"Downsizing" ភាពយន្តប្លែកបំផុតដើមឆ្នាំ ២០១៨ មិនគួររំលង

2018-01-20 00:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Downzing ជាភាពយន្តថ្មីមួយចូលរួមសម្ដែងដោយតារាសម្ដែងល្បី Matt Damon លោក Christop Waltz និងKristin Wiig ព្រមទាំងតារាសម្ដែងជនជាតិវៀតណាមម្នាក់ឈ្មោះ Hong Chau។

Poster រឿង "Downsizing"

Downzing និយាយអំពីពិភពលោកទៅថ្ងៃអនាគតដែលមានបច្ចេកវិទ្យាមួយអាចឲ្យមនុស្សបង្រួមខ្លួនឲ្យកាន់តែតូច ដើម្បីឲ្យពួកគេអាចរស់នៅក្នុងកន្លែងមួយសម្បូរទៅដោយរបស់របរតូចៗ ពិតជាឲ្យភ្ញាក់ផ្អើលមែនទែន។

បើនិយាយឲ្យចំភាពយន្តនេះគឺជាភាពយន្តលក្ខណៈកំប្លែង (Satire) ដែលជាស្នាដៃរបស់លោក Alexander Payne ជាអ្នកដឹកនាំរឿង Nebraska និង Sideway។ ចំពោះភាពយន្តនេះប្រសិនជាអ្នកគ្រាន់តែមើល Trailer យើងប្រាកដជាគិតថាវាគ្រាន់តែជាភាពយន្តលក្ខណៈវិទ្យាសាស្ត្រ (Sci-fi) តែប៉ុណ្ណោះ ដោយបង្ហាញពីបច្ចេកវិទ្យាថ្មីមួយ ប៉ុន្តែភាពយន្តនេះសម្បូរនូវឈុតឆាកកំប្លែងជាច្រើនជាពិសេសគឺតួអង្គស្រីសម្ដែងដោយ Hong Chau តែម្ដងនាងជាជនអន្តោប្រវេសន៍មកពីប្រទេសវៀតណាមនិងបាក់ជើងម្ខាង ដោយសារតែជិះយន្តហោះ។

ភាពយន្តនេះគឺជាភាពយន្តប្លែកមួយ ព្រោះមិនដែលមានភាពយន្តណា ហ៊ានលើកយកនូវ Concept ដែលប្លែកនិងចម្លែកបែបនេះយកមកផលិតជាភាពយន្តនោះទេ។ "Downsizing” ផ្ដោតទៅលើពិភពលោកទៅថ្ងៃអនាគត ប្រឈមមុខនឹងបញ្ហាមនុស្សច្រើនហួសហេតុ និងមានបញ្ហាជាច្រើនក្នុងជីវិតប្រចាំថ្ងៃ។ ដូច្នេះដើម្បីបញ្ចៀសការប្រើប្រាស់ដើមទុនច្រើនពេក អ្នកវិទ្យាសាស្ត្រសញ្ជាតិន័រវែសជាច្រើនរូបមួយក្រុម បានរកឃើញបច្ចេកវិទ្យាមួយ អនុញ្ញាតឲ្យមនុស្សបង្រួមខ្លួនឲ្យកាន់តែតូច។ នេះអាចឲ្យពួកគេចំណាយលុយកាន់តែតិចជាងមុន និងអាចរស់នៅជីវិតនៅក្នុងក្ដីស្រមៃខ្លួន ពួកគេអាចទិញរបស់របរផ្សេងៗ ញ៉ាំអាហារឆ្ងាញ់ៗ ពោលគឺអ្វីៗដែលយើងចង់បាន។

ក៏ប៉ុន្តែភាពយន្តក៏បញ្ជាក់អំពីភាពខុសគ្នារវាងអ្នកមាននិងអ្នកក្រទោះបីជា នៅក្នុងពិភពមនុស្សធម្មតាឫមនុស្សតូចៗក៏ដោយ បញ្ហានេះនៅតែមាន។ មិនត្រឹមតែប៉ុណ្ណោះ រឿងនេះបែរជានិយាយទៅកាន់បញ្ហាផ្សេងៗទាក់ទងនឹងអត្ថន័យជីវិតមនុស្ស ពាក់ព័ន្ធនឹងការប្រែប្រួលអាកាសធាតុ (Global Warming)។ ពេលខ្លះយើងមិនអាចដឹងថា តើនេះគឺជារឿងដដែលឫយ៉ាងណា ដោយសារតែមានបញ្ហាផ្សេងៗជាច្រើនបង្ហាញនៅក្នុងសាច់រឿង។

បើសិនជានិយាយអំពីការប្រមើលមើលទៅកាន់តួឯកវិញMatt Damon សម្ដែងជាតួអង្គ Paul មិនអាចសម្រេចការងារអ្វីបានតាមចិត្តខ្លួនទាល់តែសោះ។ លោកតែងតែមានបញ្ហាជាច្រើនជុំវិញខ្លួន ព្រមទាំងមិនដឹងថាខ្លួនចង់បានអ្វីឲ្យពិតប្រាកដ។ ប្រសិនជាតួអង្គ Hong Chau ឈ្មោះ Ngoc Lan Tran មិនបានបង្ហាញខ្លួននោះទេ Paul ប្រាកដជាមិនដឹងថាជីវិតនិងខ្លួននឹងទៅជាយ៉ាងណា។

ប៉ុន្តែប្រសិនជាយើងមិនខ្វល់ខ្វាយខ្លាំងជាមួយនឹងដំណើរសាច់រឿង ដោយមកយកចិត្តទុកដាក់ជាមួយការសម្ដែងវិញ ធានាថាអ្នកនឹងចូលចិត្តតួអង្គ Ngoc Lan Tran ព្រោះតួអង្គនាងពិតជាគួរឲ្យស្រលាញ់។ រីឯរបៀបដែលនាងនិយាយភាសាអង់គ្លេស ពិតជាគួរឲ្យអស់សំណើចខ្លាំង ដោយសារតែនាងនៅតែមានតុងនិយាយបែបវៀតណាមដដែល។ កាលពីថ្ងៃដាក់បញ្ចាំងលើកដំបូង អ្នកទស្សនាភាពយន្តនេះជាច្រើន ផ្ទុះសំណើចគិលគ្រប់គ្នារាល់ពេល Ngoc ចាប់ផ្ដើមនិយាយ។

ចំពោះអត្ថន័យចំពោះភាពយន្តនេះវិញ ចង់ឆ្លុះបង្ហាញពីធម្មជាតិរបស់មនុស្ស ទោះបីជាពិភពលោកផ្លាស់ប្ដូរយ៉ាងណាក៏ដោយ ក៏នៅតែមានការបែងចែកវណ្ណៈ ក៏ប៉ុន្តែទំនាក់ទំនង និងសេចក្ដីស្នេហាគឺជាស្ពានមួយដែលអាចចម្លងមនុស្សគ្រប់គ្នាឲ្យយល់ពីគ្នា និងអាចរស់នៅលើពិភពលោកនេះពោរពេញទៅដោយក្ដីសង្ឃឹម។

"Downsizing" ចាប់ផ្ដើមដាក់បញ្ចាំងហើយនៅគ្រប់រោងកុននៅប្រទេសកម្ពុជា៕