Mate 10 Pro ថ្លៃក្បែរពាន់ដុល្លារ មានចំណុចខ្លាំង ៣ និងចំណុចអន់បំផុត ១ (ពន្យល់លម្អិត)

2017-12-23 02:28:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនប្រទេសចិន Huawei បានប្រកាសបង្ហាញនូវស្មាតហ្វូនជំនាន់ក្រោយ Mate 10 Pro កាលពីខែតុលា ឆ្នាំ ២០១៧។ ជាស្មាតហ្វូនបំពាក់នូវអេក្រង់ OLED, អង្គគណនាកម្លាំងខ្លាំង, អង្គផ្ទុកធំ, ថ្មកាន់បានយូរ តែកុំភ្លេចតម្លៃក៏មិនណយប៉ុន្មានដែរ។

បច្ចុប្បន្នទើបតែចរាចរលើទីផ្សារចក្រភពអង់គ្លេស ថ្លៃប្រហែល ៦៩៩ ផោន ឬជាង ៩៣៥ ដុល្លារ ម្ល៉ោះអាចធ្វើឲ្យអ្នកស្ទាក់ស្ទើររវាងជម្រើស Galaxy Note 8 ឬ iPhone X ដែលថ្លៃប្រហែលគ្នា។ Sabay លើកយកការបង្ហាញប៉ុន្មានចំណុចសំខាន់នៃត្រកូល Mate ជំនាន់ក្រោយ។

១.ការរចនា:

ស្រោបដោយកញ្ចក់មុខក្រោយដូចគូប្រជែង ២ ផ្សេងទៀត ហើយរូបរាងបើធៀបនឹងត្រកូល Mate 10 ក៏ប្រហាក់ប្រហែលគ្នា។ ខាងមុខបំពាក់នូវអេក្រង់ពេញក្បែរផ្ទៃសងខាង និងកញ្ចក់កោងនៅផ្នែកខាងក្រោយ ជួយលើកសម្រស់ឲ្យ Pro កាន់តែស៊ីវិល័យមួយកម្រិតទៀត។

អមដោយកាមេរ៉ាភ្លោះ Brand ល្បីឈ្មោះពី Leica ហើយមានទ្រនាប់ស្កេនខ្ចៅដៃនៅខាងក្រោម ចំពោះកញ្ចក់ដែលបំពាក់ស្រោបខ្លួនរបស់វា បញ្ជាក់ថាមិនងាយសឹកឬឆ្កូតដូចពពួកស្មាតហ្វូនស៊េរីកណ្ដាលនោះឡើយ។ នៅផ្នែកខាងក្រោមប្រើរន្ធ USB-C ប៉ុន្តែលុបបំបាត់នូវរន្ធដោតកាសទំហំ 3.5mm ដែលជាចំណុចមិនពេញចិត្ត សម្រាប់អ្នកនិយមស្ដាប់តន្ត្រីលើស្មាតហ្វូន។ ដោយការបំពាក់នូវអង្គផ្ទុកធំ ម្ល៉ោះអវត្តមានរន្ធដោត microSD អាចថាជារឿងមិនចាំបាច់។

២.អេក្រង់:

ធៀបនឹង Mate 10 ធម្មតា ត្រកូល Pro ខុសត្រង់អេក្រង់ OLED ដែលមានគុណភាពខ្ពស់និងតម្លៃថ្លៃជាង LCD។ ពិសេសបំផុតនោះទំហំអេក្រង់ធំដល់ ៦ អ៊ីញ កម្រិត HD+ HDR 10 ខណៈ Mate 10 មានត្រឹម ៥.៨ អ៊ីញ កម្រិត QHD HDR 10 ប៉ុណ្ណោះ។ កម្រិតរូបភាពច្បាស់ឡើងកប់ដល់ 2160x1080 ភីកសែល ស្របពេលកម្រិតពន្លឺ (Brightness) ច្បាស់ខ្លាំងដោយសារស្តង់ដារ Mobile HDR 10។

៣.ប្រព័ន្ធ Software:

ដោយក្រុមហ៊ុន Huawei ប្រឹងរកដំណោះស្រាយក្នុងការបញ្ចូលផ្ទៃ EMUI របស់ខ្លួនឲ្យសាំនឹងការប្រើរបស់អតិថិជន ដូច្នោះបញ្ហាស្មុគស្មាញក៏នៅបន្តកើតមាន។ ថ្វីបើ Mate 10 Pro ដំណើរការលើប្រព័ន្ធប្រតិបត្តិមេ Android 8.0 Oreo ក្តី ប៉ុន្តែផ្ទៃ Interface កម្មវិធីទាំងមូល រាងពិបាកក្នុងការប្រើប្រាស់ ប្រសិនបើអ្នកមិនធ្លាប់ប្រើ Huawei ពីមុនមក។ សម្របនឹងផ្ទៃ EMUI ជំនាន់ 8.0 ផ្លាស់ប្ដូររបៀបប្រើមួយចំនួន ទាំងទម្រង់នៃម៉ឺនុយកម្មវិធី។

៤.ល្បឿនគណនាម៉ាស៊ីន:

