណេញច្រើនទេប្អូន តែអាចជួយគ្រួសារបងបាន។ ហើយមុខរបរនេះដែរ ភាគច្រើនរកបាននៅខែប្រាំង ហើយខែវស្សាវិញដូចជាមិនសូវជាកាក់កបទេ ព្រោះមានភ្លៀងច្រើន”។ ទន្ទឹមនឹងមុខរបរនេះដែរ ឡោ សំណាង បាននិយាយទៀតថា លោកគ្មានគោលបំណងងាកទៅរកវិស័យកីឡាប្រដាល់វិញនោះទេ បើទោះបីជាមានកត្តាអ្វីជំរុញក៏ដោយ។
ត្រលប់ទៅកាលពីជាង៥ឆ្នាំមុន ឡោ សំណាង ជាអ្នកប្រដាល់ដែលមានកេរ្តិ៍ឈ្មោះម្នាក់ ដោយអាចបំបាក់កីឡាករខ្លាំងៗជាច្រើនដូចជា ឡុង វណ្ណថន និង នួន ភិរម្យ ជាដើម។ លើសពីនេះទៅទៀត មួយកែងដែលរូបលោកបានធ្វើឱ្យជើងខ្លាំងអ៊ីតាលី Itdzik Levy ដេកសន្លប់នោះគឺនៅតែដិតជាប់ក្នុងបេះដូងអ្នកស្រលាញ់កីឡាប្រដាល់ខ្មែររហូត៕
ចុចអាន៖អតីតអ្នកប្រដាល់កម្ពុជា១០រូបស្ថិតក្នុងចិត្តអ្នកគាំទ្រដល់សព្វថ្ងៃ
អត្ថបទ៖ មុន្នី រម្យ