ធ្លាប់តែសម្រុកទៅទិញអាស្រស់ៗ តែបើដឹងជំនឿផ្កាអង្គារសីល្ប៍ជ័រវិញ ចង់ដាច់ផ្ងារ

2018-01-22 07:06:10
ចំនួនមតិ 0 | ចំនួនចែករំលែក 0

ចន្លោះមិនឃើញ

រៀងរាល់ មុនថ្ងៃចូលឆ្នាំចិនមកដល់ បងប្អូនខ្មែរដែលមានជាប់សែស្រឡាយចិន តែងតែនាំគ្នាសម្រុកទៅទិញដើមអង្គារសិល្ប៍យកមកដាំរក្សា វាទុកឲ្យរីកផ្កាឲ្យទាន់ចំថ្ងៃចូលឆ្នាំចិន។ តាមចាស់បុរាណចិនមានជំនឿថា ដើមផ្កាអង្គារសិល្ប៍ដាក់លម្អក្នុងស្ថាប័ន ហាង ឬដាក់ក្នុងផ្ទះ គឺនាំមកនូវសិរីសួស្ដី និងលាភសំណាង ប៉ុន្តែបើដាំមិនចេញផ្កានោះ គ្រួសារឬអាជីវកម្មនឹងជួបបញ្ហា រកស៊ីមិនឡើង។ ហេតុនេះហើយ ទើបជនជាតិចិនមួយចំនួន ងាកមកទិញដើមផ្កាអង្គារសីល្ប៍ជ័រវិញដាក់តាំងលម្អជំនួសវិញ ដោយវានាំផលល្អនិងអត្ថប្រយោជន៍ មិនចាញ់ដើមផ្កាមែនទែនឡើយ។

អ្នកលក់ដើមអង្គារសិល្ប៍ជ័រនៅតាមបណ្ដោយផ្លូវផ្សារអូរឫស្សី សូមមិនបញ្ជាក់ឈ្មោះថា បានប្រាប់ថា អ្នកជាប់ស្រឡាយចិនឥឡូវគេនិយមដាក់លម្អផ្កាជ័រនេះវិញ ព្រោះវាបង្ហាញពីភាពស្រស់បំព្រងជារហូត ហើយនាំសំណាងល្អឲ្យគ្រួសារដូចគ្នានឹងផ្ការីកមែនទែន។ បើនិយាយពីតម្លៃវិញគឺចាប់ពី ៦០ ទៅ ១០០ដុល្លារ ទៅតាមទំហំដើមផ្កា។ លោកថា តម្លៃខ្ពស់ជាងដើមផ្កាពិតបន្តិច ប៉ុន្តែធានាថាផ្កានឹងរីកស្រស់រហូត និងប្រើប្រាស់បានរាប់ឆ្នាំ។ អាជីវកររូបនេះអះអាងថា លោកបាននាំចូលផ្កាអង្គារសិល្ប៍ជ័រមកជារៀងរាល់ឆ្នាំ និងដាក់លក់មិនដែលលក់សល់នោះឡើយ។

គួរជម្រាបបន្ថែមថា ដើមផ្កាអង្គារសិល្ប៍ពិតប្រាកដ មិនទាន់ចេញផ្កា តាមហាងឆេងបច្ចុប្បន្ន សម្រាប់គុម្ពតូចៗ ចាប់ពីមានតម្លៃ ២៥ដុល្លារ គុម្ពធំមធ្យម តម្លៃ៥៥ ដុល្លារ និង៧៥ដុល្លារ ចំណែកគុម្ពធំជាងគេគឺ តម្លៃ១៥០ដុល្លារ និងត្រូវការថែទាំ ដាក់ត្រាំក្នុងធុងទឹក និងបាញ់ទឹក ១ថ្ងៃ៣ដង៕

(ដើមផ្កាអង្គារសិល្ប៍ជ័រ)