មិនខុសគ្រូដទៃ សំ វ៉ាន់ដេត ក៏បារម្ភចំពោះចង្វាក់លេងល្អរបស់ Booysen Shane ដែរ

2017-03-17 03:55:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ជំនួបធំប្រចាំសប្ដាហ៍ ភ្នំពេញក្រោន និងព្រះខ័នរាជស្វាយរៀង នឹងឈានចូលមកដល់នៅថ្ងៃស្អែកវេលាម៉ោង៦ល្ងាចហើយ នាកីឡដ្ឋាន RSN ។

មុនការប្រកួតនោះឈានចូលមកដល់នេះដែរ លោក សំ វ៉ាន់ដេត បានបញ្ជាក់ប្រាប់ Sabay ថាក្រុមរបស់លោកមានកីឡាករទទួលបានកាតលឿង២ដងម្នាក់ គឺនេន សុធារ័ត្ន ខណៈដែលកីឡាករ រស់ គង់សម្រេច ក៏មិនទាន់ច្បាស់ថាបានលេងឬអត់ដែរ។ ចំពោះក្ដីបារម្ភរបស់លោកវិញ ក៏មិនខុសអ្វីពីគ្រូដទៃទៀតដែរ ពោលគឺភ្នំពេញក្រោនមានកីឡាករ Shane Booysen ដែលអាចរកគ្រាប់បាល់គ្រប់ពេលវេលា និងតែងតែបង្កើតឱកាសជានិច្ច។

“យើងមើលឃើញ គាត់ជាខ្សែប្រយុទ្ធម្នាក់ គាត់កំពុងតែមានទម្រង់លេងល្អ និងជាអ្នករកគ្រាប់បាល់បានច្រើនជាងគេ។ Shane ជាកីឡាករម្នាក់ដែលយើងត្រូវយកចិត្តទុកដាក់ មិនអាចប្រហែសបាននោះទេ”។ សម្ដីលោក សំ វ៉ាន់ដេត។

ទាក់ទងនឹងការឡើងជើងខ្លាំងរបស់ភ្នំពេញក្រោនវិញ គ្រូបង្វឹកខាងលើមិនចាប់អារម្មណ៍នោះទេ ព្រោះក្រុមរបស់លោកក៏បានរៀបចំខ្លួនដែរ ហើយទាល់តែចូលប្រកួតចប់៩០នាទីសិន ទើបដឹងថានរណាជាអ្នកខ្លាំងជាងនរណា។ គិតត្រឹមសប្ដាហ៍ទី៤នេះ ក្រុមទាំងពីរមានពិន្ទុ ១០ពិន្ទុដូចគ្នា ខណៈដែលគ្រាប់បាល់ចំណេញវិញ ក៏មានស្មើគ្នាដែរ ក្រោយពី៤ប្រកួត ឈ្នះ៣និងស្មើ១ដូចគ្នា៕

អត្ថបទ៖ មុន្នីរម្យ