Huawei ចេញលក់ Nova 2s កាមេរ៉ាភ្លោះមុខ-ក្រោយខ្លាំងជាង 2i ពីរដង

2017-12-16 03:12:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពី Huawei ប្រកាសចេញលក់កំពូលស្មាតហ្វូន Mate 10 Pro និងទទួលបានជោគជ័យខ្លាំងលើម៉ូឌែល Nova 2i ពេលនេះ Huawei បន្តចេញម៉ូឌែល Nova 2s ថ្មីមួយទៀត ឯលក្ខណៈសម្បត្តិរបស់វាក៏មិនចាញ់សិស្សច្បងទាំងពីរខាងលើដែរ។

តាមប្រភពឲ្យដឹងថា Nova 2s មានបំពាក់មកជាមួយកាមេរ៉ាបួនគ្រាប់ មុខពីរ ក្រោយពីរ។ មានបួនពណ៌សុទ្ធតែស្រស់ៗដូចជា ក្រហម ខៀវ ខ្មៅ ផ្កាឈូក និងប្រផេះ។ មានអេក្រង់លាតស្ទើរតែពេញតួខ្លួនតែម្តង។

Nova 2S បំពាក់មកជាមួយនឹងអេក្រង់ទំហំ ៦ អ៉ីញអាចបង្ហាញរូបភាពក្នុងកម្រិត FHD+ ជាមួយនឹងកម្រិត Ratio 18:9 ។ បំពាក់មកជាមួយបន្ទះឈីបកំពូល Kirin 960 ជាមួយ RAM ទំហំ 6GB មានថាមពលថ្ម ៣ ៣៤០ មីលីអំពែម៉ោង និងដំណើរការដោយ Android Oreo 8.0 ស្រោបដោយ EMUI ទៀតផង។

កាមេរ៉ាភ្លោះខាងក្រោយ Nova 2s មានទំហំ ២០ មេហ្គាភិចសែល មាន Apeture f/1.8 ជាប្រភេទ Monochromeដែលអាចថតរូបបែប Low-light បានច្បាស់ល្អ និងមួយគ្រាប់ទៀតទំហំ ១៦ មេហ្គាភិចសែលជាប្រភេទ RGB ប៉ុន្តែមិនមែនជាប្រភេទឡេន Zoom ទេ។

រីឯកាមេរ៉ាខាងមុខពីរគ្រាប់វិញមានទំហំ 20MP ដូចគ្នាដែលអាចឲ្យអ្នកថតរូប Selfie បានច្បាស់និងសាច់មុខម៉ត់ល្អ។

តម្លៃលក់នៅទីផ្សារចិនចាប់ពី ៤០៨ ដុល្លារ(RAM4GB/128GB) ៤៥៣ ដុល្លារ(RAM 6GB/128GB) និងមានម៉ូឌែលពិសេសមួយផ្សេងទៀតតម្លៃ ៥១៤ ដុល្លារ(RAM 6GB/128GB)។ ចំណែកឯតម្លៃដាក់លក់នៅកម្ពុជានៅមិនទាន់ដឹងនៅឡើយទេ តែយ៉ាងណាអាចលើសគ្នាបន្តិចបន្តួចប៉ុណ្ណោះ៕