មកមើលការផលិតឥដ្ឋការ៉ូខ្មែរ ប្រវត្តិប្រមាណជា ១០០ឆ្នាំ នៅខេត្តសៀមរាប

2017-12-30 08:05:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ឥដ្ឋការ៉ូខ្មែរ ដែលស្ទើរតែបាត់បង់ ឥឡូវកំពុងពេញនិយម ឬមានទីផ្សារខ្ពស់ នៅតាមហាងបរទេស ផ្ទះសំណាក់ សណ្ឋាគារ នៅខេត្តសៀមរាប ព្រោះតែមនុស្សភាគច្រើនបានចាប់អារម្មណ៍រចនាបថបែបបុរាណទៅវិញ។ ដូច្នេះថ្ងៃនេះ ក្រុមការងារផ្លូវទៅស្រុកវគ្គ២ នឹងបង្ហាញរូបភាពខ្លះៗ នៃការផលិតឥដ្ឋការ៉ូ ដែលកំពុងល្បីល្បាញមួយកន្លែង នៅខេត្តសៀមរាប។

សូមទស្សនារូបភាពខាងក្រោមនេះ៖

១- លោក ចាន់ សេងគង់ អាយុ២៦ឆ្នាំ ជាម្ចាស់សិប្បកម្មផលិតឥដ្ឋការ៉ូខ្មែរ នៅក្រុងសៀមរាប ខេត្តសៀមរាប។ ឥដ្ឋការ៉ូខ្មែរមានវត្តមាននៅកម្ពុជាតាំងពីសម័យអាណានិគមនិយមបារាំងមកម្ល៉េះ។ នៅក្នុងដៃលោក ចាន់ សេងគង់ ខាងស្ដាំគឺឥដ្ឋការ៉ូខ្មែរដែលទើបផលិតថ្មី និងខាងឆ្វេងជាឥដ្ឋការ៉ូខ្មែរដ៏ចំណាស់ មានអាយុកាលប្រមាណជា ១០០ឆ្នាំឯណោះ។

២- កម្មករនៅក្នុងសិប្បកម្មរបស់លោក ចាន់ សេងគង់ កំពុងចាក់ទឹកថ្នាំពណ៌ចូលទៅក្នុងពុម្ពឥដ្ឋការ៉ូ។ រូបមន្តលាយទឹកថ្នាំពណ៌នេះ ត្រូវបានរក្សាទុកជាសម្ងាត់។

៣- បន្ទាប់ពីចាក់ទឹកថ្នាំពណ៌ទៅក្នុងពុម្ពហើយ កម្មកររោយម្សៅស៊ីម៉ង់ទៅក្នុងពុម្ពឥដ្ឋការ៉ូមួយជាន់ទៀត រួចទើបសង្កត់ឱ្យហាប់ណែន។ របៀបផលិតឥដ្ឋការ៉ូដោយដៃនេះ ត្រូវបានលោក ចាន់ សេងគង់ រក្សាឲ្យនៅដដែល តាំងពីពេលសិប្បកម្មរបស់លោកចាប់កំណើតនៅឆ្នាំ១៩៩២ ដែលកាលណោះ ឪពុកលោកគឺជាស្ថាបនិក។

៤- កម្មករកំពុងតែរៀបឥដ្ឋការ៉ូដែលផលិតបានជាជួរ នៅក្នុងរោងសិប្បកម្មរបស់លោក ចាន់ សេងគង់។ គេត្រូវកាន់ឥដ្ឋការ៉ូដែលទើបផលិតបានភ្លាមដោយប្រុងប្រយ័ត្ន ព្រោះនៅពេលដែលមិនទាន់រឹងស្រួលបួល ឥដ្ឋការ៉ូនេះងាយនឹងបែកបាក់ណាស់។

៥- ជាងកំបោរកំពុងរៀបឥដ្ឋការ៉ូ នៅក្នុងសណ្ឋាគារសង់ថ្មីមួយក្នុងក្រុងសៀមរាប។ គេចូលចិត្តប្រើឥដ្ឋការ៉ូនេះ ព្រោះវារឹងមាំល្អ កាន់ប្រើជូត កាន់តែរលោង កាន់ភ្លឺស្អាត និងស្ថិតស្ថេរបានយូរ៕

អត្ថបទ៖ ក្រុមការងារផ្លូវទៅស្រុក