រូបពីរសន្លឹក ស្រស់ស្អាតដូចគ្នា តែវាសនាខុសគ្នា

2017-12-25 02:25:46
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបភាព Wallpaper ឈ្មោះថា "Bliss” នៅលើ Windows XP ត្រូវបានគេចាត់ទុកថាជារូបភាពមានមនុស្សមើលច្រើនបំផុត។ ស្របពេលដែល Microsoft បង់ជាង ១០០ ០០០ ដុល្លារ ទៅឲ្យម្ចាស់រូបថតនេះ ដើម្បីយកមកប្រើប្រាស់ អ្នកថតរូបម្នាក់ទៀតដែលជាម្ចាស់រូបភាព Wallpaper ឈ្មោះថា "Autumn” ទទួលបានត្រឹមតែ ៤៥ ដុល្លារប៉ុណ្ណោះ។

Wallpaper ឈ្មោះ Bliss

Charles O’Rear ជាអ្នកថតរូបសញ្ជាតិអាមេរិកដែលល្បីឈ្មោះតាមរយៈការថតរូប "Bliss” ពេលបើកបរកាត់តំបន់ Napa និង Sonoma ក្នុងរដ្ឋ California ឆ្នាំ ១៩៩៦។ បន្ទាប់ពីដាក់រូបភាពទៅឲ្យភ្នាក់ងាររូបភាព Westlight ភ្នាក់ងារនេះក៏ត្រូវលោក Bill Gates ទិញយកនៅឆ្នាំ ១៩៩៨។

ក្រោយមកទៀត Microsoft ក៏បានជ្រើសយករូបភាពរបស់លោក Charles ដែលស្ថិតក្នុងចំណោមរូបភាពរាប់ពាន់សន្លឹក មកប្រើជា Wallpaper ប្រចាំត្រកូល Windows XP ដោយក្រុមហ៊ុនបានបង់ថ្លៃមហាសាលដល់ Charles ក្នុងរង្វង់ទឹកប្រាក់ដែលគេដឹងថាលើសពី ១០០ ០០០ ដុល្លារ។

Wallpaper ឈ្មោះ Autumn

ដោយឡែក Peter Burianអ្នកថតរូបនៅពីក្រោយរូប Wallpaper ល្បីមួយទៀតឈ្មោះថា "Autumn” ទទួលបានទឹកប្រាក់តិចស្ទើរតែមែនទែន បើធៀបនឹងរូបភាព "Bliss”។ Peter បានដាក់រូបភាពរបស់ខ្លួនទៅឲ្យភ្នាក់ងាររូបភាពរបស់លោក Bill Gates ដោយមិនគិតកម្រៃនោះទេ ប៉ុន្តែគាត់ទទួលបានកម្រៃស្តង់ដារមួយដែលក្រុមហ៊ុនបានកំណត់ ពោលត្រឹមតែ ៤៥ ដុល្លារប៉ុណ្ណោះ។

នេះជាការបង្ហាញពីជោគវាសនាពីរផ្សេងគ្នានៃរូបភាពពីរសន្លឹក។ រូបភាពមួយជួយឲ្យម្ចាស់រូបភាពទទួលបានកម្រៃជាច្រើន និងទទួលបានកេរ្តិ៍ឈ្មោះល្បីរន្ទឺទៀតផង។ ឯរូបភាពមួយសន្លឹកទៀតត្រឹមតែឲ្យម្ចាស់រូបភាពទទួលបានបាយមួយពេលប៉ុណ្ណោះ៕

ប្រភព៖ petapixel ប្រែសម្រួល៖ សុខហេង