ឪពុកកូនក្រីក្រ រស់លើឡានឈ្នួល ទីបំផុតទទួលប្រាក់បរិច្ចាគជាង ១លានបាត ដោយសារហេតុផលមួយ (មានវីដេអូ)

2018-01-18 03:04:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រជាជនជាច្រើននៅក្នុងប្រទេសថៃ បាននាំគ្នាបរិច្ចាគប្រាក់សរុបជាង ១,៣ លានបាត (៤១៥ ៧០០ដុល្លារ) ទៅដល់បុរសជាអ្នករត់ឡានឈ្នួល (Songthaew) និងកូនប្រុសអាយុ ១០ឆ្នាំម្នាក់ ក្រោយពីរឿងរ៉ាវដ៏កម្សត់នៃជីវិតរបស់ពួកគេ បានល្បីល្បាញពេញបណ្ដាញសង្គម កាលពីសប្ដាហ៍មុន។

អស់រយៈពេល ៤ខែ លោក Rungroj Thipparat អាយុ ៦២ ឆ្នាំ រួមជាមួយកូនប្រុសឈ្មោះ Kampanat ត្រូវគេងលើឡានឈ្នួលដែលជួលពីគេ , ងូតទឹកនៅហ្គារាស់សាំង និងបរិភោគអាហារដែលសល់ពីវត្ត។ ជារៀងរាល់ថ្ងៃ លោក Rungroj បានរត់ឡានឈ្នួលនៅតំបន់ Hat Yai ក្នុងខេត្ត Songkhla ដែលអាចរកចំណូលបានពី ២០០ ទៅ ៣០០បាត (៦-៩ដុល្លារ) ប៉ុន្តែលោកត្រូវបង់ថ្លៃជួលឡានឈ្នួល អស់ ៤ដុល្លារបាត់ទៅហើយក្នុងមួយថ្ងៃ។

ចំណែកឯកូនប្រុសរបស់លោក ជាសិស្សថ្នាក់ទី២ ត្រូវងើបពីព្រលឹម ដើរតាមព្រះសង្ឃបិណ្ឌបាត ដើម្បីទទួលបានអាហារខ្លះៗសម្រាប់បរិភោគ។ នៅពេលដែលអ្នកកាសែតសួរ ថាតើគេចង់បានអ្វីនៅថ្ងៃនៃទិវាកុមារ ក្មេងប្រុសរូបនេះ និយាយថាខ្លួនចង់បានរបស់ដែលក្មេងភាគច្រើនមាន នោះគឺ កង់មួយគ្រឿង និងសំលៀកបំពាក់ Superman។

លោក Rungroj បាននិយាយថា ប្រពន្ធរបស់លោកបានចាកចោលខ្លួន កាលពីកូនប្រុសមានអាយុ ៣ឆ្នាំ ហើយចាប់តាំងពីពេលនោះមក លោកមិនដែលបានទទួលដំណឹងអ្វីពីប្រពន្ធនោះទេ។ លោកបន្តថា លោកមានអារម្មណ៍សោកស្ដាយយ៉ាងខ្លាំង ដែលមិនអាចទិញរបស់របរក្មេងលេងឲ្យកូនបាន និងមានត្រឹមសំលៀកបំពាក់ ២-៣ កំផ្លេប៉ុណ្ណោះ។

កាលពីម្សិលមិញ មជ្ឈមណ្ឌលសិក្សាក្នុងខេត្ត បានធ្វើសន្និសីទកាសែតមួយ ដើម្បីបង្ហាញថាលោក Rungroj បានទទួលជំនួយជាង ១,៣ លានបាត (៤១៥ ៧០០ដុល្លារ) ទៅក្នុងគណនីធនាគាររបស់លោក បន្ទាប់ពីប្រព័ន្ធផ្សព្វផ្សាយក្នុងស្រុកមួយបានចុះផ្សាយរឿងរ៉ាវរបស់លោក។

លើសពីនេះទៀត ក៏មានសប្បុរសជនម្នាក់ បានទុកដីនៅសង្កាត់ Bangklam ទៅឲ្យឪពុកកូននេះ ដើម្បីឲ្យពួកគេអាចសាងសង់ផ្ទះរស់នៅផងដែរ។ ប៉ុន្តែ ឪពុក និងកូនខាងលើ ត្រូវបានគេរាយការណ៍ថា បានផ្លាស់ចូលទៅនៅផ្ទះជួលមួយកន្លែង នៅទីក្រុង Hat Yai ហើយមានអ្នកជំនួញម្នាក់ជាអ្នកទទួលបន្ទុកបង់ថ្លៃផ្ទះ។

ជាចុងក្រោយ លោក Rungroj បាននិយាយថា លោកនឹងយកលុយទៅប្រើប្រាស់សម្រាប់ការស្នាក់នៅ និងថ្លៃសិក្សារបស់កូនប្រុស Kampanat ដែលមានក្តីស្រមៃចង់ធ្វើជាប៉ូលិសនៅពេលគេធំឡើង៕