ប្រាសាទមេបុណ្យខាងលិច ជួសជុលឡើងវិញ ក្រោយជំនួយពីមូលនិធិតូតាល់

2017-01-03 06:53:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រាសាទមេបុណ្យខាងលិច កំពុងតែធ្វើការជួសជុលឡើងវិញ ក្រោមក្របខណ្ឌមូលនិធិសាមគ្គីភាពរួមមាន ក្រសួងការបរទេស ក្រសួងវប្បធម៌ និងគមនាគមន៍ ក្រសួងឧត្តមសិក្សានិងស្រាវជ្រាវ សាលាបារាំងចុងបូព៌ា ព្រមទាំងមូលនិធិតូតាល់ផងដែរ។

គម្រោងជួសជុលឡើងវិញនេះ គឺមានបញ្ហាប្រឈមផ្នែកបច្ចេកទេស និងវិទ្យាសាស្ត្រថ្មីមួយសម្រាប់ក្រុមការងារបារាំង-កម្ពុជា ដែលប្រមូលផ្ដុំដោយសាលា EFEO និងអាជ្ញាធរជាតិអប្សរា។ ដោយធ្វើការអភិវឌ្ឍនិងជួសជុលស្នាដៃស្ថាបត្យកម្មឯក គម្រោងនេះអាចឱ្យមានការផ្ទេរសមត្ថភាពរវាងគ្នានិងគ្នា វិធីសាស្ត្រពហុជំនាញ បុរាណវិទ្យា ការជួសជុល និងការលើកតម្លៃជាដើម។

លក្ខណៈពិសេសនៃការជួសជុលនេះ គឺមានភាពស្មុគស្មាញផ្នែកបច្ចេកទេស ជាពិសេសទាក់ទងនិងការបង្ហូរទឹកចេញចូលតែម្ដង ដោយត្រូវធ្វើទំនប់ទប់ទឹក មិនឱ្យឡើងមកនៅរដូវវស្សា ព្រោះប្រាសាទមេបុណ្យនេះធ្វើឡើងកណ្ដាលបារាយណ៍ខាងលិច ដែលមានទឹកពាសពេញនៅរដូវវស្សាម្ដងៗ។

ចំពោះគម្រោងជួយឧបត្ថម្ភចំពោះការជួសជុលនេះដែរ លោក Guillaume Narjollet ទីប្រឹក្សាសហប្រតិបត្តិការ និងវប្បធម៌នៃស្ថានទូតបារាំងប្រចាំនៅកម្ពុជា និងជានាយកវិទ្យាស្ថានបារាំងនៅកម្ពុជា បានបញ្ជាក់ដូចវីដេអូខាងក្រោមនេះថា៖

សូមបញ្ជាក់ថាប្រាសាទមេបុណ្យខាងលិចនេះ ជាប្រាសាទបុរាណខ្មែរមានទីតាំងស្ថិតនៅលើដីទួលមួយកន្លែង ចំកណ្តាលបារាយណ៍ខាងលិច ក្នុងខេត្តសៀមរាប។ ប្រាសាទនេះត្រូវបានស្ថាបនាឡើងនៅអំឡុងពាក់កណ្ដាលសតវត្សទី១១នៃគ្រិស្តសករាជក្នុងរាជកាលព្រះបាទឧទយាទិត្យវរ្ម័នទី២៕