Gangnam Style ធ្លាប់ជាវីដេអូមានអ្នកមើលច្រើនជាងគេ ពេលនេះខ្ទាតដល់ណាហើយ?

2018-01-21 08:52:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាប់តាំងពីថ្ងៃទី ២៤ ខែវិច្ឆិកាឆ្នាំ ២០១២ មកវីដេអូចម្រៀង "Gangnam Style” របស់ Psy បានជាប់ជាវីដេអូមានចំនួនអ្នកទស្សនាច្រើនជាងគេលំដាប់លេខមួយលើ YouTube ជាមួយចំនួនទស្សនា ៨០៣ លានដង ដោយបានវ៉ាដាច់វីដេអូចម្រៀង "Baby” របស់ Justin Bieber។

កាន់តំណែងកំពូលនេះបានជាង ១ ៦៨៩ ថ្ងៃ ពោលនៅថ្ងៃទី ១០ ខែកក្កដា ឆ្នាំ ២០១៧ "Gangnam Style” ក៏ត្រូវបានវីដេអូចម្រៀង "See You Again” ច្រៀងដោយ Wiz Khalifa និង Charlie Puth ផ្ដួលរលំ ឡើងឈរលើតំណែងលេខមួយ ជាមួយចំនួនទស្សនា ២ ៨៩៤ លានដង។

យ៉ាងណាក្ដីការឈរលើតំណែងកំពូលរបស់ "See You Again” មិនទាន់បានមួយខែស្រួលបួលផង វីដេអូចម្រៀងជាភាសាអេស្ប៉ាញ "Despacito” របស់ Luis Fonsi បានហក់ឡើងតំណែងកំពូលលេខមួយនៅថ្ងៃទី ៤ ខែសីហា ឆ្នាំ ២០១៧ ដែលមានចំនួនទស្សនា ២ ៩៩៣ លានដង ហើយបច្ចុប្បន្នមានចំនួនទស្សនា ៤,៧ ពាន់លានដង។

ការប្រកួតប្រជែងនេះធ្វើឲ្យ "Gangnam Style” ដែលធ្លាប់កាន់តំណែងជាវីដេអូមានអ្នកទស្សនាច្រើនជាងគេរយៈពេលជាង ៤ ឆ្នាំ ត្រូវធ្លាក់មកនៅតំណែងលេខ ៤ ដោយចំនួនអ្នកទស្សនាបច្ចុប្បន្នមាន ៣,០៨ ពាន់លានដង។ វីដេអូចម្រៀង "Shape of You” របស់ Ed Sheeran ស្ថិតនៅចំណាត់ថ្នាក់លេខ ៣ ដែលមានចំនួនទស្សនា ៣,០៨ ពាន់លានដង។

បច្ចុប្បន្ននេះមានវីដេអូចំនួន ៤ ប៉ុណ្ណោះដែលមានចំនួនទស្សនាដល់ខ្ទង់ ៣ ពាន់លានដងនៅលើ YouTube គឺ "Despacito”, “See You Again”, “Shape of You” និង "Gangnam Style”។ វីដេអូដែលនឹងមានចំនួនទស្សនា ៣ ពាន់លានដងបន្ទាប់ទៀតមាន "Uptown Funk” របស់ Mark Ronson ជាមួយ Bruno Mars របស់ និង "Sorry” របស់ Justin Bieber ដែលមានចំនួនទស្សនាខ្ទង់ ២,៨ ពាន់លានដង៕

"Despacito" វីដេអូចម្រៀងដែលមានចំនួនទស្សនាច្រើនជាងគេបំផុតនាពេលនេះ ៖