ភាពយន្ត "Star Wars” វគ្គចុងក្រោយបរាជ័យខ្លាំងនៅ Box Office ប្រទេសចិន

2018-01-19 23:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តវគ្គចុងក្រោយនៃសែស្រឡាយរឿង "Star Wars” គឺ "Star Wars: The Last Jedi” បរាជ័យជាខ្លាំងនៅ Box Office ប្រទេសចិនដោយសារតែសាច់រឿងមានលក្ខណៈខុសប្លែក និងកែប្រែពីភាពយន្តស៊េរីដំបូងច្រើនពេក ធ្វើឲ្យអ្នកគាំទ្រជាច្រើននៅទីនោះ មានការខកចិត្តខ្លាំង។

ភាពយន្តនេះទទួលបានចំណូលតិចខ្លាំងនៅសប្ដាហ៍ទី២ បន្ទាប់ពីបានដាក់បញ្ចាំង ធ្វើឲ្យមានការភ្ញាក់ផ្អើលយ៉ាងខ្លាំង។ "The Last Jedi” ទទួលបានទឹកប្រាក់ ២៨,៧លានដុល្លារ នៅសប្ដាហ៍ដំបូង ដែលចំនួននេះគឺតិចខ្លាំងរួចទៅហើយ។ ក្នុងសប្ដាហ៍ទី២ ភាពយន្តនេះរកចំណូលបានតែ ២,៤លានដុល្លារតែប៉ុណ្ណោះ ពោលគឺចុះថយរហូតដល់ទៅ ៩២ភាគរយ។

លោក Jimmy Wu នាយកប្រតិបត្តិផ្នែកកុននៅប្រទេសចិន បានថ្លែងប្រាប់សារព័ត៌មាន The Hollywood Reporter ថា៖ "រឿង 'The Last Jedi' នេះគឺត្រូវគេដកចេញពីកាលវិភាគបញ្ចាំងទាំងស្រុងទៅហើយ។ ភាពយន្តនេះទទួលបានការគាំទ្រតិចតួចបំផុត ដែលយើងមិនអាចនឹកស្មានដល់។"

ភាពយន្តយក្សដែលជាសមិទ្ធផលរបស់ Disney និង Lucasfilm នេះរកចំណូលបានទៅ ៥៩១លានដុល្លារឯណោះតែនៅក្នុងសហរដ្ឋអាមេរិក និង១,២៧ប៊ីលានដុល្លារទូទាំងពិភពលោក ប៉ុន្តែរកបានមិនដល់ ៥០លានដុល្លារផងនៅប្រទេសចិន ដែលជាប្រទេសទី២ក្នុងលោក អាចរកចំណូលបានច្រើនពីការលក់សំបុត្រ។ ហេតុដូច្នេះហើយទើប "The Last Jedi” មិននឹងមានឈ្មោះនៅតារាងភាពយន្តទាំង ៥០ដែលរកចំណូលបានច្រើននៅប្រទេសចិនប្រចាំឆ្នាំផង តួយ៉ាងភាពយន្តដែលបរាជ័យនៅប្រទេសអាមេរិកដូចជា "Valerian” និង "Geostorm” សុទ្ធតែរកចំណូលបានខ្ទង់៦០លានដុល្លារនៅប្រទេសចិន។

បើប្រៀបធៀបនឹងភាពយន្តវគ្គមុនក្នុងសែស្រឡាយនេះ "The Force Awakening” អាចរកចំណូលបានដល់ទៅ ១២៤លានដុល្លារឯណោះកាលពីឆ្នាំ ២០១៦ និង "Rogue One” រកចំណូលបាន ៦៩លានដុល្លារនៅឆ្នាំ ២០១៧។ បើយោងទៅតាមអ្នកទីផ្សារប្រចាំទីក្រុងប៉េកាំងប្រទេសចិន លោក James Li បានឲ្យដឹងថា បញ្ហានេះអាចកើតឡើងដោយសារតែអ្នកទស្សនាភាពយន្តនេះហើយ មិនពេញចិត្តនិងមិនត្រលប់ទៅមើលម្ដងទៀត ឫមិនបានប្រាប់អ្នកដទៃឲ្យទៅមើលរឿងនេះ។

បញ្ហាសំខាន់មួយទៀតគឺ ដោយសារតែភាពយន្តនេះមានលក្ខណៈខុសប្លែកខ្លាំង បើប្រៀបធៀបទៅនឹងស៊េរីរឿង "Star Wars” ដំបូងដាក់បញ្ចាំងអំឡុងទសវត្សទី ៧០។ ភាពខុសប្លែកនេះបានប៉ះពាល់យ៉ាងខ្លាំងទៅលើអ្នកគាំទ្រវ័យក្មេងនៅប្រទេសចិន ធ្វើឲ្យពួកគេមានភាពលំបាកខ្លាំងក្នុងការយល់ដឹងពីសាច់រឿង៕

អានអត្ថបទ៖

ប្រភព៖ hollywoodreporter ប្រែសម្រួល៖ ធារ៉ូ