Taylor Swift ធ្វើរឿងពិសេសហួសថ្លែង១ ក្នុងថ្ងៃមង្គលការអ្នកគាំទ្រ

2018-01-22 08:26:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្វីត្បិតការផ្ញើពាក្យជូនពរ វាជារឿងសាមញ្ញៗ សម្រាប់មនុស្សទូទៅ ប៉ុន្តែវាបានបង្ហាញនូវទឹកចិត្តយកចិត្តទុកដាក់ និងគិតគូរពីសំណាក់តារាល្បីមួយរូប ចំពោះអ្នកគាំទ្ររបស់ពួកគេ ឧទាហរណ៍ជាក់ស្ដែងដូច Taylor Swift ស្រាប់។

តារាស្រីកើតឆ្នាំ ១៩៨៩រូបនេះ បានធ្វើរឿងមួយដ៏រំភើប និងបង្ហាញបេះដូងកក់ក្ដៅដល់អ្នកគាំទ្រ ខណៈនារីម្នាក់ និងស្វាមី គឺជាអ្នកគាំទ្រ ចូលរោងការ។ Taylor បានជូនអំណោយមង្គលការដ៏ស្រស់ស្អាតទៅកាន់អ្នកគាំទ្រនាងរូបនោះ។

ដើមហេតុដំបូង គឺ Brittany Lewis ដែលជាកូនក្រមុំ ដឹងច្បាស់ថាគូដណ្ដឹងរបស់នាង ជាអ្នកគាំទ្រផ្កាប់មុខរបស់ Taylor Swift ទើបនាងចង់ធ្វើរឿងពិសេសមួយដើម្បីបំពេញក្ដីសុបិនមនុស្សសំខាន់របស់នាងក្នុងថ្ងៃពិសេស។ កូនក្រមុំរូបនេះបាន ផ្ញើសារជាច្រើនទៅកាន់ Taylor អមជាមួយក្ដីសង្ឃឹមមុតមាំថា តារាចម្រៀងរូបនេះនឹងធ្វើអ្វីម្យ៉ាងពិសេស សម្រាប់ថ្ងៃពិសេសពួកគេ។

បំណងប្រាថ្នាពិតជាបានសម្រេចមែន គឺថ្ងៃនោះ ម្ចាស់បទ "Look What You Make Me Do” បានផ្ញើផ្កាដ៏ស្រស់ស្អាត រួមជាមួយសារជូនពរលើនោះ ជូនដល់គូស្វាមីភរិយាថ្មីថ្មោងនេះ នៅថ្ងៃ ១២ ខែមករា។

ឈានដល់ថ្ងៃទី ១៤ ខែមករា Gonzalez ដែលជាកូនកំលោះបាន បង្ហោះរូបភាពខ្លួន និងភរិយាក្នុងថ្ងៃមង្គលការជាមួយផ្កាដ៏ស្រស់ស្អាត ដោយបានសរសេរថា៖ "នៅរំភើបភ្ញាក់ផ្អើលមិនទាន់បាត់ទេ ពេល @taylorswift13 ផ្ញើផ្កាដ៏ស្រស់ស្អាតដល់ខ្ញុំ និងសំណព្វចិត្តក្នុងថ្ងៃដ៏មានន័យក្នុងជីវិត!”។

នេះជាទឹកចិត្តដ៏ប្រពៃមិនអាចកាត់ថ្លៃបាន ក្នុងនាមជាតារាចម្រៀងល្បីឈ្មោះប្រចាំពិភពលោក ដែលបានចំណាយពេល និងផ្ដល់ភាពកក់ក្ដៅសម្រាប់អ្នកគាំទ្រខ្លួន។ វាជារឿងរំភើបមិនអាចបំភ្លេចបាន ហើយសូមអបអរគូស្នេហ៍ថ្មីថ្មោងទាំង ២៕

ប្រភព៖ elitedaily ប្រែសម្រួល៖ យី សុធារី