ប្រធានសហព័ន្ធបាល់ទាត់អាស៊ី សរសើរការរីកចំរើនបាល់ទាត់នៅកម្ពុជា

2017-03-07 03:01:06
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Shaikh Salman bin Ebrahim Al Khalifa ប្រធានសហព័ន្ធបាល់ទាត់ទ្វីបអាស៊ីបានសរសើរដល់ការខំប្រឹងប្រែងអភិវឌ្ឍបាល់ទាត់របស់កម្ពុជា ហើយក៏គាំទ្រចំពោះគោលការណ៍មិនឱ្យមានការកំណត់លទ្ធផលទុកជាមុនដែរ។

លោក Khalifa មកកម្ពុជានេះ បានជួបជាមួយប្រធានសហព័ន្ធបាល់ទាត់កម្ពុជាលោក សៅ សុខា ផ្ទាល់ហើយក៏បានពិភាក្សាគ្នាអំពីគម្រោងអភិវឌ្ឍបាល់ទាត់របស់កម្ពុជាផងដែរ។ ក្នុងនោះ ថ្នាក់ដឹកនាំទាំងពីរ ក៏បានព្រួតដៃគ្នា ប្រឆាំងនិងរារាំងចំពោះអំពើអាក្រក់នានាដែលកើតឡើងក្នុងវិស័យបាល់ទាត់នេះដែរ ជាពិសេសគឺការកំណត់លទ្ធផលប្រកួតទុកមុនតែម្ដង។ លើសពីនេះទៅទៀត ប្រធានសហព័ន្ធបាល់ទាត់ទ្វីបអាស៊ីក៏បានកោតសរសើរចំពោះការខិតខំប្រឹងប្រែងរបស់កម្ពុជាក្នុងការនាំយកវិស័យកីឡាមួយនេះឱ្យកាន់តែរីកចំរើនផងដែរក្នុងរយៈពេលប៉ុន្មានឆ្នាំចុងក្រោយនេះ។

បើតាមវិបសាយរបស់ AFC លោក សៅ សុខា បានបញ្ជាក់ថានៅកម្ពុជាគឺប្រឆាំងខ្លាំងណាស់ចំពោះការកំណត់លទ្ធផលទុកមុន ហើយលោកក៏បានសន្យាដែរថានឹងមិនឱ្យមានរឿងនេះកើតឡើងក្នុងបាល់ទាត់ឡើយ។ រឿងនេះជារឿងមិនល្អឡើយ ដូច្នេះសហព័ន្ធបាល់ទាត់កម្ពុជានិងទ្វីបអាស៊ីនឹងសហការគ្នាកម្ចាត់វាចោល។

ប្រធានសហព័ន្ធបាល់ទាត់កម្ពុជាក៏បានប្រកាសដែរថានឹងបង្កើតជា Football School ឱ្យបានគ្រប់២៥ខេត្តក្រុងទូទាំងប្រទេស ដើម្បីឱ្យវិស័យមួយនេះកាន់តែរីកចំរើននិងបង្ហាញថាកីឡាបាល់ទាត់ជាផ្នែកមួយយ៉ាងសំខាន់សម្រាប់យុវជន៕

អត្ថបទ៖ មុន្នីរម្យ