លទ្ធផលមិនសូវល្អរបស់ Real Madrid នារដូវកាលនេះ ទម្លាក់មកលើ Marcelo?
- 2018-01-09 12:10:38
- ចំនួនមតិ 0 | ចំនួនចែករំលែក 0
លទ្ធផលមិនសូវល្អរបស់ Real Madrid នារដូវកាលនេះ ទម្លាក់មកលើ Marcelo?
ចន្លោះមិនឃើញ
បន្ទាប់ពីលេងស្មើជាមួយ Celta Vigo ក្នុងលទ្ធផល ២ទល់នឹង ២កាលពីម្សិលមិញ Real Madrid គិតមកទល់ពេលនេះមាន ១៦ពិន្ទុតិចជាង Barcelona ដែលកំពុងឈរនៅកំពូលតារាង La Liga។ ការរបូត ២ គ្រាប់នេះ មានន័យថា ក្លឹបយក្សអេស្ប៉ាញមួយនេះបានបណ្ដោយឲ្យក្រុមផ្សេងស៊ុតចូលចំនួន ១៦គ្រាប់ហើយក្នុងលីគ ប៉ុន្តែអ្វីដែលគួរឲ្យចាប់អារម្មណ៍នោះគឺថា គ្រាប់ទាំងនោះច្រើនធ្លាយពីខាង Marcelo។
ក្នុងការប្រកួតជាមួយ Celta Vigo ខ្សែការពារស្លាបឆ្វេង Marcelo បានបង្ហាញទម្រង់លេងមិនសូវល្អឡើយ ដោយ ២គ្រាប់ ដែល Real Madrid បានបណ្ដោយឲ្យរបូត ស៊ុតតែចេញពីតំបន់ឆ្វេងដែល កីឡាករប្រេស៊ីលរូបនេះ ទទួលភារៈការពារ។
អ្វីដែលគួរឲ្យចាប់អារម្មណ៍នោះត្រង់ថា នេះមិនមែនជាលើកដំបូងទេ ដែលគ្រាប់បាល់ធ្លាយចេញពីតំបន់ខាងឆ្វេង។ ក្នុងចំណោម ១៦គ្រាប់ដែលក្លឹបផ្សេងស៊ុតចូល Real Madrid ក្នុងលីគនារដូវកាលនេះ ក្នុងនោះប្រមាណជិត ៤០ភាគរយ (៦គ្រាប់) សុទ្ធតែធ្លាយពីខាង Marcelo ការពារ។
សូមបញ្ជាក់ផងដែរថា ក្លឹបអធិរាជពណ៌ស Real Madrid បានចាប់ផ្ដើមមិនសូវបានល្អប៉ុន្មានទេ នារដូវកាលនេះ ដោយបានចាញ់ និងស្មើជាច្រើនប្រកួត។ បច្ចុប្បន្នក្លឹបកំពុងឈរលេខ ៤ ក្នុងលីគ មាន ៣២ពិន្ទុ ខណៈ Barcelona ដែលកំពុងឈរលេខ ១ មាន ៤៨ពិន្ទុ៕