ម្ចាស់ហាងលក់ទូរសព្ទមួយរូបចែករំលែកបទពិសោធន៍ធ្វើជំនួញឈរជើងយូរឆ្នាំ

2016-03-10 17:48:34
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកខ្លះបើកហាងលក់ទូរសព្ទមិនបានប៉ុន្មានក៏ត្រូវដួលទៅវិញដោយសារគ្មានគ្រឹះរឹងមាំនិងវិធីសាស្ត្រល្អៗក្នុងការគ្រប់គ្រងហាង។ ទាក់ទិននឹងការបើកជំនួញលក់ទូរសព្ទ ម្ចាស់ហាងលក់ទូរសព្ទ ស្រី អូន បានបង្ហើបពីបទពិសោធន៍ខ្លះៗក្នុងការបើកហាងឱ្យឈរជើងបានយូរនិងកាន់តែរីកចម្រើន។

ស្រី អូន បានឱ្យដឹងថា ការតាមរយៈបទពិសោធន៍បើកហាងលក់ទូរសព្ទរយៈពេលជិត ៥ឆ្នាំមក នេះក្នុងនាមជាម្ចាស់ហាង អ្វីដែលអ្នកស្រីតែងប្រកាន់ជាប់មករហូតគឺ ការស្រាវជ្រាវ ការអត់ធ្មត់ ភាពស្មោះត្រង់បូកទំនួលខុសត្រូវ ឈ្លៀសវៃ និងភាពរួសរាយ។

ស្រាវជ្រាវ៖

ស្រីអូនថា ធ្វើជាម្ចាស់ហាងទូរសព្ទមិនមែនអត់ដឹងអីសោះបើកហាងកើតទេ។ កាលពីមុនធ្លាប់តែជាអ្នកលក់ស្បែកជើង ដល់ពេលមកចាប់បើកហាងលក់ទូរសព្ទ ពិតជាលំបាក ព្រោះមិនដែលដឹងពីបច្ចេកវិទ្យាស្មាតហ្វូនបានច្រើនហ្នឹងគេទេ។

ប៉ុន្តែក្រោយមកដោយសារការព្យាយាមស្រាវជ្រាវនឹងនៅជាមួយទូរសព្ទយូរទៅ ស្រីអូនយល់កាន់តែច្បាស់ពីទូរសព្ទ បើទោះបីខូចបញ្ហាណាមួយក៏សឹងតែអាចដោះស្រាយជូនភ្ញៀវបានដែរ។ ពេលមានទូរសព្ទថ្មី ស្រី អូនតែព្យាយាមស្វែងយល់ឱ្យច្បាស់ ដើម្បីងាយពន្យល់ភ្ញៀវពេលគេមកហាង។

ការអត់ធ្មត់៖

ការអត់ធ្មត់និងភាពស្មោះត្រង់ ស្រី អូនចង់បានន័យ ថា រកស៊ីអ្វីក៏ដោយតែងតែជួបបញ្ហាជាមួយអតិថិជន ហើយកាន់តែពិបាកនោះគឺការរកស៊ីបើកហាងលក់ទូរសព្ទនេះឯង។ ពេលខ្លះមានអតិថិជនមួយចំនួនឆេះដុំស្រែកខ្លាំងៗដាក់លោកស្រីនិងបុគ្គលិកក្នុងហាងក៏មាន តែអ្នកស្រីមិនដែលតបតទៅវិញឬធ្វើឥរិយាបថទាំងកំរោលទេ ផ្ទុយទៅវិញព្យាយាមលួងលោមនិងសម្រួលរហូតដល់អតិថិជនព្រមនិយាយស្តាប់គ្នា សឹមដោះស្រាយបញ្ហាជូនតាមក្រោយ។

ភាពស្មោះត្រង់បូកនិងទំនួលខុសត្រូវខ្ពស់៖

ស្រីអូនថា បើកហាងលក់ទូរសព្ទមួយ បើមិនស្មោះត្រង់ទេ ដួលបះជើងឆាប់មិនខាន។ បើយើងសម្រេចចិត្តថាចង់បើកហាងលក់ទូរសព្ទមួយហើយ ត្រូវតែលក់ផលិតផលសុទ្ធមកពីក្រុមហ៊ុននិងល្អសម្រាប់អតិថិជន មិនត្រូវក្លែងបន្លំទេ បើមិនដូច្នោះថ្ងៃក្រោយគេមិនខ្ចីមកជាន់ហាងទៀតទេ។

ម្យ៉ាងទៀត ទំនួលខុសត្រូវក៏ជារឿងចម្បងត្រូវប្រកាន់ខ្ជាប់ដែរ។ ពេលអតិថិជន យកទូរសព្ទមកឱ្យហាងដោះស្រាយបញ្ហាជូន ត្រូវប្រាកដថា សេវាកម្មដែលផ្តល់ទៅវិញគឺជាទីទុកចិត្ត មិនមែនខូចនេះថាខូចនោះ ហើយត្រូវព្យាយាមអស់លទ្ធភាពដោះស្រាយជូនភ្ញៀវបើសិនបញ្ហានោះកើតឡើងដោយហាងខ្លួនឯង។

ឈ្លៀសវៃ៖

អ្នកបើកហាងលក់ទូរសព្ទណាក៏ដូចគ្នា តែងមានជនមកបន្លំលួចទូរសព្ទ តែអ្នកលក់ក៏ត្រូវឈ្លៀសវៃដែរ ក្នុងការមើលមនុស្ស។

