លោក ត្រាំ តេទៅអរគុណមេ Apple ភ្លាមៗ រឿងបោះទុន ៣៥០ ពាន់លានដុល្លារ

2018-01-19 10:22:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតីសហរដ្ឋអាមេរិកជាប់ឆ្នោតលោក ដូណាល់ ត្រាំ និយាយថាបានតេទូរសព្ទទៅអរគុណលោក Tim Cook នាយកប្រតិបត្តិ Apple អំពីការប្រកាសបណ្ដាក់ទុន ៣៥០ ពាន់លានដុល្លារ ជួយសេដ្ឋកិច្ចសហរដ្ឋអាមេរិក។

ពេលថ្លែងសុន្ទរកថានៅរោងចក្រមួយក្នុងរដ្ឋ Pennsylvania កាលពីម្សិលមិញ លោក ដូណាល់ ត្រាំ បានលើកឡើងដូចនេះ ៖ "ពេលដែលខ្ញុំបានឮព័ត៌មាន ខ្ញុំបានឮ ៣៥០ លានដុល្លារ ហើយខ្ញុំក៏និយាយថា «៣៥០ លានដុល្លារ! ច្បាស់ជាអស្ចារ្យណាស់ហើយ» ហើយពួកគេក៏ប្រាប់ខ្ញុំថា «មិនមែនទេ! គឺ ៣៥០ ពាន់លានដុល្លារ»"។ លោក ត្រាំបន្ថែមថា ៖ "ខ្ញុំទើបតែតេទៅ Tim Cook និងបានអរគុណគាត់ ប៉ុន្តែខ្ញុំថាមិនធ្លាប់មានការបណ្ដាក់ទុនក្នុងអាមេរិកធំបែបនេះ ពីសំណាក់ក្រុមហ៊ុនមួយនោះទេ”។

កាលពីថ្ងៃពុធក្រុមហ៊ុន Apple បានប្រកាសថានឹងប្រមូលយកចំណូលរាប់ពាន់លានដុល្លារពីក្រៅប្រទេស ហើយនឹងបង់ពន្ធ ៣៨ ពាន់លានដុល្លារលើចំណូលនោះ និងប្រកាសថាបណ្ដាក់ទុន ៣៥០ ពាន់លានដុល្លារក្នុងសហរដ្ឋអាមេរិក នៅរយៈពេល ៥ ឆ្នាំខាងមុខ៕

ប្រភព៖ Bloomberg ប្រែសម្រួល៖ សុខហេង