គ្មាន៦យ៉ាងនេះទេ កុំរហន់ចង់បានប្រពន្ធពេក ព្រោះការហើយដឹងតែវេទនា

2018-01-19 02:44:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ការបង្កើតគ្រួសារមួយដ៏មានសុភមង្គល គឺជារឿងដែលមនុស្សគ្រប់គ្នាប្រាថ្នាចង់បាន មិនថា បុរស ឫនារីឡើយ។ ចំពោះបុរសអាចនិយាយបានថា ជាបង្គោលដ៏រឹងមាំ និងជាអ្នកមានទំនួលខុសត្រូវខ្ពស់ក្នុងគ្រួសារ ក្រោយរៀបការរួច។ ដូចនេះបុរសត្រូវមើលខ្លួនឯងទៅលើចំណុចទាំង ៦យ៉ាងនេះសិនបើចង់បានភរិយា៖

១. ការងារដឹងណាណីឮតែចាយសល់ថ្ងៃរហូត

ពាក្យថា មានការងារធ្វើតែម្យ៉ាង ហើយចង់បង្កើតគ្រួសារ គឺមិនគ្រប់គ្រាន់ទេ ត្រូវសួរវិញថា ការងារនោះស្ថិតស្ថេរទេ? ប្រាក់ខែច្រើនទេ? ហើយតំណែងអ្វីដែរ? មនុស្សប្រុសមួយចំនួនឲ្យតែមានការងារធ្វើច្រើនគិតដល់រឿងគូស្រករបាត់ទៅហើយ តែត្រូវចាំថា ពេលរៀបការហើយត្រូវចិញ្ចឹមកូនក្រមុំគេ ហើយបើមានកួនត្រូវចិញ្ចឹមកូនទៀត។

២. ចរិតចង់សប្បាយមិត្តភក្ដិលិច-កើតចោលមិនទាន់កើត

ត្រូវដឹងថា ពេលរៀបការហើយ មានមនុស្សស្រីម្នាក់នៅអង្គុយចាំនៅផ្ទះ មិនមែនដូចនៅកំឡោះចង់ដើរដាច់យប់ថ្ងៃណាក៏បាននោះទេ។ ដូច្នេះហើយបើមិនទាន់លះបង់ចរិតផឹកស៊ី ដាច់ស្រវឹងអួរតានួ សួរថា យកគេមករងទុក្ខធ្វើអី? ចាំមានចរិតចាស់ទុំ ចេះទទួលខុសត្រូវខ្ពស់សិនចាំយកប្រពន្ធ។

៣. ឃើញនារីណាស្អាតដឹងតែស្រឡាញ់គ្មានមួយណាឲ្យប្រាកដ

ចាំក្លាយជាមនុស្សចេះស្មោះសិន ចាំគិតគូរចង់បង្កើតគ្រួសារ ព្រោះលើលោកនេះគ្មាននារីណាមកស្រឡាញ់ប្រុសសាវាទេ។ បើក្នុងចិត្តឃើញអ្នកណាក៏ស្អាត ឃើញអ្នកណាក៏ពេញចិត្ត មានន័យថា មិនទាន់ជួបស្នេហ៍ពិតទេ។ បើសិនជាច្បាស់ក្នុងចិត្តថា ស្រឡាញ់នារីម្នាក់ណាពិតប្រាកដ គ្មានចិត្តឲ្យអ្នកផ្សេងទៀត ចាំគិតគូរទើបជាការប្រសើរ។

៤. បញ្ហាតូចបញ្ហាធំនៅមិនទាន់ចេះដោះស្រាយ

គ្រប់បញ្ហាទាំងអស់ មិនថា រឿងហិរញ្ញវត្ថុ រឿងការងារ រឿងជីវិត បើមិនទាន់ចេះរកដំណោះស្រាយទេ មានន័យថា នៅមិនទាន់មានភាពជាអ្នកចាស់ទុំ ជាអ្នកដឹកនាំក្នុងខ្លួននៅឡើយទេ។ ត្រូវដឹងថា ជីវិតគូរក្រោយរៀបការហើយ មានរឿងជាច្រើនត្រូវឆ្លងកាត់ មិនមែនឲ្យតែចេះស្រឡាញ់គ្នាតែម្យ៉ាងចប់រឿងនោះទេ។

៥. មិនទាន់មានផែនការច្បាស់លាស់ក្នុងជីវិត

ចង់បានគ្រួសារមួយដ៏មានសុភមង្គល ក្រោយរៀបការរួច គឺត្រូវកំណត់ផែនការច្បាស់លាស់សិន។ ផែនការទាំងនោះរាប់បញ្ចូលទាំង រឿងរកស៊ី តើរៀបការហើយ គួរតែនៅធ្វើការឲ្យគេ ឫចង់រកស៊ីខ្លួនឯង។ តើ៥ ឬ១០ឆ្នាំទៅមុខទៀតចង់មានអ្វី ចង់បានអ្វី? ដូច្នេះត្រូវមានផែនការឲ្យច្បាស់លាស់ សឹមគិតគូរការបង្កើតគ្រួសារ។

៦. មិនទាន់សល់អ្វីជាដុំកំភួន

ទោះមិនទាន់មានលទ្ធភាពទិញផ្ទះ ឫរថយន្តទំនើបដោយខ្លួនឯង តែយ៉ាងហោចណាស់ ក៏សល់លុយកាក់ខ្លះ ល្មមគ្រប់គ្រាន់នឹងបង្កើតមុខរបរតូចមួយពីរនាក់ប្ដីប្រពន្ធក្រោយរៀបការរួច កុំរំពឹងតែគ្រួសារជួយសុទ្ធសាធមិនល្អទេ។ បើមិនទាន់សល់លុយកាក់ ឫទ្រព្យសម្បត្តិខ្លះ កុំទាន់ប្រញាប់ពេកអីត្រូវខិតខំសិនទៅ៕

អត្ថបទ៖ ឡូយ សង្ហា