ស្រីអូនថា ពេលខ្លះមានជនប្លែកៗមួយចំនួនមកហាងធ្វើជាសួរនាំទិញទូរសព្ទ ដោយមានពាក់មួយការពារ ពាក់មាសជាដើម ដូច្នេះត្រូវប្រយ័ត្ន។ ពេលដឹងថាមានជនណាបម្រុងនឹងលួចទូរសព្ទ ស្រី អូនឬបុគ្គលិកក្នុងហាងណាមួយត្រូវចេះនិយាយស្រួលមិនធ្វើឱ្យស្ថានការណ៍កាន់តែតឹងតែងនោះឡើយ រហូតជនឆបោកទាំងនោះព្រមដើរចេញហើយទុករបស់ (ទូរសព្ទ)។ ស្ថានការណ៍បែបនេះស្រីអូន ធ្លាប់ជួបច្រើនដង តែមិនដែលភ្លាតស្នៀតធ្វើឱ្យបាត់របស់ទេ។

ស្រីអូនថា "គេនៅកន្លែងងងឹត ឯយើងនៅកន្លែងភ្លឺ អ៊ីចឹងនិយាយស្រួលជាមួយគេឱ្យគេទុករបស់ហើយដើរចេញទៅ កុំឱ្យមានបញ្ហាដល់ហាងយើងនៅថ្ងៃក្រោយ"។

រួសរាយ៖

"ការរួសរាយ ម្ចាស់ហាងណាក៏ត្រូវមានដែរ ព្រោះបើអតិថិជនឃើញមុខក្រញូវហើយមិនចេះនិយាយផ្អែម គ្មានអ្នកណាចង់ចូលមកទិញឥវ៉ាន់ក្នុងហាងទេ ទោះបីរបស់អ្នកឯងលក់ល្អប៉ុណ្ណាក៏ដោយ"។ ស្រីអូនបញ្ជាក់។

ម្ចាស់ហាងរូបនេះបន្ថែមថា ពេលខ្លះទោះបីមានបញ្ហាមិនសប្បាយចិត្ត ក៏ត្រូវធ្វើមុខរីកដូចគ្រាប់ជីនិងរួសរាយដាក់ភ្ញៀវដែលមកទិញទូរសព្ទក្នុងហាងជានិច្ចដែរ ដើម្បីទាក់ចិត្តឱ្យថ្ងៃក្រោយគេមកទិញរបស់ទៀត៕

អ្វីទាំងអស់នេះ គ្រាន់តែការចែករំលែកបទពិសោធន៍ខ្លះៗដែលម្ចាស់ហាងស្រី វ័យ ២៨ឆ្នាំរូបនេះចង់ចែករំលែកសម្រាប់ការបើកជំនួញលក់ទូរសព្ទឱ្យជោគជ័យនិងយូរអង្វែងទៅថ្ងៃមុខ៕

អត្ថបទ៖ ប៉ែត ផាន់និត

ពាក្យទាក់ទង

ព័ត៌មានបច្ចេកវិទ្យាក្នុងស្រុក អាជីពវិស័យបច្ចេកវិទ្យា

អត្ថបទពេញនិយម

Haaland, Mbappe, Salah ល្បីសាហាវតែមើលប្រាក់ខែចាញ់ម្នាក់នេះទៅវិញ

រថយន្តអគ្គិសនី Maxus Mifa9 សម្រេចបាននូវសម្ធិទផលលក់ដាច់ជាខ្លាំងលើសរថយន្ត Toyota Alphard នៅហុងកុង និងប្រទេសថៃ

មុនប៉ះគ្នាយប់នេះ Xabi Alonso និយាយបែបនេះទៅកាន់កន្លែងដែលខ្លួនធ្លាប់រស់នៅ

ប្រាសាទ ដាវីន បានបង្កើតប្រវត្តិសាស្ត្រជាមាតាទីមួយគ្រងមកុដបវរកញ្ញាចក្រវាលកម្ពុជាឆ្នាំ ២០២៤

ផ្ទុះការរិះគន់អក្សរចិនលើស្លាកហាងគ្មានអក្សរខ្មែរ មន្ត្រីថាបានចុះណែនាំដែរ តែគេមិនស្តាប់

ជំនឿផ្សេងៗទាក់ទងរឿងញាក់ត្របកភ្នែកតាមម៉ោង

អត្ថបទថ្មី

All Of Us Are Dead រដូវកាលទី2 នឹងបង្ហាញឱ្យឃើញថាតើអ្នកណានឹងក្លាយជាតួចិត្តអាក្រក់ថ្មី

ប្រធានសហព័ន្ធតេក្វាន់ដូ WT បន្ទាប់ពីបញ្ចប់ការប្រកួតកីឡាជាតិនេះទៅសូមបន្តប្រឹងប្រែងហ្វឹកហាត់បន្ថែមទៀត

ក្រុមចម្រៀងស្រី NewJeans ក្លាយជាទូតសុច្ឆន្ទៈរបស់អ៊ីនដូមី

តារាសម្តែង Park Sung-hoon ដែលសម្តែងក្នុងរឿង 'The Glory' បានធ្វើឱ្យអ្នកគាំទ្រភ្ញាក់ផ្អើលជាមួយនឹងរូបរាងរបស់គាត់នៅក្នុង 'Squid Game' រដូវកាលទី 2 **

Real Madrid ចាញ់៣គ្រាប់ឡើងពីរលើកជាប់គ្នាក្នុងដីខ្លួនឯង ជាលើកទី១ក្នុងរយៈពេល...

អូ គូលែន និងអ្នកនាង សុភ័ក្រ កុសុម៉ា បានក្លាយជាដៃគូសហការណ៍ ដើម្បីលើកកម្ពស់ការរស់នៅប្រកបដោយសុខុមាលភាព