គាំទ្រផង! អ្នកចម្រៀងពិការកម្ពុជា១រូបកំពុងបង្ហាញសមត្ថភាពឲ្យពិភពលោកបានស្គាល់

2017-12-20 23:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចម្រៀងពិការ ប្រាក់ សុផាន់ណា កំពុងបង្ហាញពិភពលោកបានស្គាល់កម្ពុជា តាមរយៈសមត្ថភាពច្រៀង និងកម្លាំងចិត្តតស៊ូនៃជីវិតរបស់ខ្លួន ចូលរួមប្រកួតក្នុងកម្មវិធី Our botter world នៃប្រទេសសីង្ហបុរី ។

ប្រាក់ ផាន់ណាបេក្ខជនកម្ពុជាដែលជាប់ជម្រើសទាំង១០ ដែលត្រូវបោះឆ្នោត ដើម្បីទទួលបានជ័យជម្នះកម្មវិធីនេះនៅថ្ងៃទី២៧ ធ្នូ ឆ្នាំ២០១៧ ខាងមុខ។ កម្មវិធីនេះមានការចូលរួមប្រកួតប្រជែងពីបេក្ខជនមកពីជាង៥០ប្រទេសក្នុងពិភពលោក ។

ជាអ្នកនិពន្ធ អ្នកចម្រៀងម្នាក់ដែលបាត់បង់គ្រប់យ៉ាងទាំងកាយសម្បទា និងក្រុមគ្រួសារគ្មានទីពំនាក់ លោក ប្រាក់ សុផាន់ណា បានយកខ្សែជីវិតពិតរបស់ខ្លួនថតជាវីដេអូ ដើម្បីចូលរួមប្រកួតក្នុងកម្មវិធីខាងលើ។

ចូលរួមបោះឆ្នោតឲ្យវីដេអូរបស់លោក ប្រាក់ សុផាន់ណា តាមនេះ Link នេះ https://www.ourbetterworld.org/en/gsoty-story/defying-crazy-odds-make-beautiful-music

វីដេអូរបស់លោក ប្រាក់ សុផាន់ណា អ្នកខេត្តស្វាយរៀងរៀបរាប់ពី ជីវិតពិតរបស់លោកដែលអាប់អួរយ៉ាងខ្លាំង ក្រោយពីម្តាយឪពុកត្រូវគេធ្វើឃាតក្នុងឆ្នាំ១៩៩៥ ដោយលោកមិនដឹងពីមូលហេតុ។ ក្រោយបាត់អាណាព្យាបាល រលកជីវិតនៃកូនកូនប្រុសទាំង៤ដែលធ្លាប់ទទួលបានការមើលថែ និងទំនុកបម្រុងពីឪពុកជាគ្រូបង្រៀន និងមានម្តាយជាស្រ្តីមេផ្ទះ ត្រូវបាត់បង់បង្គោល រស់នៅយ៉ាងវេទនាបំផុត។ ជីវិតត្រូវរសាត់អណ្ដែតដូចចកអណ្ដែតតាមទឹក ត្រូវទៅរស់នៅជាមួយអ្នកបន្តិចអ្នកនោះបន្តិច ។

គ្រូបង្រៀនហ្គីតារូបនេះបានរៀបរាប់ពីផលលំបាកនៃជីវិតខ្លួនប្រាប់Sabayថា ដំបូងឡើយលោកជាមនុស្សម្នាក់ដែលមានកាយសម្បទាល្អដូចមនុស្សទូទៅ តែក្រោយម្តាយឪពុកស្លាប់លោក និងបងប្អូនត្រូវតស៊ូរស់ដោយខ្លួនឯង ដោយហូបតែក្ដាមខ្យងហូត និងធ្វើការហួសកម្លាំងតាំងពីខ្លួនអាយុទើបបាន៥ឆ្នាំ ជាមួយយាយតា។

លោករៀនចប់ត្រឹមបឋមសិក្សាប៉ុណ្ណោះ ដោយសារមានការទំនុកបម្រុងគ្រួសារជនជាតិថៃបានយកលោកមករស់នៅក្នុងរាជធានីភ្នំពេញ។ ក្តីសង្ឃឹមដែលលោកទទួលបាន មានរស្មីមិនយូរប៉ុន្មានផងស្រាប់តែរលត់ទៅវិញពេលប្តីប្រពន្ធគ្រួសារថៃនោះវិលទៅរស់ប្រទេសគេ។ ទុក្ខជាន់លើទុក្ខ មិនយូរប៉ុន្មាននៅឆ្នាំ១៩៩៩ សុផាន់ណា ក៏មានបញ្ហាជំងឺខួរឆ្អឹងខ្នង រហូតដល់ពិការ មិនអាចធ្វើដំណើរទៅណាមកណាបាន ដោយត្រូវយកពោះធ្វើជាខ្នង ត្រូវដេកពោបរទេះរហូតមកដល់បច្ចុប្បន្ន។

