ថៃចង់ឲ្យពលរដ្ឋដែលកែសម្ផស្ស ទទួលអត្តសញ្ញាណប័ណ្ណថ្មី ព្រោះហេតុផលមួយ

  • 2018-01-17 07:11:35
  • ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋាភិបាល​ថៃ ចង់​ឲ្យ​ធនាគារ​សួរ​អតិថិជន​ដែល​ធ្លាប់​ទទួល​ការ​វះកាត់​កែសម្ផស្ស​ផ្ទៃ​មុខ ដើម្បី​ទទួល​បាន​អត្តសញ្ញាណប័ណ្ណ​ថ្មី ដែល​មាន​រូបថត​បច្ចុប្បន្ន​របស់​ពួកគេ​វិញ ដូច្នេះ​នឹង​មិន​មាន​ការ​ភ័ន្តច្រឡំ​នៅ​ពេល​ពួកគេ​ទៅ​ធនាគារ ឬ​ស្ថាប័ន​ផ្សេង​ទៀត ហើយ​ក៏​អាច​បង្ហាញ​ថា​ពួកគេ​ជា​នរណា​ប្រាកដ​ដែរ។

ជំនួស​មក​វិញ ពួកគេ​ក៏​អាច​ប្រើ​វិញ្ញាបនបត្រ​ពី​វេជ្ជបណ្ឌិត ដើម្បី​បញ្ជាក់​ថា​ពួកគេ​បាន​ធ្វើ​ការ​វះកាត់​លើ​ផ្ទៃ​មុខ ដើម្បី​ពន្យល់​ពី​មូលហេតុ​ដែល​ពួកគេ​មាន​មុខ​មាត់ មិន​ដូច​នៅ​ក្នុង​ប័ណ្ណ​សម្គាល់​ខ្លួន។

សេចក្ដី​បង្គាប់​នេះ​ចេញ​មក​ពី​ធនាគារ​ថៃ Bank of Thailand ហៅ​កាត់​ថា BOT។ នេះ​បើ​យោង​តាម​រាយការណ៍​ពី​កាសែត Thai PBS ។

នាយក​ធនាគារ​ថៃ លោក Yongsak Seanglaw បាន​ថ្លែង​កាល​ពី​ម្សិលមិញ​ថា ធនាគារ​ត្រូវ​ការ​ពង្រឹង​ប្រព័ន្ធ​ផ្ទៀងផ្ទាត់​របស់​ខ្លួន​បន្ថែម​ទៀត ដើម្បី​ផ្ទៀងផ្ទាត់​ថា​គណនី​ថ្មី​របស់​ធនាគារ នឹង​មិន​ត្រូវ​បាន​បើក​ដោយ​ឧក្រិដ្ឋជន ឬ​អ្នក​ផ្សេង​ឡើយ។ លោក​ក៏​បាន​កត់​សម្គាល់​ផង​ដែរ​ថា ទៅ​ថ្ងៃ​មុខ​ទៀត ធនាគារ​នឹង​ទទួល​ខុស​ត្រូវ​ចំពោះ​ការ​ខូចខាត ដែល​បាន​ប្រព្រឹត្ត​ទៅ​ទាំង​ផ្នែក​ព្រហ្មទណ្ឌ និង​ហិរញ្ញវត្ថុ ប្រសិន​បើ​គណនី​ក្លែងក្លាយ​ត្រូវ​បាន​បើក​ដំណើរការ និង​ប្រើប្រាស់។

ការ​ព្រមាន​របស់​ធនាគារ​ថៃ បាន​ធ្វើ​ឡើង​បន្ទាប់​ពី​ជនរងគ្រោះ​ម្នាក់​ឈ្មោះ Nicha Kiatthanapaibul អាយុ ២៤ ឆ្នាំ បាន​និយាយ​ថា​អត្តសញ្ញាណប័ណ្ណ​ដែល​នាង​បាត់ ត្រូវ​បាន​ប្រើប្រាស់​ដោយ​ក្រុម​ជន​បោកប្រាស់ ដើម្បី​បើក​គណនី​ធនាគារ​ចំនួន ៩ នៅ​ធនាគារ​ចំនួន ៧ កន្លែង​ផ្សេង​គ្នា ទុក​សម្រាប់​ទទួល​លុយ​ពី​ជនរងគ្រោះ​របស់​ពួកគេ។ នៅ​ពេល​នោះ នាង Nicha ត្រូវ​ប៉ូលិស​ឃាត់​ខ្លួន និង​ជាប់​គុក​អស់​រយៈពេល ៣ ​ថ្ងៃ។

យ៉ាងណាមិញ ដោយសារ​ការ​វះកាត់​កែសម្ផស្ស​មាន​ប្រជាប្រិយភាព​ខ្លាំង​នៅ​ប្រទេស​ថៃ ការ​ស្នើសុំ​របស់​រដ្ឋាភិបាល​ពិត​ជា​ត្រឹមត្រូវ និង​មាន​ន័យ។ ជនជាតិ​ថៃ​ជា​ច្រើន​បាន​ផ្លាស់ប្ដូរ​សម្ផស្ស​របស់​ពួកគេ តាម​រយៈ​ការ​កែ​ទម្រង់​មុខ , រូបរាង និង ពណ៌​សម្បុរ ជាដើម៕

ចុច​អាន៖

ប្រភព៖ Coconut   ប្រែ​សម្រួល៖ សេង ឡុង