ប្រធានក្រុមប៉ូលិស សាយ ពិសិដ្ឋ ខកចិត្តមិនអាចជួយក្រុមរយៈពេលយូរ

2017-02-28 04:21:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែការពារឆ្នើម និងជាប្រធានក្រុមរបស់ក្លឹបប៉ូលិស សាយ ពិសិដ្ឋ បង្ហើបថា ខ្លួនពិតជាខកចិត្តខ្លាំងមែនទែន ដែលមិនអាចជួយក្រុមយ៉ាងតិច ៣ ខែដោយសារបញ្ហារបួសប្រេះឆ្អឹងស្មងជើង។

សាយ ពិសិដ្ឋ អង្គុយ

របួសរបស់អតីតខ្សែការពារជម្រើសជាតិកម្ពុជា រួបនេះកើតឡើងកាលប៉ះទង្គិចជាមួយកីឡាកររបស់ក្លឹបអគ្គិសនីកាលពីចុងសប្ដាហ៍មុន ដែលបញ្ចប់ទៅដោយលទ្ធផលស្មើគ្នា០-០ ក្នុងការប្រកួតលីគកំពូលកម្ពុជា។

បុរសកូនមួយរូបនេះបានឲ្យដឹងថា របួសរបស់គេមិនបាច់ធ្វើការវះកាត់ក៏បាន ពោលគឺអាចព្យាបាលដោយប្រើថ្នាំលេប និងរុំប៉ង់ស៊ីម៉ង់។ គ្រូពេទ្យបានបញ្ជាក់ប្រាប់គេថា របួសនេះត្រូវការសម្រាកយ៉ាងតិច ៣ខែ ទើបអាចហ្វឹកហាត់បានតិចៗវិញ ប៉ុន្តែមិនអាចជាសះស្បើយ១០០%ឡើយ។

ពិសិដ្ឋ បន្ថែមថា ពិតជាមានការខកចិត្តខ្លាំងបំផុតដោយសាររបួសមួយនេះ ដែលពេលនេះរូបគេកំពុងធ្វើបានល្អ ហើយកីឡាករទាំងអស់ហាក់លេងស៊ីចង្វាក់គ្នា។ បញ្ហារបួសនេះរូបគេគិតថា អាចប៉ះពាល់ដល់ក្រុមប៉ូលិសនាប្រកួតក្រោយៗ ដោយសារក្លឹបរបស់គេកំពុងខ្វះកីឡាករ។

ក្លឹបប៉ូលិសចាប់ផ្ដើមពីរប្រកួតដំបូងយកឈ្នះវេស្ទើន ៤-០នាប្រកួតទី១ និងស្មើក្រុមអគ្គិសនី០-០នាប្រកួតទី២របស់ខ្លួន។ ចំណែកសប្ដាហ៍ក្រោយក្លឹបមួយនេះនឹងទៅជួបភ្នំពេញក្រោននៅកីឡដ្ឋាន RSN នាវេលាម៉ោង៦:០០នាទី៕

អត្ថបទ៖ ស្រី សុវណ្ណដារ៉ា