សម្រាប់អ្នកមានចំណូលទាប សង់ផ្ទះពីឥដ្ឋប្រភេទនេះជួយសន្សំថវិកាមិនតិចជាង២០ភាគរយ
- 2018-01-11 00:30:00
- ចំនួនមតិ 0 | ចំនួនចែករំលែក 0
សម្រាប់អ្នកមានចំណូលទាប សង់ផ្ទះពីឥដ្ឋប្រភេទនេះជួយសន្សំថវិកាមិនតិចជាង២០ភាគរយ
ចន្លោះមិនឃើញ
ជាទូទៅការសាងសង់សំណងផ្សេងៗ ភាគច្រើនគេប្រើប្រាស់ឥដ្ឋក្រហមដែលធ្វើពីដីឥដ្ឋ និងឆ្លងកាត់ការដុតកម្តៅដើម្បីឲ្យឥដ្ឋនោះឆ្អិន និងមានភាពរឹងមាំ។ ទន្ទឹមនឹងការស្គាល់ជាទូទៅពីសំណាក់ប្រជាពលរដ្ឋលើឥដ្ឋក្រហមនេះ បច្ចុប្បន្នក៏មានដែរឥដ្ឋប្រភេទផ្សេងទៀតហក់ចូលក្នុងទីផ្សារ។
ឥដ្ឋបរិស្ថាន ជាផលិតផលរបស់សហគ្រាសសង្គមមួយឈ្មោះថាផ្ទះតាមក្តីប្រាថ្នា ឬហៅជាភាសាអង់គ្លេសថាMy Dream Home។ ម្ចាស់សហគ្រាសអះអាងថាការប្រើប្រាស់ឥដ្ឋប្រភេទនេះធ្វើឲ្យម្ចាស់សំណង់ចំណេញទាំងថវិកា និងពេលវេលាសាងសង់។ ចំណេញ ដោយហេតុថាឥដ្ឋប្រភេទនេះត្រូវការប្រើស៊ីម៉ងត៍តិច និងរៀបបានលឿន។
សហស្ថាបនិកសហគ្រាសសង្គមផ្ទះតាមក្តីប្រាថ្នា លោក ហាវ គង់ងី មានប្រសាសន៍ថាសង់ផ្ទះដោយប្រើឥដ្ឋបរិស្ថានក្នុងតំហំ២០ម៉ែត្រការ៉េចំណាយស៊ីម៉ងត៍តែមួយបាវប៉ុណ្ណោះ ខណៈឥដ្ឋក្រហមត្រូវការចំណាយស៊ីម៉ងត៍ពីបួនទៅប្រាំបាវ។ ក្រៅពីនេះលោកថាការរៀបឥដ្ឋបរិស្ថាននេះក៏ងាយស្រួលដែរ ដោយថាអ្នកមិនមែនជាជាងសំណង់ក៏អាចរៀបបានដូចគ្នា។
លោកបន្ថែមថាៈ «ការសាងសង់វាមានភាពងាយស្រួល លើកបន្តុំៗ...វាមានង៉ាំជាប់គ្នា ធ្វើយ៉ាងណាឲ្យម្ចាស់លំនៅស្ថានហ្នឹងអាចសាងសង់ផ្ទះដោយខ្លួនឯងបាន...ដោយជួលជាងតែម្នាក់ឬពីរនាក់ដែលចេះច្បាស់លាស់អ៊ីចឹងយើងអាចសាងសង់ផ្ទះដោយខ្លួនឯងបាន»។
បើនិយាយពីពាក្យសហគ្រាសសង្គមនេះ លោក ហាវ គង់ងី បញ្ជាក់ថាគឺសំដៅលើការធ្វើអាជីវកម្មមួយដែលជួយប្រជាពលរដ្ឋឲ្យមានលំនៅដ្ឋានដោយខ្លួនឯង និងចំណាយថវិកាតិចក្នុងការសាងសង់។ ជាងនេះទៅទៀតគឺហសគ្រាសរបស់លោកមានបង្រៀនម្ចាស់ផ្ទះ ឬជាងសំណង់ដែលម្ចាស់ផ្ទះជួលឲ្យសាងសង់ចេះប្រើប្រាស់ឥដ្ឋបរិស្ថាននេះដោយមិនគិតថ្លៃ។ រយៈពេលរៀន លោកថាត្រឹមពីរម៉ោងគឺពលរដ្ឋ ឬជាងសំណង់នឹងយល់ពីលក្ខណៈពិសេស និងរបៀបរៀបឥដ្ឋនេះបាន។
