មកមើលសួនទឹកកូរ៉េខាងជើង ដែលមានតែពួកវរជនទេ ទើបមានលទ្ធភាពចូលលេង

2018-01-03 04:20:56
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបថតគួរឲ្យចាប់អារម្មណ៍ជាច្រើនសន្លឹក បានបង្ហាញឲ្យឃើញ ពួកវរជនកូរ៉េខាងជើង កំពុងរីករាយនឹងសួនទឹក Munsu Water Park ដែលពោរពេញទៅដោយឧបករណ៍លេងកម្សាន្តជាច្រើន។

ស្ថិតនៅលើទំហំដី ជិត១៥ហិចតា សួនទឹកមួយនេះត្រូវបានបញ្ជាដោយ លោក គីម ជុងអ៊ុន និងសាងសង់ឡើងដោយកងទ័ពរបស់លោកផ្ទាល់ នៅក្នុងរដ្ឋធានីព្យុងយ៉ាង។

ចំពោះតម្លៃសម្រាប់ការចូលលេងកម្សាន្តក្នុងសួនទឹកនេះ គឺប្រមាណជា ១០ដុល្លារ សម្រាប់រយៈពេល ៤ម៉ោង ខណៈប្រាក់ចំណូលជាមធ្យមរបស់ពលរដ្ឋកូរ៉េខាងជើង ត្រឹមតែប្រមាណ ៣២ដុល្លារប៉ុណ្ណោះក្នុងមួយអាទិត្យ។ ច្បាស់ណាស់ សួនទឹកនេះគឺសម្រាប់តែពួកវរជន ឬអ្នកមានទ្រព្យចូលលេងកម្សាន្តប៉ុណ្ណោះ។

យ៉ាងណាក៏ដោយ អ្នកទេសចរបានអះអាងថា វាជាកន្លែងដ៏ល្អបំផុតសម្រាប់ភ្ញៀវទេសចរ ក្នុងការនិយាយជាមួយអ្នកស្រុក។

អ្នកទេសចរអ៊ីស្រាអែល លោក Ariel Shalev អាយុ ៣២ឆ្នាំ បាននិយាយថា «សម្រាប់ខ្ញុំ សួនទឹកនៅទីក្រុងព្យុងយ៉ាង គឺជាកន្លែងល្អបំផុតសម្រាប់ប្រាស្រ័យទាក់ទង ជាមួយអ្នកស្រុក។ ខ្ញុំបាននិយាយលេងជាមួយសិស្សសាលា នៅក្នុងអាងទឹក ហើយវាគឺជាការនិយាយដ៏ពិតប្រាកដមួយ»។

ទោះជាយ៉ាងណា ភ្ញៀវទេសចរដែលទៅកម្សាន្តប្រទេសកូរ៉េខាងជើង មិនអាចធ្វើដំណើរដោយឯករាជ្យបានទេ ហើយត្រូវតែធ្វើដំណើរតាមមគ្គទេសក៍របស់ខ្លួនជានិច្ច។

គួរបញ្ជាក់ថា ទីក្រុងព្យុងយ៉ាង អះអាងថា សួនទឹក Munsu Water Park នេះ បានស្វាគមន៍ភ្ញៀវទេសចរ ៨៨០ ០០០នាក់ នៅក្នុងឆ្នាំដំបូងរបស់ខ្លួន ប៉ុន្តែរបាយការណ៍ថ្មីៗនេះ បានបង្ហាញថា វាទទួលភ្ញៀវត្រឹមតែ ១០០ ០០០នាក់ប៉ុណ្ណោះ នៅក្នុងឆមាសទី១ នៃឆ្នាំ២០១៦។

យ៉ាងណាមិញ ក្រៅពីសួនទឹក វាក៏មានហាងនំប៉័ង , ហាងកាហ្វេ , ហាងលក់អាហារ Fast Food , រោងចក្រស្រា និង ហាងធ្វើលក់ ផងដែរ៕