តួឯកស្រី "ព្រះនាងយេយេ" ទាំង៣ជួបជុំគ្នាជាថ្មីក្នុងមង្គលការចៀវៃ ក្រោយលេងរឿង ១៩ឆ្នាំ

2016-08-01 17:37:56
ចំនួនមតិ 0 | ចំនួនចែករំលែក 0

ចន្លោះមិនឃើញ

វត្តមាននៅនាទីចុងក្រោយរបស់តារាសម្ដែង Zhao Wei បានក្លាយជាឱកាសដ៏កម្រសម្រាប់តួឯកស្រីរបស់រឿង "ព្រះនាងយេយេ" បានជុំគ្នាសាជាថ្មីក្រោយសម្ដែងភាពយន្តនេះរួមគ្នាជិត ២០ឆ្នាំ។

ពិធីអាពាហ៍ពិពាហ៍របស់តារាសម្ដែងស្រី Ruby Lin ត្រូវបានប្រព្រឹត្តឡើងកាលពីថ្ងៃទី ៣១ខែកក្កដាមុននេះនៅលើកោះបាលីប្រទេសឥណ្ឌូណេស៊ីក្រោមការចូលរួមរបស់ភ្ញៀវកិត្តិយស១០០រូប។ មុនពិធីនេះចាប់ផ្ដើម អ្នកគាំទ្របានសម្ដែងការសោកស្ដាយយ៉ាងខ្លាំងដោយសារស្រីស្អាតទាំង៣របស់រឿង "ព្រះនាងយេយេ" មិនអាចជុំគ្នាបាន។

ភាគីរបស់ Zhao Wei បានសុំការអភ័យទោសដោយរវល់ពេក ដកឃ្លាមិនរួច។ យ៉ាងណាក៏ដោយ ល្ងាចថ្ងៃទី ៣១ខែកក្កដា ត្រចៀកកាំបានប្រញាប់ប្រញាល់ធ្វើដំណើរទៅកោះបាលីដើម្បីអបអរថ្ងៃមង្គលរបស់បងប្អូនស្រីខ្លួន។

រយៈពេល១៩ឆ្នាំបានកន្លងផុតមកហើយដែលកំពូលខ្សែភាពយន្តភាគ "ព្រះនាងយេយេ" បានចាក់ផ្សាយជាលើកដំបូង។ ហើយក៏រយៈពេល១៩ឆ្នាំដែរ ដែលគេបានឃើញតួស្រីទាំង៣នេះមានមុខក្នុងកម្មវិធីតែមួយដោយពោរពេញទៅដោយសុភមង្គលបែបនេះ។ វត្តមានរបស់កំពូលតារាសម្ដែងទាំង៣បានពន្លត់រាល់ពាក្យចចាមអារ៉ាមដែលតែងចុះផ្សាយថាពួកគេមិនចុះសម្រុងនឹងគ្នា។

ក្រោយពេលបានគយគន់ទិដ្ឋភាពដ៏រំភើបមួយនេះ អ្នកប្រើប្រាស់អ៊ីនធឺណិតចិនបានបន្សល់មតិបង្ហាញពីអារម្មណ៍របស់ខ្លួនលើគេហទំព័រ Sina ដូចជា៖

-ខ្ញុំនៅចាំបានថា កាលពី១៩ឆ្នាំមុន លើកទី១ខ្ញុំបានមើលរឿង "ព្រះនាងយេយេ"។ នៅពេលនេះ ពួកគេបានជួបគ្នាសារជាថ្មី ពិតជារំភើបខ្លាំងណាស់។ អ្នកទាំង៣ត្រូវតែមានសុភមង្គលណា។

-មិត្តភាពជានិរន្ត គ្មានថ្ងៃសាបសូន្យ។ Bingbing ហា នៅតែបងស្រីទៀតទេ។

-ធំដឹងក្ដីឡើងជាមួយរឿង "ព្រះនាងយេយេ" ឥលូវបានក្លាយជាម្ដាយគេបាត់ហើយ។ ជូនពរឲ្យ Ruby-Wallace ស្រលាញ់គ្នាដល់ចាស់សក់ស្កូវ។ ហើយសង្ឃឹមថា សេដ្ឋី Fan ឆាប់ចូលរោងការ នៅសល់តែស្រីពៅទៀតទេ៕