តើជាពេលត្រូវជម្រុះ BBC ចេញ ជំនួសវិញដោយ Neymar, Hazard និង Lewandowski?

2018-01-18 04:39:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ការផ្គុំចូលគ្នានៃវត្តមាន Gareth Bale, Karim Benzema និង Cristiano Ronaldoធ្វើឲ្យប្រធានក្លឹប Real Madrid លោក Florentino Perez ជឿថានឹងអាចជួយក្រុមលេចធ្លោត្រចះត្រចង់។

ពិតជាមិនខុសដូចការគិតគ្រាន់តែជើងខ្លាំងប្រយុទ្ធទាំង៣ជួបគ្នាពិតជាជួយក្រុមថ្កុំថ្កើងមែន ពោលឈ្នះពាន Champions League ដល់ទៅ៣ដងក្នុងរយៈពេល៤ឆ្នាំចុងក្រោយ។ ប៉ុន្តែសម្រាប់រដូវកាល២០១៧-១៨នេះវិញ ថាមពលប្រយុទ្ធនៃខ្លាកំណាចទាំង៣ហាក់ធ្លាក់ខ្លាំងមែនទែនសឹងមិនជឿ អ្វីដែលសំខាន់ពួកគេមិនទាន់បានលេងជុំគ្នាឡើយក្នុងរដូវកាលនេះ។

ដោយសារចំណុចអវិជ្ជមាននេះ កាសែតអេស្ប៉ាញ Marca បានចុះផ្សាយថា Real ដល់ពេលសម្លឹងមើលខ្សែប្រយុទ្ធថ្មី៣ខាងលើហើយ។ មិនមែនជារឿងចម្លែកឡើយចំពោះការនាំចូលកញ្ចុំផ្កាយក្នុងពេលតែមួយនៅ Madrid។ កាលពីលើកទីមួយក្លឹបរហស្សនាមស្ដេចសបាននាំចូល Luis Figo, Zinedine Zidane, Ronaldo និង David Beckham ក្នុងឆ្នាំជាប់ៗគ្នា មុនពេលទិញ Kaka, Cristiano Ronaldo និងBenzema ពេលតែមួយកាលពីឆ្នាំ២០០៩។

Neymar ជាគោលដៅធំបំផុតសម្រាប់លោក Perez ដើម្បីយកមកជំនួសតំណែងខាងឆ្វេងរបស់ Ronaldo។ Eden Hazard ក៏ជាបេក្ខភាពនាំមុខគេម្នាក់ ហើយក៏ជាកីឡាករដែល Zidane ចូលចិត្តខ្លាំងដែរ។ ចំពោះខ្សែប្រយុទ្ធចំតួ Real សម្លឹងឃើញ Robert Lewandowski ដើម្បីជំនួស Benzema។ ត្បិតតែ Lewandowski ជិតឈានចូលវ័យ៣០ឆ្នាំស្មើ Benzema តែកីឡាករប៉ូឡូញរូបនេះមានក្បាច់ប្រយុទ្ធល្អជាង។ ក្រៅពី Lewandowski កីឡាករ Harry Kane និង Mauro Icardi ក៏ស្ថិតក្នុងបញ្ជីទិញរបស់ Real ដូចគ្នា។