ដោយបំពាក់នូវបន្ទះឈីបជំនាន់ក្រោយ Hisilicon Kirin 970 បន្សំបច្ចេកវិទ្យា AI កម្រិតខ្ពស់ ក៏ជួយលើកកម្លាំងម៉ាស៊ីនរបស់ 10 Pro ដំណើរការកាន់តែអស្ចារ្យ។ អម RAM 6GB បូក GPU ប្រភេទ Mali-G72 MP12 ជួយឲ្យម៉ាស៊ីនរត់លើហ្គេមមានក្រាហ្វិកធំ មិនទាក់ ហើយអាចបើកកម្មវិធីច្រើនដោយមិនព្រួយថាយឺតម៉ាស៊ីន។

ជំនួយបន្ថែមពី CPU ប្រភេទ Octa-Core ល្បឿន 4x2.4GHz + 4x1.8GHz ធានាធ្វើឲ្យអ្នកប្រើ មិនងាយរអ៊ូពីចំណុចអវិជ្ជមាននៃម៉ាស៊ីនឡើយ។ ផ្អែកតាម Geekbench និង Antutu នៃការវាស់ស្ទង់ពិន្ទុល្បឿនដំណើរការ Mate 10 Pro ឈរលើ Galaxy S8។

៥.កាមេរ៉ា:

Mate 10 Pro បំពាក់កាមេរ៉ាភ្លោះនៅខាងក្រោយ ដោយមួយគ្រាប់ជាប្រភេទ Colour Sensor ទំហំ 12MP មាន Aperture f/1.6 ប្រើមុខងារ OIS រីឯមួយគ្រាប់ទៀតជាប្រភេទ Monochrome Sensor ទំហំ 20MP មាន Aperture f/1.6។ ដោយបញ្ចូលនូវបច្ចេកវិទ្យាឆ្លាតវៃ AI កាមេរ៉ា Huawei នឹងផ្លាស់ប្តូរម៉ូដដោយស្វ័យប្រវត្តិ ឧបមាអ្នកថតរូបបែប Close-up ជាមួយនៃផ្កាណាមួយ ភ្លាមនោះវានឹងលោតចូល Macro Mode ឲ្យតែម្តង។

ប៉ុន្តែចំពោះមុខងារ Auto-Detection សង្កេតឃើញធ្វើការរាងយឺតបន្តិច ហើយបើធៀបទៅម៉ូដែលចាស់ P10 និង P10 Plus យើងអាចនឹកដល់ម៉ូដែលមុនជាង ប៉ុន្តែវាគ្រាន់ជាចំណុចអវិជ្ជមានតូចមួយប៉ុណ្ណោះ បើក្រឡេកទៅទិដ្ឋភាពរូបបែប Low-light ម៉ូដែល 10 Pro ធ្វើបានកាន់តែវិសេសវិសាល ជួយកាត់បន្ថយគ្រាប់ Noise ឲ្យនៅតិច ល្មមយើងពេញចិត្តនឹងយកទៅបង្ហោះក្នុងបណ្តាញសង្គម។

ចំណែកឯការថតវីដេអូនៅទីតាំងមានពន្លឺគ្រប់គ្រាន់អាចទទួលយកបាន ប៉ុន្តែនៅទីតាំងខ្សោយពន្លឺ ភាពទប់លំនឹងនៃម៉ូដែល Pro ហាក់ធ្វើមិនទាន់ល្អគ្រប់ ១០ នោះឡើយ។

ខាងក្រោមជារូបភាពដែលផ្តិតចេញពី Mate 10 Pro:

៦.ថាមពលថ្ម:

ប្រើនូវថ្មមិនអាចដោះបានប្រភេទ Li-Po ទំហំ 4,000mAh លើកឈ្មោះឲ្យ Pro មិនងាយមានគូប្រជែងដទៃបំបាក់វាបាន។ ផ្អែកតាមការសាកល្បងប្រើប្រាស់ពីក្រុមការងារ TrustedReviews បានឲ្យដឹងថារូបគេ អាចកាន់ប្រើ 10 Pro ដែលមានថ្មមួយពេញ ក្នុងរយៈពេល ១ ថ្ងៃកន្លះទៅ ២ ថ្ងៃ ខណៈជាទូទៅផ្ដោតលើការលេងបណ្ដាញសង្គម WhatsApp, ប្រើប្រាស់សម្រាប់ Call ចេញចូល, បើកឆែក Email ជាប្រចាំ, លេងហ្គេមជាង ១ ម៉ោងកន្លះ និងម៉ោងភាពយន្តលើ Netflix ចប់មួយរឿងមុនពេលចូលដំណេក។

សរុបរួម:

ប្រសិនបើអ្នកមានថវិកាក្បែរ ១ ពាន់ដុល្លារ ហើយចង់កាន់ប្រើស្មាតហ្វូនជំនាន់ក្រោយ ដោយមិនពេញចិត្ត Note 8 ឬ iPhone X អ្នកអាចលៃលកជាមួយ Mate 10 Pro បាន។ ចំណុចរសើប ៣ របស់ត្រកូល 10 ឆ្នាំ ២០១៧ នេះរួមមានអង្គគណនាម៉ាស៊ីន, ការរចនាតួខ្លួន, កម្លាំងថ្មខ្លាំង បើលើកចំណុចខ្លាំងល្មមមានកាមេរ៉ានិងកម្រិតអេក្រង់ ប៉ុន្តែបើនិយាយពីចំណុចខ្សោយពិតណាស់ដែលប្រព័ន្ធ Software របស់វា អាចមិនទាក់ភ្នែកដូចគូប្រជែងដទៃឡើយ។