ច្បាប់ថ្មីនៅអាមេរិក ហ៊ានតែបង្ហោះ Drone ពេលស្រវឹង អាចជាប់ពន្ធនាគារ ៦ ខែ

2018-01-19 03:48:02
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកបង្ហោះ Drone ក្នុងខ្លួនមានជាតិស្រវឹងត្រូវរាប់ចូលជាអំពើល្មើសច្បាប់មួយរបស់រដ្ឋ New Jersey សហរដ្ឋអាមេរិក។ កាលពីថ្ងៃចន្ទកន្លងទៅ លោក Chris Christie បានចុះហត្ថលេខាលើច្បាប់ថ្មី ដែលហាមឃាត់មិនឲ្យអ្នកបង្ហោះ Drone ទាំងដែលក្នុងខ្លួនផ្ទុកសារធាតុស្រវឹង, គ្រឿងញៀន ឬគ្រឿងស្រវឹងដទៃទៀត។

អ្នកល្មើសច្បាប់អាចត្រូវផាកពិន័យ ១ ពាន់ដុល្លារ និងប្រឈមជាប់ពន្ធនាគារក្នុងរយៈពេល ៦ ខែ ។ New Jersey ជារដ្ឋដំបូងបង្អស់សម្រាប់ការបង្កើតច្បាប់នេះ ខណៈរដ្ឋទាំង ៣៨ ឯទៀតក៏ស្ថិតក្នុងការពិចារណា។ នេះបើផ្អែកតាមរបាយការណ៍ពី Reuters។

ក្នុងឆ្នាំ ២០១៧ ភ្នាក់ងារ CTA បានប៉ាន់ប្រមាណថា ទីផ្សារលក់ចេញ Drone នឹងកើនដល់ ៣.៧ លានគ្រឿងក្នុងឆ្នាំ ២០១៨ ដែលខ្ពស់ជាង ២០ ភាគរយធៀបឆ្នាំទៅ។

ស្របពេលកន្លងមកក៏មានគ្រោះថ្នាក់បង្កដោយយន្តហោះគ្មានមនុស្សបើកប្រភេទនេះ ខណៈករណីទី ១ កើតឡើងក្នុងប្រទេសកាណាដា នៅពេល Drone ខ្នាតតូចហោះចូលតំបន់ហាមឃាត់ទៅបុកនឹងយន្តហោះរបស់អ្នកធ្វើដំណើរ និងករណីទី ២ មានបុរសម្នាក់បង្ហោះ Drone ចូលទៅក្បួនដង្ហែដ៏ធំមួយ រហូតធ្វើឲ្យស្រ្តីម្នាក់បានសន្លប់នៅនឹងកន្លែង រួចជនល្មើសត្រូវជាប់ពន្ធនាគារ ៣០ ថ្ងៃ។