សឹងមិនជឿ! ស្វាព្រៃលួចយកទូរសព្ទទៅ រួចនិយាយ Video Call ជាមួយម្ចាស់ទូរសព្ទវិញ

2018-01-16 03:02:46
ចំនួនមតិ 0 | ចំនួនចែករំលែក 0

ចន្លោះមិនឃើញ

យោងតាមបុរសជនជាតិថៃពីរនាក់ ដែលជាមិត្តភក្តិនឹងគ្នា បានអះអាងថា មានស្វាព្រៃមួយក្បាលដែលរត់ចេញពីតំបន់ Sam Muk Hill នៃខេត្ត Chonburi ប្រទេសថៃ បានលួចទូរសព្ទដៃរបស់ពួកគេមួយគ្រឿង ហើយបន្ទាប់មកបានឆ្លើយតបការហៅ Video Call តាមហ្វេសប៊ុក កាលពីថ្ងៃសុក្រសប្តាហ៍មុន។

នៅក្នុងហេតុការណ៍ដ៏មិនគួរឲ្យជឿ លោក Mongkol Wisulokanon អាយុ ២៥ឆ្នាំ បានអះអាងថា លោកកំពុងថតរូបជាមួយមិត្តភក្តិម្នាក់ទៀត ឈ្មោះ Met ស្រាប់តែពេលនោះមានស្វាមួយក្រុមដែលមានគ្នា ៥ក្បាល បានចុះមកលួចឥវ៉ាន់របស់ពួកគេក្នុងកន្ត្រកម៉ូតូ រួមទាំងទូរសព្ទរបស់លោក Met ផងដែរ។ ពួកគេ ព្យាយាមដេញតាមហ្វូងស្វាទាំងនោះដែរ ប៉ុន្តែមិនអាចចាប់ពួកវាបាននោះទេ។

លោក Mongkol បានសរសេរសារនៅលើបណ្តាញសង្គមហ្វេសប៊ុកថា "ខ្ញុំបានហៅទៅកាន់ទូរសព្ទរបស់ Met ព្រោះខ្ញុំគិតថា នៅពេលដែលទូរសព្ទញ័រ សត្វស្វានឹងបោះទូរសព្ទចោល។ ប៉ុន្តែ វាមិនដូច្នោះទេ វាកាន់តែរត់ទៅឆ្ងាយថែមទៀត។ ដូច្នេះ ខ្ញុំក៏បានធ្វើរឿងឆ្កួតមួយ គឺធ្វើការហៅ Video Call! ស្រាប់តែស្វានោះទទួលការហៅរបស់ខ្ញុំ។ បន្ទាប់មកវា ក៏បានចុចបិទ និងបានផ្ញើរសញ្ញាបក់ដៃ (Wave) ឲ្យខ្ញុំនៅលើហ្វេសប៊ុកទៀត"។

នៅទីបំផុត បុរសទាំងពីរនាក់មិនបានទទួលទូរសព្ទវិញទេ ប៉ុន្តែលោក Mongkol បានបញ្ចប់ការសរសេររបស់ខ្លួនថា "បើអ្នកហៅទៅកាន់ទូរសព្ទរបស់ Met ហើយមានអ្នកលើក នោះមិនមែនជាមនុស្សទេ វាជាសត្វស្វា។ ហាហា។"

ជាចុងក្រោយ លោក Mongkol បានផ្ដាំផ្ញើមនុស្សទាំងអស់ដែលទៅលេងតំបន់នោះ ឲ្យមានការប្រុងប្រយ័ត្នខ្ពស់ចំពោះការទុកដាក់របស់ ហើយត្រូវចាំថា អ្វីដែលលឿនជាងចោរទៅទៀតនោះ គឺសត្វស្វានេះឯង៕