ចូលឆ្នាំថ្មីភ្លាម ធ្លាយដំណឹង Junsu ក្រុម JYJ និង Hani ក្រុម EXID ក្លាយជាគូស្នេហ៍

2016-01-01 19:20:19
ចំនួនមតិ 0 | ចំនួនចែករំលែក 0

ចន្លោះមិនឃើញ

គូស្នេហ៍តារាកូរ៉េថ្មីដែលនឹងត្រូវបើកទំព័រឆ្នាំ២០១៦នេះ ត្រូវបានរកឃើញហើយ។ តារាចម្រៀង Junsu សមាជិកក្រុម JYJ និង Hani សមាជិកក្រុមចម្រៀងនារី EXID ទើបតែត្រូវបានគេដឹងថាបានក្លាយជាគូស្នេហ៍នឹងគ្នា ដែលព័ត៌មាននេះបានធ្វើឲ្យរំជើបរំជួលខ្លាំងលើបណ្ដាញសារព័ត៌មាននានានៅកូរ៉េកាលពីព្រឹកមិញ។

សារព័ត៌មាន Dispatch បានបង្ហាញរូបថត នៅពេលតារាទាំងពីរដួងបានណាត់ជួបគ្នា ក្នុងរយៈពេល ៦ខែកន្លងមក។ ប្រភពព័ត៌មានបានឲ្យដឹងថា ពួកគេទាំងពីរតែងណាត់ជួបគ្នាជាញឹកញាប់នៅ Apartment របស់ Junsu។

ផលិតកម្ម C-JeS Entertainment ដែលជាអាណាព្យាបាលរបស់ Junsu បានបញ្ជាក់អំពីព័ត៌មាននេះថា៖ "នេះគឺជាសេចក្ដីថ្លែងការណ៍ពិតប្រាកដអំពីព័ត៌មានទំនាក់ទំនងស្នេហារវាង Junsu និង Hani។ ដំបូងឡើយ អ្នកទាំងពីរបានគាំទ្រនិងលើកទឹកចិត្តគ្នាទៅវិញទៅមក ក្នុងនាមជាសិស្សច្បងនិងសិស្សប្អូនក្នុងវិស័យសិល្បៈ។ ប៉ុន្តែឥលូវនេះ ពួកគេពិតជាបានក្លាយជាគូស្នេហ៍ពិតប្រាកដមែន"។

តំណាងក្រុមហ៊ុនបានបន្តទៀតថា៖ "ដោយសារអ្នកទាំងសុទ្ធតែជាសិល្បករដែលមានអ្នកគាំទ្រច្រើន យើងសុំការយោគយល់ខ្លះពីអ្នករាល់គ្នា។ ដោយព័ត៌មានទំនាក់ទំនងស្នេហាគឺជារឿងបុគ្គល ពួកយើងមិនអាចបញ្ចេញព័ត៌មានលម្អិតច្រើនជាងនេះទៀតទេ" ៕