កូនខ្មែរមួយក្រុម យកពោះវៀនកង់ឡាន ច្នៃជាកាបូបលុយ ធ្វើឲ្យបរទេសភ្ញាក់ផ្អើល (មានវីដេអូ)

2018-01-23 07:50:12
ចំនួនមតិ 0 | ចំនួនចែករំលែក 0

ចន្លោះមិនឃើញ

កូនខ្មែរមួយក្រុមបានបង្កើតភាពភ្ញាក់ផ្អើល ដោយបានច្នៃពោះវៀនកង់ចាស់ៗស្ទើរតែបោះចោល មកធ្វើជាកាបូបលុយម៉ាក Kraftino ហើយកំពុងល្បីល្បាញនៅក្រៅប្រទេស។ បច្ចុប្បន្ន កាបូបលុយ Kraftino កំពុងវាយលុកទីផ្សារនៅ សហរដ្ឋអាមេរិក អង់គ្លេស កាណាដា នូវែលហ្សេឡង់ និង អូស្ត្រាលី ជាដើម។

លោក ប៊ុន ណារ៉ាទីតូ សហស្ថាបនិកនៃសហគ្រាសសង្គម Kraftino មានទីតាំងស្ថិតនៅខណ្ឌឫស្សីកែវ រាជធានីភ្នំពេញ បានប្រាប់ក្រុមការងារផ្លូវទៅស្រុក២ ថា៖ «ដើមឡើយមុននឹងចាប់ផ្ដើមមុខរបរនេះ យើងបានប្រាប់មិត្តភ័ក្ដិ បងប្អូនអំពីគំនិតច្នៃប្រឌិតនេះ ពួកគេមិនមានការជឿជាក់ មិនមានជំនឿថាអាចធ្វើបានជោគជ័យនោះទេ។ ប៉ុន្តែ រូបខ្ញុំផ្ទាល់ និងក្រុមការងារជឿថា អាចធ្វើវាបាន ព្រោះយើងបានសិក្សាទីផ្សារច្បាស់លាស់ ក៏ដូចជា នូវសមត្ថភាពការផលិត របស់ផលិតករខ្មែរយើង។»

សហគ្រាសសង្គម Kraftino ផលិតកាបូបលុយធ្វើពីពោះវៀនកង់ឡានចាស់ៗ

លោក ប៊ុន ណារ៉ាទីតូ សហស្ថាបនិកនៃសហគ្រាសសង្គម Kraftino

កាបូបលុយម៉ាក Kraftino បង្កើតឡើងដោយក្រុមយុវជនចំនួន ៤នាក់ នៅអំឡុងឆ្នាំ ២០១៤ ក្នុងគោលបំណងចូលរួមគាំពារបរិស្ថានផង និង ជួយលើកស្ទួយជីវភាពប្រជាជន ជាពិសេសស្ត្រីមេម៉ាយ និង ពិការផង។

សូមទស្សនាវីដេអូ

លោក ប៊ុន ណារ៉ាទីតូ បានបញ្ជាក់ថា ពោះវៀនកង់ដែលជ្រើសរើសភាគច្រើនជាពោះវៀនកង់ចាស់ជាពិសេសប្រភេទពោះវៀនកង់ឡានធំៗ (ឡានកង់១០ឡើង) ដែលពោះវៀនស្វិតល្អ និងមានក្រឡាតាមសម្បកកង់ ដែលធ្វើឲ្យរូបរាងកាបូបលុយនេះ មានភាពស្រស់ស្អាត រំលេចតាមរយៈក្រឡាកង់។

ផ្ដើមពីចំណុចសូន្យ លោក ប៊ុន ណារ៉ាទីតូ បានឲ្យដឹងថា មកទល់នឹងពេលនេះ កាបូបលុយច្នៃពីពោះវៀនកង់កំពុងទទួលបានការចាប់អារម្មណ៍ច្រើនជាពិសេស ភ្ញៀវបរទេស ដែលបានបញ្ជាទិញហើយសរសើរថា មានភាពរឹងមាំ និង ខុសប្លែកពីគេ។

យ៉ាងណាក៏ដោយ លោក ទីតូ មានក្ដីប្រាថ្នាដ៏ធំចង់បង្កើនផលិត និងជំរុញការនាំចេញទាំងក្នុងស្រុក និងក្រៅប្រទេស ឲ្យពិភពលោកកាន់តែស្គាល់នូវផលិតផលរបស់ខ្មែរ។ ចំពោះតម្លៃវិញ កាបូបដៃ Kraftino លក់នៅទីផ្សារអន្ដរជាតិតម្លៃ ២២.៩៩ ឯក្នុងស្រុកតម្លៃ ៦០ ០០០ រៀល ស្មើនឹង ១៤.៩៩ ដុល្លារ ដែលស្វែងរកនៅតាមហាងធំៗ និង ក៏មានដាក់លក់នៅលើបណ្ដាញសង្គម ដែលប្រើគណនីហ្វេសបុក Kraftino៕