ក្រោយបិទមាត់ប៉ុន្មានថ្ងៃ Wenger ចេញមុខលូកមាត់រឿងផ្ទេរ Sanchez

2018-01-18 11:51:21
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការក្លឹប Arsenal លោក Arsene Wenger ក្នុងថ្ងៃនេះ បានសារភាពហើយថា ការផ្ទេរ Alexis Sanchez ទៅក្លឹប Manchester United ពិតជាជិតកើតឡើងពិតមែន តែលោកក៏ព្រមានផងដែរថា មិនធានារឿងហ្នឹង ១០០%ទេ ដោយសង្កត់ធ្ងន់ថា អ្វីៗអាចប្រែប្រួលបានទាំងអស់ ក្នុងទីផ្សារដោះដូរ។

ក្នុងសន្និសីទសារព័ត៌មាន លោក Wenger បាននិយាយថា៖ "រឿងផ្ទេរ Sanchez ទៅ Manchester United ហ្នឹងត្រូវបានសរសេរបានក្បោះក្បាយណាស់នៅក្នុងបណ្ដាសារព័ត៌មាន។ ដូច្នេះ ខ្ញុំមិនចង់និយាយច្រើនពេកទេ អំពីរឿងហ្នឹង"។

លោកបានបន្ត៖ "ការផ្ទេរកំពុងស្ថិតក្នុងដំណាក់កាលមួយ ដែលអាច ឬមិនអាចកើតឡើង។ បើសិនជាមិនកើតឡើងទេ Sanchez នឹងបន្តលេងឲ្យ Arsenal នាថ្ងៃសៅរ៍នេះពេលប៉ះជាមួយ Crystal Palace"។

អ្នកចាត់ការសញ្ជាតិបារាំងបានគូសបញ្ជាក់បន្ថែមទៀតថា៖ "ទោះជាយ៉ាងណា បើតាមខ្ញុំគិត ការផ្ទេរហ្នឹងអាចនឹងកើតឡើងមែននៅពេលដ៏ឆាប់ខាងមុខ ប៉ុន្តែអ្វីៗអាចប្រែប្រួលគ្រប់ពេលក្នុងរដូវកាលដោះដូរ ការផ្ទេរណាក៏ដោយអាចរលាយភ្លាមៗគ្រប់វិនាទីទាំងអស់។ ខ្ញុំដឹងច្បាស់ ព្រោះខ្ញុំធ្វើការខាងហ្នឹងជាង ៣០ឆ្នាំហើយ។ រឿងអ៊ីចឹងៗមិន អាចធានាបានទេ"។

ក្នុងថ្ងៃនេះផងដែរ លោក Wenger បានទទួលស្គាល់ថា Henrikh Mkhitaryan ពិតជាស្ថិតក្នុងលក្ខខ័ណ្ឌនៃការផ្ទេរ Alexis Sanchez ដូចពាក្យចចាមអារ៉ាមប៉ុន្មានថ្ងៃចុងក្រោយលើកឡើងពិតមែន។ លោកថែមទាំងថា លោកចូលចិត្តខ្សែបម្រើ Mkhitaryan ហើយក៏បានបញ្ជាក់ទៀតថា រឿងឲ្យប្រាក់ឈ្នួលមិនមែនជាបញ្ហាឡើយ។

កាលពីម្សិលមិញមានរបាយការណ៍ជាច្រើនបានអះអាងថា Mkhitaryan បានទារប្រាក់ឈ្នួល Arsenal រហូតដល់ទៅ ៣០ម៊ឺនផោន ក្នុងមួយសប្ដាហ៍ ជាថ្នូរនឹងការចាកចេញពី Manchester United មកចូលរួមនឹងក្លឹប។ ការណ៍នេះធ្វើឲ្យការផ្ទេរ Sanchez ទៅ Manchester United ស្ថិតក្នុងភាពស្រពិចស្រពិលយ៉ាងខ្លាំង។

ទោះជាយ៉ាងណា ក្នុងថ្ងៃនេះ បើតាមការអះអាងសារព័ត៌មានអង់គ្លេស Metro ការផ្ទេរ Sanchez ទៅ Manchester United ហើយ Mkhitaryan ទៅ Arsenal អាចនឹងកើតឡើងនៅរវាង ២៤ម៉ោងខាងមុខ៕

ប្រភព៖ BBC | Metro ប្រែសម្រួល៖ ហ៊ីម រស្មី