គីម ជុងអ៊ុន និយាយថា ប៊ូតុងនុយក្លេអ៊ែរតែងតែនៅលើតុរបស់គាត់

2018-01-01 05:09:51
ចំនួនមតិ 0 | ចំនួនចែករំលែក 0

ចន្លោះមិនឃើញ

មេដឹកនាំកូរ៉េខាងជើង លោក គីម ជុងអ៊ុន បានព្រមានសហរដ្ឋអាមេរិកថា ប៊ូតុងនុយក្លេអ៊ែរតែងតែនៅលើតុរបស់គាត់។ នេះបើយោងតាមសេចក្ដីរាយការណ៍របស់ CNN ឲ្យដឹងនៅព្រឹកថ្ងៃទី ០១ មករា ឆ្នាំ ២០១៨នេះ។

«ដីគោកទាំងមូលរបស់អាមេរិកស្ថិតនៅក្នុងជួរអាវុធនុយក្លេអ៊ែររបស់យើង ហើយប៊ូតុងនុយក្លេអ៊ែរតែងតែនៅលើតុនៃការិយាល័យរបស់ខ្ញុំ។ ពួកគេគួរតែដឹងច្បាស់ថា នេះមិនមែនជាការគំរាមកំហែងមួយទេ ប៉ុន្ដែ ជាការពិត»។ លោក គីម និយាយបែបនេះ នៅអំឡុងពេលពិធីបុណ្យចូលឆ្នាំថ្មី។

លោក គីម ជុងអ៊ុន ក៏បាននិយាយដែរថា ប្រទេសរបស់លោកគឺជាប្រទេសនុយក្លេអ៊ែរប្រកបដោយការទទួលខុសត្រូវ ដែលស្រឡាញ់សន្ដិភាព ហើយថា «ដរាបណាមិនមានការឈ្លានពានទេនោះ យើងមិនមានបំណងប្រើប្រាស់ថាមពលនុយក្លេអ៊ែរទេ»។

បន្ថែមលើនេះ លោក គីម បានជំរុញឲ្យប្រទេសរបស់លោក ពន្លឿនការផលិតក្បាលនុយក្លេអ៊ែរ និង មីសីលផ្លោង។

«ចំពោះផ្នែកស្រាវជ្រាវអាវុធនុយក្លេអ៊ែរ និងវិស្វកម្មរ៉ុកកែត យើងត្រូវបង្កើនល្បឿនការផលិតក្បាលនុយក្លេអ៊ែរដ៏ច្រើន ដែលកម្លាំងនិងភាពជឿជាក់របស់វាត្រូវបានធានារួចហើយ និងមីស៊ីលផ្លោង»។

ទោះយ៉ាងណាក៏ដោយ លោក Euan Graham ប្រធានកម្មវិធីសន្តិសុខអន្តរជាតិ នៅវិទ្យាស្ថាន Lowy សម្រាប់គោលនយោបាយអន្តរជាតិនៅក្នុងក្រុងស៊ីដនី បានប្រាប់ទូរទស្សន៍ CNN ថា ការអត្ថាធិប្បាយរបស់លោកគីម អំពីប៊ូតុងនុយក្លេអ៊ែរ «មានប្រសិទ្ធិភាព គ្រាន់តែជាសំឡេងរំខាន»។

«វាមិនមែនអ្វីដែលយើងមិនធ្លាប់ឮពីមុនមកទេ វាគ្រាន់តែជាមធ្យោបាយរបស់លោក គីម ក្នុងការធានាគ្រប់គ្នាថា គាត់គឺជាអ្នកដែលមានអំណាច និង គ្រប់គ្រង។ វាស្ទើរតែដូចជាការប្រកាសជ័យជម្នះ ហើយពួកគេព្យាយាមផ្ញើសារទៅសហរដ្ឋអាមេរិកថាពួកគេទទួលបានអ្វីដែលពួកគេត្រូវធ្វើ ដើម្បីរារាំងពួកគេ។ ពួកគេមានដំណើរការ ICBM ដែលមានមុខងារ ដែលអាចមិនមានភាពត្រឹមត្រូវ ខាងបច្ចេកទេស ប៉ុន្តែផ្ទុយទៅវិញនោះជាវិធីរបស់លោក គីម ដែលគាត់កំពុងព្យាយាមបង្កើលវានៅដំណាក់កាលនេះ»។ លោក Graham និយាយ៕

ប្រភព៖ CNN ប្រែសម្រួល៖ ប៊ិន ប៊ុណ្ណា