ក្មេងកំសត់ម្នាក់នេះបានទៅ រស់នៅក្នុងមណ្ឌលកុមារកំព្រាក្នុង ខេត្តសៀមរាបក្នុងឆ្នាំ ២០០១ ព្រោះអស់ទំពឹងនៅភ្នំពេញ។ ក្នុងរយៈពេលរស់នៅក្នុងមណ្ឌលកុមារកំព្រា សុផាន់ណា ព្យាមយាមរៀន ភាសាអង់គ្លេស និងឧបករណ៍ហ្គីតា និងកុំព្យូទ័រ ជាដើម។

លោក ប្រាក់ សុផាន់ណា បានលើកឡើងថាលោកក៏ធ្លាប់មានគំនិតមិនចង់រស់ ព្រោះគិតថាជីវិតឥតន័យ។ ប៉ុន្តែគំនិតចង់សម្លាប់ខ្លួនក៏រលត់ទៅវិញនៅពេលលោកបានឃើញជីវិតអ្នកដ៏ទៃទៀត ដែលគេពិបាកជាងខ្លួនលោក ហើយគេបន្តរស់ដោយរីករាយ។ លោក ប្រាក់ សុផាន់ណា បន្តថា«ខ្ញុំនៅចង់រស់ ខ្ញុំនឹកឃើញដល់ម្តាយឪពុកខ្ញុំដែលគាត់ប្រឹងថែរក្សាខ្ញុំ មុនពេលពួកគាត់ស្លាប់ អីចឹងបានន័យថាគាត់ចង់ឲ្យខ្ញុំរស់បន្តទៀត ពួកគាត់ស្រលាញ់ជីវិតរបស់ខ្ញុំ ដូច្នេះខ្ញុំក៏មិនស្អប់ជីវិតខ្លួនឯងដែរ។ ខ្ញុំចង់ឲ្យអ្នកបាក់ទឹកចិត្តបានឃើញថាមនុស្សដែលវេទនាដូចខ្ញុំក៏អាចតស៊ូរស់ទៅមុខទៀតបាន ដើម្បីមើលពិភពលោកនេះ មានជីវិតរស់គឺមានតម្លៃណាស់ ខ្ញុំស្រលាញ់ជីវិតខ្ញុំណាស់។»។

ទោះជា ខ្លួនជាជនពិការតែបេះដូង ចិត្តគំនិត ចំណេះដឹងមិនពិការ ទៅតាមរូបរាងខាងក្រៅរបស់លោកទេ បុរសវ័យ ២៧ឆ្នាំ រូបនេះ បានប្រឹងរស់ដោយថ្លៃថ្នូរ ក្នុងអាជីពជាអ្នកចម្រៀង អ្នកនិពន្ធ និងគ្រូបង្រៀនភ្លេង។ បច្ចុប្បន្ន សុផាន់ណាកំពុង រស់នៅក្នុងបន្ទប់ជួលមួយក្នុងខេត្តសៀមរាប ជាមួយមិត្តភក្តិ ចំណូលដែលមកពីអាជីពរបស់ខ្លួនក្នុងមួយខែ លោកទទួលបានត្រឹម ១៥០ដុល្លា ប៉ុណ្ណោះ ព្រោះការបង្រៀនហ្គីតារបស់លោកមួយចំនួនធំមិនយកប្រាក់ទេ។ ចំណែកបងប្អូនទាំង៣ គេបានកសាងជីវិតគ្រួសាររាងខ្លួនអស់ហើយ។

បុរសកំសត់រូបនេះបានដាក់ក្តីរំពឹង ថាលោកនិងបើកសាលាបង្រៀនតន្រ្តីចែករំលែកចំណេះដឹងដែលខ្លួនមានដល់ក្មេងជំនាន់ក្រោយ និងចង់លោកទឹកចិត្តដល់ ដទៃដែលបាក់ទឹកចិត្តឲ្យប្រឹងរស់បន្ត។

សូម ជួយបោះឆ្នោត តាមនេះ https://www.ourbetterworld.org/en/gsoty-story/defying-crazy-odds-make-beautiful-music

អត្ថបទៈ ស្រីអូន