ក្រុមហ៊ុន​ស្រាវជ្រាវ​ Counterpoint Research បាន​ចេញ​ផ្សាយ​ការ​វិភាគ​របស់​ខ្លួន​​​​អំពី​​ទីផ្សារ​ស្មាតហ្វូន​ប្រទេស​ចិន​ ប្រចាំ​ឆ្នាំ​ ២០១៧ ដែល​មាន​បង្ហាញ​ព័ត៌មាន​គួរ​ចាប់​អារម្មណ៍​ខ្លះៗ។

ស្មាតហ្វូន​ដែល​លក់​ដាច់​ខ្លាំង​បំផុត​នៅ​ប្រទេស​ចិន​ បាន​ទៅ​លើ​ Oppo R9s ដែល​​ដណ្ដើម​ទីផ្សារ​បាន​ ៣% និង​​តំណែង​លេខ​ពីរ​បាន​ទៅ​លើ​ iPhone 7 Plus ដែល​មាន​ទីផ្សារ​ ២,៨% រួម​ជា​មួយ​ iPhone 7 ​មាន​ទីផ្សារ​ ២,៤% ជាប់​លេខ​ ៥។ iPhone 7/7 Plus ជា​ស្មាតហ្វូន​របស់​ក្រុមហ៊ុន​ក្រៅ​ស្រុក​តែ​មួយ​គត់​ដែល​មាន​ឈ្មោះ​ក្នុង​បញ្ជី។

ស្មាតហ្វូន​ដែល​ស្ថិត​នៅ​តំណែង​កំពូល​ទាំង​ ១០ ដទៃ​ទៀត​រួម​មាន​ vivo X9, Oppo A57, Oppo R11, vivo Y66, Honor 8 lite, Xiaomi Redmi Note 4X និង Honor Enjoy 6X។ ចំនួន​លក់​ជា​​មធ្យម​ ប្រចាំ​ខែ​របស់​ស្មាតហ្វូន​កំពូល​ទាំង​ ១០ គឺ​មាន​ចំនួន​ ១ លាន​គ្រឿង នៅ​ក្នុង​ឆ្នាំ​ ២០១៧។

ក្រុមហ៊ុន​ខាង​លើ​បាន​បញ្ជាក់​ថា​ Oppo ​ទទួល​បាន​ជោគជ័យ​តាម​រយៈ​ការ​ផ្សព្វផ្សាយ​លក់​ស្មាតហ្វូន​របស់​ខ្លួន​ជា​ស្មាតហ្វូន​ជំនាញ​ខាង​ថត​ Selfie រួម​ជា​មួយ​នឹង​ការ​បន្ថែម​បណ្ដាញ​លក់​របស់​ខ្លួន។ បន្ថែម​ពី​នេះ​ស្មាតហ្វូន​ Oppo ភាគ​ច្រើន​មាន​តម្លៃ​ចន្លោះ​ពី​ ២០០ ដុល្លារ​ ទៅ ៤៥០ ដុល្លារ​ ជា​តម្លៃ​ដ៏​ពេញ​និយម​មួយ​នៅ​ប្រទេស​ចិន។

ដោយ​ឡែក​ចំពោះ​ iPhone 7/7 Plus វិញ​ ទទួល​បាន​ការ​ចាប់​អារម្មណ៍​ពី​ប្រជាជន​ចិន​កាន់​តែ​ខ្លាំង​នៅ​ពេល​ដែល​ Apple បាន​ទម្លាក់​តម្លៃ​ស្មាតហ្វូន​នេះ​ ក្រោយ​ពី​បាន​បញ្ចេញ​ iPhone 8/8 Plus និង iPhone X ភ្លាម៕​

​​

ប្រភព៖ GSMarena   ប្រែ​សម្រួល៖ សុខហេង