ទម្រាំជោគជ័យ ម្ចាស់ចម្ការទំពាំងបាយជូរ នៅបាណន់ រងការសើចចំអក មិនស្ទើរ

2018-01-04 10:39:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់ចម្ការទំពាំងបាយជូរ នៅបាត់ដំបង បង្ហើបឲ្យដឹងថា ទម្រាំជោគជ័យដល់សព្វថ្ងៃនេះ អ្នកជិតខាងជាច្រើនសើចចំអក ព្រោះតែគេយល់ថា ទំពាំងបាយជូរមិនអាចដាំដុះលើដីខ្មែរបាន ខណៈម្ចាស់ចម្ការរូបនេះ មិនមានបទពិសោធន៍ផងនោះ។ ផ្ទុយពីនេះ លោក ចាន់ ថៃឈឿន ម្ចាស់ចម្ការទំពាំងបាយជូរ បានខិតខំរៀនសូត្រ តាមរយៈសៀវភៅ ជាភាសាថៃ ជាច្រើនក្បាល ដើម្បីដឹងពីគន្លឹះដាំទំពាំងបាយជូរ និងវិធីស្រាទំពាំងបាយជូរ រហូតជម្នះការសើចចំអក ហើយឥឡូវស្រាទំពាំងបាយជូរបាណន់កំពុងល្បីល្បាញខ្លាំងនៅ ខេត្តបាត់ដំបង។

ខាងក្រោមនេះ គឺជារូបភាព ត្រួសៗ បង្ហាញពីសកម្មភាព និង ទេសភាពចម្ការ របស់លោក ចាន់ ថៃឈឿន៖

លោក ចាន់ ថៃឈឿង

1. លោក ចាន់ ថៃឈឿង អាយុ៥១ឆ្នាំ គឺជាម្ចាស់ចម្ការទំពាំងបាយជូរ នៅស្រុកបាណន់ និង ស្រុករតនមណ្ឌល ខេត្តបាត់ដំបង។ លោកចាប់ផ្តើមដាំទំពាំងបាយជូរជាលក្ខណៈចម្ការនៅឆ្នាំ ២០០០ នៅឯស្រុកបាណន់។ បច្ចុប្បន្នលោកកំពុងពង្រីកការដាំដុះទំពាំងបាយជូរ ១៣ហិកតាបន្ថែមទៀត លើផ្ទៃដីដាំដុះ ៥០ហិកតា នៅស្រុករតនមណ្ឌល ។

កម្មករកំពុងពិនិត្យ និង កាត់ខ្នែងចំហៀងដើមទំពាំងបាយជូរ នៅក្នុងចម្ការនាស្រុកបាណន់។ ដើម្បីឱ្យទំពាំងបាយជូរលូតលាស់ឡើងទ្រើងបានល្អ គេត្រូវកាត់ខ្នែងចំហៀងនេះចេញ។ ពេលដែលដើមទំពាំងបាយជូរ លូតលាស់បានល្អ និងមានកម្ពស់សមល្មមហើយ គេឈប់កាត់ខ្នែងចំហៀងនេះ និងទុកឱ្យទំពាំងបាយជូរចេញផ្កាផ្លែ។

កម្មករកំពុងជីកចង្អូរទឹក និង ដាក់ជីរនៅគល់ទំពាំងបាយជូរ ក្នុងចម្ការនាស្រុករតនមណ្ឌល។ ការដាក់ជីរធ្វើឡើង រៀងរាល់៣ខែម្តង ហើយការស្រោចទឹកធ្វើឡើងជារៀងរាល់ថ្ងៃ។ ដើមទំពាំងបាយជូរមួយដើម ត្រូវការទឹកពី ២ទៅ ៥លីត្រ ក្នុងមួយថ្ងៃ។

ចាប់តាំងពីដាំរហូតចេញផ្លែ ទំពាំងបាយជូរត្រូវការពេល យ៉ាងហោចណាស់១០ខែ។ កសិករអាចប្រមូលផលផ្លែទំពាំងបាយជូរទុំ នៅក្នុងខែទី ១៣ និង ម្តងទៀតនៅក្នុងខែទី ១៨។

ក្រោយប្រមូលផលរួច លោក ចាន់ ថៃឈឿង បានកែច្នៃផ្លែទំពាំងបាយជូរទាំងនោះជាស្រាទំពាំងបាយជូរ និង ទឹកទំពាំងបាយជូរ។ ស្រាទំពាំងបាយជូររបស់លោក មានប្រភេទតម្លៃ ១៥ដុល្លា ក្នុងមួយដប និង ២៥ដុល្លារក្នុងមួយដប។