១០ ឆ្នាំមុន Steve Jobs ធ្វើរឿងមួយ ផ្លាស់ប្ដូរអនាគត Laptop

2018-01-16 03:47:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃទី ១៥ ខែមករា ម្សិលមិញនេះជាខួបគម្រប់ ១០ ឆ្នាំនៃការប្រកាសចេញ MacBook Air របស់លោក Steve Jobs ក្នុងកម្មវិធី Macworld របស់ Apple នាឆ្នាំ ២០០៨។

លោក Steve បានបង្ហាញពី MacBook Air ដោយហូតយកវាចេញពីសាមីមួយ ធ្វើឲ្យមហាជនភ្ញាក់ផ្អើលនឹងរូបរាងតូច និងកម្រាស់ដ៏ស្ដើងរបស់វា។ នៅពេលនោះលោក Steve បានហៅ MacBook Air ថាជាកុំព្យូទ័រមានកម្រាស់ស្ដើងជាងគេក្នុងលោក។ ការបង្ហាញចេញ MacBook Air នេះជាសញ្ញាបង្ហាញអំពីការចាប់ផ្ដើមនៃយុគសម័យថ្មីរបស់កុំព្យូទ័រយួរដៃ និងបានផ្លាស់ប្ដូរអនាគតរបស់កុំព្យូទ័រយួរដៃទៀតផង។

នៅពេលនោះ (ឆ្នាំ ២០០៨) ក្រុមហ៊ុនគូប្រជែងដទៃក៏មានកុំព្យូទ័រកម្រាស់ស្ដើង និងស្រាលដែរ ប៉ុន្តែភាគច្រើនមានកម្រាស់ដល់ ១ អ៊ីញ (២,៥ ស.ម), ទម្ងន់ជាង ១ គីឡូ និងមានអេក្រង់ ៨ ឬ ១១ អ៊ីញ។ កុំព្យូទ័រទាំងនោះភាគច្រើនមិនមានក្ដារចុចពេញលេញនោះទេ ប៉ុន្តែ Apple អាចផលិតបាន MacBook Air មានរាងជ្រុង ដែលសូម្បីតែផ្នែកក្រាស់បំផុតរបស់វា ក៏ស្ដើងជាងផ្នែកស្ដើងបំផុតរបស់ Sony TZ Series (កុំព្យូទ័រដែលមានកម្រាស់ស្ដើងបំផុតមួយនៅឆ្នាំ ២០០៨) ដែរ។

Apple បានដកចេញ CD Drive និងរន្ធតភ្ជាប់មួយចំនួនលើ MacBook Air ដ៏ស្ដើង ហើយក្រុមហ៊ុនបានបង្ហាញពី Multi-Touch Trackpad និងអង្គផ្ទុកទិន្នន័យប្រភេទ SSD ផងដែរ។ វាមានរូបរាងតូចមែន ប៉ុន្តែចំពោះជម្រើសថោកបំផុតក៏មានតម្លៃដល់ ១ ៧៩៩ ដុល្លារដែរ ជាតម្លៃដ៏ខ្ពស់មួយ។

ក្រុមហ៊ុនផលិតកុំព្យូទ័រដទៃប្រើពេលរាប់ឆ្នាំដើម្បីអាចតាមទាន់ MacBook Air របស់ Apple។ ប៉ុន្តែកាលពី ២-៣ ឆ្នាំមុនគូប្រជែងមួយចំនួនអាចនាំមុខ Apple ផលិតបានកុំព្យូទ័រដែលមានរចនាបថស្អាត, សមត្ថភាពខ្លាំង, អេក្រង់ច្បាស់ និងមាន Trackpad ទៀតផង។ មកទល់ពេលនេះ Apple នៅតែលក់ MacBook Air ក្នុងតម្លៃចាប់ពី ៩៩៩ ដុល្លារ ដែលមានរចនាបថ និងលក្ខណៈសម្បត្តិហួសសម័យទៅហើយ បើប្រៀបនឹងគូប្រជែងបច្ចុប្បន្ននេះ។

អស់រយៈពេលជាច្រើនឆ្នាំ Apple នៅតែមិនផ្លាស់ប្ដូររចនាបថរបស់ MacBook Air ទោះបីត្រូវប្រជែងនឹង Surface Laptop និង Dell XPS 13 ក្ដី។ ផ្ទុយទៅវិញ Apple បានបញ្ចេញ MacBook អេក្រង់ទំហំ ១២ អ៊ីញ ប៉ុន្តែមិនទទួលបានការឆ្លើយតបល្អពីអតិថិជនដូចកាលជំនាន់ MacBook Air នោះទេ។ បញ្ជាក់ថា MacBook Air ទទួលបានការអាប់ដេតលក្ខណៈសម្បត្តិលើកចុងក្រោយបំផុតកាលពី ៣ ឆ្នាំកន្លងទៅ៕

ប្រភព៖ The Verge ប្រែសម្រួល៖ សុខហេង