គឹម វាសនា អាជីពប្រដាល់ធូរធារជាងពេលធ្វើការរោងចក្រ

2018-01-17 02:47:58
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងគុនខ្មែរ គឹម វាសនា ថា អាជីពជាអ្នកប្រដាល់នេះធ្វើឲ្យរូបគេមានជីវភាពធូរធារជាងមុន និងកែប្រែពីការដើរលេងអត់សូវមានប្រយោជន៍ទៅជាការហ្វឹកហាត់វិញ។

កីឡាករ គឹម វាសនា បានលេខ៣

គឹម វាសនា បានឲ្យដឹងថា មុនដំបូងរូបគេជាកម្មកររោងចក្រម្នាក់នៅម្ដុំផ្សារជម្ពូវ័នអំឡុងឆ្នាំ ២០០៧ -២០០៨ ដែលកាលនោះប្រាក់ខែបានត្រឹម ២០០ ទៅ ៣០០ ដុល្លារប៉ុណ្ណោះអាស្រ័យលើការថែមម៉ោង។ នាពេលធ្វើការនៅទីនោះ អ្នកប្រដាល់រូបនេះមានជីវភាពសូវជាធូរធារនោះឡើយ ហើយថែមទាំងចំណាយពេលអត់ប្រយោជន៍ច្រើនដូចជាដើរលេង និងផឹកស៊ីជាដើម។

កីឡាករ គឹម វាសនា(ខៀវ) ពេលចាញ់ អ៊ុំ វណ្ណេត

ដោយការស្រឡាញ់ចូលចិត្តវិស័យប្រដាល់តាំងពីតូចមកនោះប៉ុន្តែមិនមានឱកាស ជើងខ្លាំងរូបនេះក៏បានស្គាល់មិត្តភ័ក្ដិធ្វើការជាមួយជាអ្នកហាត់ ក៏ទាក់ទង់រហូតបានសុំគ្រូប្រដាល់ទ័ពពិសេសឆត្រយោង ៩១១ ហ្វឹកហាត់ដល់សព្វថ្ងៃនេះតែម្ដង។ អាជីពថ្មីនេះធ្វើឲ្យរូបគេកែប្រែបានច្រើន ប្រាក់ចំណូលកើនឡើងជាងពេលមុន ខែខ្លះលោតដល់ ៥០០ដុល្លារក៏មានដែរ ឲ្យតែបានប្រកួតជាមួយបរទេស និងឈប់ដើរលេង ថែមទាំងមានឈ្មោះទាហាន ទំនេរក៏អាចឆ្លៀតធ្វើការងារអ្វីផ្សេងបន្ថែមទៀតបាន។

ថ្ងៃបញ្ជប់ពានរង្វាន់ TV5

គឹម វាសនា ជាកីឡារកមកពីក្លឹបប្រដាល់ទ័ពពិសេសឆត្រយោង ៩១១ មកដល់ពេលនេះចូលប្រឡូកក្នុងវិស័យប្រដាល់ប្រហែល ៣-៤ឆ្នាំមកហើយ ថ្មីៗនេះទើបប្រកួតចប់ពានរង្វាន់ TV5 knock Out Series By Kcement ផងដែរ ដោយទទួលបានចំណាត់ថ្នាក់លេខ៣៕

អត្ថបទ៖ នួន ស៊ីណា