ខេត្តទាំង៣ សប្បាយជាងគេបំផុតនៅថ្ងៃឆ្លងឆ្នាំ មនុស្សសម្រុកទៅលេងរាប់ម៉ឺននាក់

2018-01-02 03:09:38
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃឆ្លងឆ្នាំកន្លងទៅនេះ ខេត្តចំនួន៣ក្នុងប្រទេសកម្ពុជា មានភ្ញៀវទេសចរជាតិ និងអន្តរជាតិសម្រុកទៅលេងច្រើនជាងគេបំផុត ក្រៅពីរាជធានីភ្នំពេញ។ ដូច្នេះសូមទៅដឹងព័ត៌មានលម្អិតដូចខាងក្រោមនេះ៖

១. ខេត្តសៀមរាប

ភ្ញៀវទេសចរជាតិ និងអន្តរជាតិ ប្រមាណជា ២០ម៉ឺននាក់ បានទៅកម្សាន្តសប្បាយនៅខេត្តសៀមរាប នៅក្នុងពិធីឆ្លងឆ្នាំសកល ឆ្នាំ២០១៨។ នេះបើតាមការថ្លែងឲ្យដឹងពីឯកឧត្ដម ឃឹម ប៊ុនសុង អភិបាលខេត្តសៀមរាប។

អភិបាលខេត្តបានបញ្ជាក់ថា គោលដៅសំខាន់ដែលភ្ញៀវទៅទស្សនា និងកម្សាន្តសប្បាយ គឺតំបន់ Pub Street ផ្សារចាស់ បន្ទាប់មកគឺតំបន់អង្គរឃ្យុងយូ និងតំបន់សួនច្បារព្រះរាជដំណាក់។

២. ខេត្តព្រះសីហនុ

របាយការណ៍បណ្តោះអាសន្នរបស់ប្រធានមន្ទីរទេសចរណ៍ ខេត្តព្រះសីហនុ បង្ហាញថា អ្នកទេសចរជាតិ និងទេសចរបរទេស ប្រមាណជាង ២០ម៉ឺននាក់ បានចូលរួមបុណ្យឆ្លងឆ្នាំសកល នាយប់ថ្ងៃទី៣១ ខែធ្នូ ឆ្នាំ២០១៧ នៅឆ្នេរសមុទ្រខេត្តព្រះសីហនុ។

លោក តាំង សុចិត្រគ្រឹស្នា ប្រធានមន្ទីរទេសចរណ៍ ខេត្តព្រះសីហនុ បានឲ្យដឹងថា ចំនួនអ្នកទេសចរ មកលេងសមុទ្រ នៅខេត្តព្រះសីហនុ កាន់តែកើនឡើងបន្ថែមទៀត នៅថ្ងៃទី១ ខែមករា ឆ្នាំ២០១៨ នេះ ដែលជាថ្ងៃឈប់ សម្រាកចូលឆ្នាំសកល។

អ្នកទេសចរទាំងជាតិ និងអន្តរជាតិ មកលេងកំសាន្តនៅតាមឆ្នេរសមុទ្រ ក្នុងខេត្តព្រះសីហនុ នៅតាមកោះ និងតំបន់រមណីយដ្ឋានធម្មជាតិមួយចំនួនទៀត។

យ៉ាងណាក្ដី គេសង្កេតឃើញថា តម្លៃឈ្នួលកន្លែងអង្គុយតាមឆ្នេរសមុទ្រ និងម្ហូបអាហារ ពិសេសអាហារសមុទ្រ ដូចជា ក្តាម បង្គា មឹក ជាដើម បានឡើងថ្លៃ ដូចរៀងរាល់ពេលមានបុណ្យទានម្តងៗ។

៣. ខេត្តកំពត

នៅក្នុងថ្ងៃនៃពិធីឆ្លងឆ្នាំសកល ឆ្នាំ២០១៨ ខេត្តកំពត បានទទួលភ្ញៀវទេសចរមកកម្សាន្ត និងស្នាក់នៅ ប្រមាណជិត ៨ម៉ឺននាក់ ដែលមានការកើនឡើង ៤,០២% បើប្រៀបធៀបនឹងរយៈពេលដូចគ្នាកាលពីឆ្នាំ២០១៦។ នេះបើតាមការឲ្យដឹងពីលោក សយ ស៊ីណុល ប្រធានមន្ទីរទេសចរណ៍ខេត្តកំពត។

ដោយសារបរិមាណភ្ញៀវទេសចរមានកំណើនច្រើន បានធ្វើឱ្យគ្រប់សណ្ឋាគារ ផ្ទះសំណាក់ និងបឹងហ្កាឡូក្នុងយប់ថ្ងៃទី៣០ និងថ្ងៃទី៣១ ខែធ្នូ ឆ្នាំ២០១៧ ពុំមានបន្ទប់ណាមួយនៅទំនេរឡើយ។ នេះជាជោគជ័យមួយសម្រាប់អាជ្ញាធរខេត្តកំពត ចំពោះការកើនឡើងនូវភ្ញៀវ ទេសចរ និងបញ្ហាសុខសុវត្ថិភាពត្រូវដែលធានាបានមួយរយភាគរយ។