បើនិយាយពីតម្លៃសាងសង់ផ្ទះវិញលោកលើកជាឧទាហរណ៍ថាផ្ទះដែលលោកសាងសង់លក់នៅឃុំបែកចាន ស្រុកអង្គស្នួល ខេត្តកណ្តាល ទំហំ៤ម៉ែត្រគុណ៨,៥ម៉ែត្រកំពស់ពីជាន់(E0&E1) គឺតម្លៃពី១៤ ៥០០ដុល្លារទៅដល់១៨ ០០០ដុល្លារខណៈដែលដីដែលលោកទិញសម្រាប់សាងសង់ផ្ទះនេះតម្លៃ១០០ដុល្លារក្នុងមួយម៉ែត្រការ៉េ។ បើប្រជាពលរដ្ឋសង់ដោយខ្លួនឯងលោកថានឹងចំណាយថវិកាកាន់តែតិចជាងនេះ។
លោករៀបរាប់បន្តថាៈ «អាទិភាពផ្ទះតាមក្តីប្រាថ្នាមិនមែនសាងសង់ទេ ថ្វីត្បិតមានការទទូចសុំ...យើងចង់បង្រៀនអតិថិជនឲ្យបានច្រើន យល់ច្បាស់ពីការសាងសង់ឥដ្ឋហ្នឹងដោយខ្លួនឯង គាត់កាត់បន្ថយការចំណាយបានច្រើនអាចថា៥០ភាគរយក៏អាចថាបានដែរ...យើងគិតមើលជួលគេសាងសង់គេគិតប្រាកល់ចំណេញយ៉ាងតិច២០ភាគរយនៃសំណង់មួយ»។
បើនិយាយពីលក្ខណៈពិសេសរបស់ឥដ្ឋបរិស្ថាននេះវិញ លោក ហាវ គង់ងី លើកឡើងថាឥដ្ឋនេះអាចទប់កម្តៅមិនឲ្យចូលក្នុងផ្ទះបានបីអង្សាទាបជាងឥដ្ឋធម្មតា។ ឧទាហរណ៍ថាបើផ្ទះប្រើឥដ្ឋធម្មតាមានសីតុណ្ហភាព៣០អង្សាចូលក្នុងផ្ទះ សម្រាប់ឥដ្ឋបរិស្ថានមានត្រឹម២៧អង្សាប៉ុណ្ណោះ។ ចំណុចពិសេសមួយទៀតគឺឥដ្ឋនេះមានរន្ធសម្រាប់ដាក់ខ្សែភ្លើង និងទុយយោទឹកនៅជាមូយឥដ្ឋជាស្រេច ដោយថាមិនចាំបាច់ចោះសំណង់នៅពេលដាក់ប្រព័ន្ធទឹក ឬភ្លើង។
គួរបញ្ជាក់ថាឥដ្ឋបរិស្ថាននេះផលិតឡើងដោយដីល្បាយខ្សាច់ លាយជាមួយស៊ីម៉ងត៍ និងទឹកថ្នាំម្យ៉ាងសម្រាប់ធ្វើឲ្យឥដ្ឋរឹងមាំ។ ឥដ្ឋនេះមិនត្រូវការដុតកម្តៅនោះទេ តែត្រូវការរក្សារទុកមួយថ្ងៃបន្ទាប់ពីចេញពីមាស៊ីនឲ្យរឹង មុននឹងយកទៅដាក់ក្រោមកម្តៅបន្តទៀត។
សហគ្រាសសង្គមមួយនេះត្រូវបានបង្កើតឡើងកាលពីឆ្នាំ២០១៥ ហើយក្នុងមួយថ្ងៃអាចផលិតឥដ្ឋបានប្រហែលជាមួយម៉ឺនដុំ។ សម្រាប់តម្លៃវិញគឺ៧,៥ដុល្លារក្នុង៥០ដុំដោយមិនគិតថ្លៃដឹកជញ្ជូន។ សម្រាប់ការដឹកជញ្ជូនទៅតាមបណ្តាខេត្តមានតម្លៃប្រែប្រួលទៅតាមរយៈចម្ងាយ ហើយតម្លៃនេះអាចឡើងដល់១២,៥ដុល្លារក្នុង៥០ដុំ៕