“The Death Cure” រឿងចុងក្រោយនៃស៊េរីរឿង "The Maze Runner” (វីដេអូវិភាគ)

2018-01-26 23:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្ត "The Death Cure” គឺជារឿងទី៣ នៅក្នុងស៊េរីរឿង "The Maze Runner” ដែលមានលោក Wes Ball ជាអ្នកដឹកនាំរឿង។ អ្នកដឹកនាំរូបនេះ ក៏បានដឹកនាំថតរឿង២ភាគដំបូងផងដែរគឺ "The Maze Runner 2014” និង "The Scorch Trails 2015”។

ស៊េរីរឿងនេះត្រូវបានគេចាត់ទុកថា ជាស៊េរីរឿងមួយក្នុងចំណោមប្រលោមលោកល្បីៗ ដកស្រង់ចេញពីសៀវភៅរឿងល្បីៗ ដូចជា "Harry Potter”, “Twilight”, “The Hunger Games” និង "Divergent” ជាដើម។

ក្នុងវគ្គចុងក្រោយនៃស៊េរី "The Maze Runner” នេះ គេបានលើកយកអំពីហេតុការណ៍ផ្សេងៗ ដែលកើតឡើងក្រោយ ភាពយន្ត "The Sorch Trails” បានដាក់បញ្ចាំងកាលពីឆ្នាំ ២០១៥។ ចំពោះសាច់រឿងទាំងស្រុង គឺមានរយៈពេលដល់ទៅ ២ម៉ោងនិង២២នាទីឯណោះ ដែលជាភាពយន្តដែលមានសាច់រឿងវែងបំផុត បើប្រៀបធៀបនឹង២វគ្គដំបូង។

ចំណុចវិជ្ជមានជាច្រើនដែលបានបង្ហាញក្នុងភាពយន្តនេះ គឺភាគច្រើននិយាយអំពីទំនាក់ទំនងរវាង មនោសញ្ចេតនារវាងមិត្តភ័ក្ដិ ជាពិសេសតួអង្គ Thomas និង Newt សម្ដែងដោយ Dylan O'Brien និង Thomas Brodie-Sangster។ "The Death Cure” ក៏រៀបរាប់ពីទំនាក់ទំនងដ៏ច្របូកច្របល់របស់ Thomas និង Teressa សម្ដែងដោយ Kaya Schodelario និងការខិតខំស្វែងរកមធ្យោបាយដើម្បីជួយសង្គ្រោះ Minho សម្ដែងដោយ Ki Hong Lee។

មិនត្រឹមតែប៉ុណ្ណោះគេក៏បានបង្ហាញអាថ៌កំបាំងជាច្រើនទៀត ពាក់ព័ន្ធនឹងគោលបំណងរបស់អង្គការ Wicked ថាតើពួកគេមានបំណងយ៉ាងណា ចំពោះជោគវាសនារបស់មនុស្សជាច្រើនដែលរស់នៅ និងមិនទាន់ឆ្លងរោគដ៏សាហាវ មានឈ្មោះថា Flare។ ព័ត៌មានសំខាន់ៗផ្សេងៗជាច្រើននឹងត្រូវលាតត្រដាង ហើយអ្នកនឹងអាចដឹងកាន់តែច្បាស់ចំពោះហេតុការណ៍ដែលបានកើតឡើងកាល ពី ២វគ្គមុន ប្រសិនជាមិនបានអានសៀវភៅប្រលោមលោក។

តារាសម្ដែង Patricia Clarkson ដែលសម្ដែងជាតួអង្គ Ava Paige ជាម្ចាស់អង្គការ Wicked ពិតជាសម្ដែងបានល្អ ហើយនៅក្នុងវគ្គនេះ អាចឲ្យអ្នកកាន់តែយល់ច្បាស់ពីតួអង្គមួយរូបនេះ។ ដោយសារតែមេរោគ Flare បន្តសាយភាយនៅគ្រប់ទីកន្លែងទូទាំងពិភពលោក ហេតុដូច្នេះហើយទើប Ava ខិតខំស្វែងរកគ្រប់មធ្យោបាយដើម្បី រកថ្នាំព្យាបាលមេរោគដ៏សាហាវនេះ ប៉ុន្តែវាមិនមែនជាការងាយស្រួលនោះឡើយ។ នៅក្នុងវគ្គចុងក្រោយនេះ Ava បានធ្វើការរួមគ្នាជាមួយ Teresa ដើម្បីស្វែងរកថ្នាំព្យាបាលជំងឺដែលគេហៅថា "The Cure”។

តាមរយៈការបង្ហាញពីទិដ្ឋភាពផ្សេងៗ ទាក់ទងនឹងអ្នកមាន និងអ្នកក្រ ភាពយន្តនេះបង្ហាញពីភាពអវិជ្ជមាន ចំពោះមនុស្សគ្រប់គ្នា ខិតខំធ្វើអ្វីគ្រប់យ៉ាងដើម្បីឲ្យខ្លួនអាចរស់រានមានជីវិត ទោះបីជាអំពើនោះអាក្រក់កម្រិតណា។ ទោះជាយ៉ាងណាក៏ដោយ ភាពយន្តនេះបានបង្ហាញពីមនោសញ្ចេតនាស្នេហា រវាងមិត្តភ័ក្ដិគ្រួសារ និងព្រមទាំងការបាត់បង់ផ្សេងៗ អាចឲ្យអ្នកស្រក់ទឹកភ្នែកពេលទស្សនាដោយមិនដឹងខ្លួន។

ចំពោះចំណុចអវិជ្ជមានខ្លះៗ នោះគឺអាចបណ្ដាលមកពីមួយកំណាត់ដំបូងនៃសាច់រឿង គឺមានលក្ខណៈយឺតនិងបន្លាយបន្តិច ទម្រាំដល់ចំណុចសំខាន់ដែលធ្វើឲ្យយើងចាប់អារម្មណ៍អំពីអ្វីដែលនឹងកើតឡើង។ ចំណុចខ្លះៗ និងឈុតឆាកខ្លះៗនៃសាច់រឿងគឺមានលក្ខណៈស្រដៀងគ្នា និងភាពយន្តមួយចំនួនជាពិសេសគឺ ភាពយន្តទាក់ទងនឹងខ្មោច Zombie ដូចជា "The Walking Dead” និង "Resident Evil” ជាដើម។

សរុបសេចក្ដីមក "The Death Cure” គឺភាពយន្តដែលល្អសម្រាប់ការមើលលម្ហែអារម្មណ៍ ដែលជាភាសាអង់គ្លេសគេអាចហៅថា "Popcorn Flick” ប៉ុន្តែវាមិនមែនលក្ខណៈអ្វីពិសេសខ្លាំង ដែលធ្វើឲ្យយើងចាប់អារម្មណ៍ខ្លាំងពេកនោះទេ។