រឿងខ្មែរ ៤ ត្រៀមបញ្ចាំងចុងឆ្នាំនេះ តាមរយៈ "ពូព្រហ្ម”

2016-09-19 22:42:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងឱកាសបើកសន្និសីទសារព័ត៌មាន ស្ដីពីខ្សែភាពយន្តខ្មែរ លោក ស៊ុំ ស៊ីថែន បានប្រាប់ឲ្យដឹងថា ចុងឆ្នាំ ២០១៦ នេះមានរឿងខ្មែរ ៤ ដែលត្រៀមបញ្ចាំងគ្រប់រោងកុនទំនើបតាមរយៈក្រុមហ៊ុន "ពូព្រហ្ម”។

អ្នកចាត់ការទូទៅរបស់ ពូព្រហ្ម អ៊ិនធើធេនមេន ខាងលើបានថាបន្ថែមទៀតថា "ក្នុងថ្ងៃនេះ យើងខ្ញុំសូមបង្ហាញជូនដល់អ្នកទាំងអស់គ្នានូវខ្សែភាពយន្តខ្មែរ ៤ រឿង ដែលត្រៀមនឹងចាក់បញ្ចាំងនៅតាមរោងភាពយន្តទំនើបៗក្នុងប្រទេសកម្ពុជាដូចជា “ទេសចរណ៍ឋាននរក” “កោះពេជ្រ” “វិកលចរិក” និងរឿង “ស្នេហ៍ស្វ័យគុណ ៤” និងមានផលិតករជាច្រើនទៀតកំពុងទាក់ទងមកពូព្រំដើម្បីជួយរកទីផ្សារឲ្យដូចរឿងទាំងបួននេះ។"

ស៊ុំ ស៊ីថែន បន្តទៀតថា កម្មវិធីព្រឹកនេះ រៀបចំឡើងដើម្បីជួយសម្រួលកិច្ចការផ្សេងៗរបស់ផលិតករក្នុងស្រុក ដើម្បីឲ្យចំណេញពេលវេលា ពង្រីកវិសាលភាពផ្សព្វផ្សាយ ហើយរកចំណូលបន្ថែមតាមរយៈការនាំរឿងចេញទៅក្រៅស្រុក និងចាក់ផ្សាយតាមអ៊ីនធឺណិត។

លោកបញ្ជាក់ទៀតថា "ពូព្រហ្ម” គឺជាក្រុមហ៊ុនឯករាជ្យមួយដែលមានការសហការរវាង Sabay MVP និង Westec media limited ដើម្បីស្វែងរកទីផ្សារឲ្យផលិតករក្នុងស្រុក និងអាចឲ្យផលិតករទាំងអស់ពិភាក្សាពីការផលិតកុនឲ្យតម្រូវចិត្តអតិថិជនបាន។

រឿងទាំងបួនដែលត្រូវបញ្ចាំងចុងឆ្នាំនេះមាន “ទេសចរណ៍ឋាននរក” នឹងចាប់ផ្ដើមបញ្ចាំងនៅថ្ងៃ ២៩ ខែកញ្ញា ហើយរឿង "កោះពេជ្រ” ចាប់ផ្ដើមបញ្ចាំងនៅចុងខែ តុលា។ រីឯរឿង “វិកលចរិក” បញ្ចាំងនៅថ្ងៃទី ១២ ខែធ្នូ និងរឿងចុងក្រោយ “ស្នេហ៍ស្វ័យគុណ ៤” បញ្ចាំងថ្ងៃ ៣១ខែធ្នូ៕

ចុចអាន៖ក្រុមហ៊ុនថ្មីមួយ បង្កើតឡើងដើម្បីជួយភាពយន្តខ្មែរ