ជុំ សោភ័ណ្ឌ៖ “របររកស៊ីខ្លះបរទេសហ៊ានបើកនៅខ្មែរ ចុះកូនខ្មែរម៉េចមិនហ៊ាន?”

2017-07-11 00:29:51
ចំនួនមតិ 0 | ចំនួនចែករំលែក 0

ចន្លោះមិនឃើញ

“ខ្ញុំចាប់ផ្តើមធ្វើការស្រាវមុននឹងដំណើរការអាជីវកម្ម ប៉ុន្តែធ្វើរយៈពេលខ្លីដែរទេ ហើយបានកត់សំគាល់ថា របររកស៊ីខ្លះ បរទេសជាម្ចាស់ហ៊ានបើកនៅខ្មែរ ចុះកូនខ្មែរម៉េចមិនហ៊ាន?”។ ទាំងនេះគឺជាការរៀបរាប់របស់លោក ជុំ សោភ័ណ្ឌ ស្ថាបនិកក្រុមហ៊ុន ខេមថេក សឹលូសិន (Camtech Solution) និងអាវតាកាហេ្វ ដែលទើបដាក់ឱ្យដំណើរកាលពីដើមឆ្នាំនេះ។

លោក ជុំ សោភ័ណ្ឌ

មានទីកន្លែងកំណើតនៅស្រុកព្រះស្តេច ខេត្តព្រៃវែង សហគ្រិនវ័យ ៣៥ ឆ្នាំរូបនេះ មានសុទិដ្ឋិនិយមថា កម្ពុជាបច្ចុប្បន្ននៅមានចន្លោះប្រហោងច្រើន ក្នុងការចាប់យកឱកាសបអាជីវកម្មណាមួយ ដែលគេគិតថាល្អ និងប្លែក។ ការរកស៊ីមិនពឹងលើដើមទុកតែមួយមុខទេ។ គេអាចប្រើប្រាស់គំនិតជាដើមទុន ជំនួសឱ្យលុយក្នុងករណីខ្លះ។

“ខ្ញុំបានស្គាល់យុវជនម្នាក់ គាត់អាចរកស៊ីបានដោយគ្មានដើមទុន។ គាត់បានទៅទាក់ទងនៅហាងការហ្វេមួយពីប្រភេទស្បោង និងកំប៉ុងរចនាថ្មី ដែលហាងនោះអាចមានតម្រូវការ។ ហាងកាហ្វេព្រមព្រាងកុម្ម៉ង់ក្នុងចំនួនមួយ។ គាត់ស្នើសុំលុយកក់ ២០% បន្ទាប់មកប្រើប្រាស់លុយកក់ ២០% ផ្ទេរទៅដៃគូនៅបរទេស ដើម្បីដំណើរការផលិត។ ឥវ៉ាន់មកដល់ទើបប្រគល់លុយគ្រប់ចំនួន ទៅឱ្យដៃគូនៅបរទេស”។

អតីតអ្នកគ្រប់គ្រងនៅក្រុមហ៊ុនមួយចំនួន និងផ្តើមរកស៊ីដំបូងនៅឆ្នាំ ២០០៩ លោក សោភ័ណ្ឌ ឱ្យដឹងថា ធ្វើការងារនៅក្រុមហ៊ុន ដែលខ្លួនបម្រើការងារបានល្អ និងមានមុខតំណែងធំ មិនប្រាកដថា យើងជោគជ័យទេ។ ចំពោះលោកការចូលបម្រើការងារនៅក្រុមហ៊ុន គ្រាន់តែជាធ្នាក់ដើម្បីឈានទៅចាប់យកមុខរបរណាមួយ ទៅថ្ងៃក្រោយប៉ុណ្ណោះ។

ចាប់តាំងពីដំណើរការរកស៊ីនៅឆ្នាំ ២០០៩ និងបានបើកផ្លូវការក្រុមហ៊ុន Camtech Solution នៅពាក់កណ្តាលឆ្នាំ ២០១៦ រហូតដល់បច្ចុប្បន្ន ទោះជាបានចំនួនតិចតួចក៏លោកចាត់ទុកថាជោគជ័យមួយចំណែក ខណៈប្រាក់ចំណូលបានច្រើនជាងធ្វើការងារឱ្យគេ។ មានអតិថិជនជាច្រើន បានទទួលយកសេវារបស់ក្រុមហ៊ុន Camtech Solution ជាប្រចាំ។ ក្រុមហ៊ុននេះមានសេវាកម្មជាច្រើនដូចជា រចនាគេហទំព័រ ប្រព័ន្ធគ្រប់គ្រងក្នុងក្រុមហ៊ុន និង សេវា SMS ជាដើម។ ក្រុមហ៊ុននេះបានដំណើរការជាមួយនឹងដើមទុន ២ ម៉ឺនដុល្លារអាមេរិក។ ចំណែកអាវតាកាហ្វេក៏ចំណាយដើមទុកប្រហាក់ប្រហែលគ្នាដែរ។ អាវតាកាហ្វេ ដែលបានដំណើរការកាលពីដើមឆ្នាំនេះ បានពង្រីកទីតាំងបាន ៦ កន្លែងនៅរាជធានីភ្នំពេញ និងគ្រោងពង្រីកឱ្យបាន ១០ ទីតាំងក្នុងពេលឆាប់ៗខាងមុខ ជាមួយនឹងការគាំទ្រពីអតិថិជនកម្រិតបង្គួរ។

ចំណែក Camtech Solution មានក្រុមការងារ ៤ នាក់ជាខ្មែរ និងមានម្នាក់ជាជនជាតិសិង្ហបុរី និងម្នាក់ជាឥណ្ឌា។ លោក និងក្រុមការងារ កំពុងធ្វើការស្រាវជ្រាវបច្ចេកវិទ្យាថ្មីៗលើ Facebook បន្ថែមទៀត។ Facebook ជាបណ្តាញសង្គមធំមួយ ដែលបានទាក់ទាញអ្នកប្រើប្រាស់កម្ពុជារាប់ពាន់នាក់។

វិលមកដំណើរការអាវតាកាហ្វេ លោកគិតថា ទីផ្សារកាហ្វេក្នុងប្រទេសកម្ពុជានៅតែល្អ ដោយសារមានកំណើនអតិថិជនថ្មី។ គ្មានកន្លែងណាត់ជួបណាដែលល្អជាងហាងកាហ្វេទេ។ ហាងការហ្វេបែបបុរាណ នៅតែអាចគ្រប់គ្រងចំណែកទីផ្សារធំមួយ ដោយសារកម្រិតជីវភាព និងម៉ាកយីហោល្បីៗ បានទាក់ទាញអ្នកធ្វើការ និងអ្នកមានជីវភាពកម្រិតកណ្តាល។

សម្រាប់យុវជនដែលមានបំណងជាធ្វើអាជីវកម្ម លោកបានចែករំលែកបទពិសោធន៍ផ្ទាល់ខ្លួនថា យុវជនត្រូវមានឆន្ទះខ្ពស់ ពេលដួលត្រូវចេះងើបឡើងវិញដោយខ្លួនឯង មានទំនាក់ទំនងល្អ មិនត្រូវមានអំនួត ខ្ជីខ្ជាពេលវេលា និងត្រូវសិក្សាអ្វីថ្មីជាប់ជានិច្ច៕