ជួបប្រធាន UFC មានការរំពឹងថា Floyd Mayweather នឹងលុកចូលក្នុងពិភព MMA វិញម្ដង

2017-12-29 11:11:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះ មានការរំពឹងទុកថា អ្នកប្រដាល់ដែលបានចូលនិវត្តន៍ទៅហើយជាមួយប្រវត្តិមិនដែលចាញ់ គឺ Floyd Mayweather នោះ នឹងត្រូវវិលមកវិញ ហើយលូកដៃចូលកីឡាប្រយុទ្ធប្រភេទមួយផ្សេងទៀត ដណ្ដើមយកកិត្តិនាមកីឡាករ Conor McGregor ក្នុង MMA។

ការរំពឹងទុកដូច្នេះ ដោយសារកន្លងមក Conor McGregor បានប្រថុយខ្លួនមកសាកកណ្ដាប់ដៃក្នុងកីឡាប្រដាល់ ក្នុងពេលខ្លួនឯងគឺជាកីឡាករប្រដាល់ក្នុងទ្រុង ដែលទីបំផុតក៏បានបរាជ័យក្រោមកណ្ដាប់ដៃ Mayweather។ ដូច្នេះហើយ ការរំពឹងទុកនេះ គឺចង់ឃើញ អ្នកប្រដាល់មិនដែលចាញ់របស់អាមេរិក ចូលទៅក្នុងទ្រុង MMA វិញម្ដង តើលទ្ធផលយ៉ាងណា។

ទោះយ៉ាងនេះក្ដី ចំពោះបញ្ហានេះ ប្រធាន UFC លោក Dana White លើកឡើងថា លោកពិតជាបានជួបពិភាក្សាជាមួយភ្នាក់របស់ Floyd ព្រោះលោកចង់លុកលុយចូលកីឡាប្រដាល់។ដោយឡែកចំពោះព័ត៌មានពីការរំពឹងថា Mayweather នឹងលុកចូលពិភព MMA នោះ បានធ្វើឲ្យលោកផ្ទុះសំណើច។

បើទោះ Mayweather មានប្រវត្តិដ៏អស្ចារ្យក្នុងកីឡាប្រដាល់ ប៉ុន្តែលោក White លើកឡើងថា៖ "គេនឹងមិនរស់ទេ ហើយចំណុចនេះ Floyd ក៏ដឹងខ្លួនឯងដែរ"។

ប្រធាន UFC ដដែលបន្តថា "បើពិតមែន វានឹងក្លាយជាកិច្ចព្រមព្រៀងដ៏ធំមួយ ហើយ Floyd នឹងរកប្រាក់បានយ៉ាងច្រើន ប៉ុន្តែខ្ញុំមិនគិតថា Floyd នឹងចូលប្រយុទ្ធក្នុងកីឡានោះទេ"។

ក្នុងដំណើររុលចូលទៅពិភពកីឡាប្រដាល់ Dana White ប្រាប់ថា ២ខែខាងមុខលោកនឹងជួបគ្រប់គ្នាក្នុងកីឡានេះ ក្នុងនោះ ក៏ជួបក្រុម Floyd ដែរ។

ជំនួសឲ្យការនិយាយពាក់ព័ន្ធការប្រកួតរបស់ Floyd ទៀត បុរសវ័យ៤៨ឆ្នាំ ថា លោកចង់ផ្សព្វផ្សាយពីកីឡាប្រដាល់ និងចង់ក្លាយជាផ្នែកមួយសម្រាប់ការរៀបចំការប្រកួតរបស់ជើងឯកទម្ងន់ធ្ងន់ Anthony Joshua នាពេលខាងមុខ៕

អត្ថបទ៖ ទារិកា