ទើបរកឃើញ Suarez អាចរងការពិន័យ ក្រោយប្រព្រឹត្តរឿងមួយក្នុងប្រកួតយប់មិញ

2018-01-29 13:56:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Luis Suarez អាចរងការពិន័យ បន្ទាប់ពីរូបភាពមួយចំនួនបានបង្ហាញថា កីឡាករអ៊ុយរុយហ្គាយបានធ្វើការធាក់កីឡាកររបស់ក្លឹប Alves ម្នាក់ ក្នុងប្រកួតយប់មិញ។ នេះបើតាមការចុះផ្សាយរបស់ Metro។

នៅនាទី ៨៦ ក្នុងពេលបាល់ជ្រុងចេញពី Barcelona ខ្សែប្រយុទ្ធ Suarez ត្រូវបានគេមើលឃើញថា បានធ្វើការប្រទាញប្រទង់ជាមួយខ្សែការពារ Ruban Duarte របស់ក្លឹប Alves ដើម្បីត្រៀមដណ្ដើមបាល់។ ក្នុងការប្រទាញប្រទង់ Suarez បានធ្វើបានសម្រេចទាញ Duarte មកខាងក្រោយខ្លួន។ ក្រោយមក ខ្សែការពារ Duarte ក៏ព្យាយាមតាមបិទ Suarez ពីក្រោយ រួចក៏ត្រូវកីឡាករអ៊ុយរុយហ្គាយធាក់មកក្រោយមួយជើងឆ្វេងចំ ពោះតែម្ដង។ បន្ទាប់ពីហេតុការណ៍នេះកើតឡើង Duarte ត្រូវបានគេប្រទះឃើញដេកលើស្មៅក្នុងសភាពឈឺចាប់។ ទោះជាយ៉ាងណា អាជ្ញាកណ្ដាលមិនបានឃើញហេតុការណ៍នេះឡើយ។

រហូតមកទល់ពេលនេះ មិនទាន់មានប្រតិកម្មពីអាជ្ញាធរលីគកំពូលអេស្ប៉ាញទាក់ទិននឹងហេតុការណ៍នេះនៅឡើយ។ Metro អះអាងថា វាអាចទៅរួច ដែលលីគមួយនេះ អាចចាត់វិធានការលើកីឡាករអ៊ុយរុយហ្គាយ។

Suarez បានស៊ុតចូលមួយគ្រាប់នៅនាទី ៧២ ជួយឲ្យក្លឹប Barcelona តាមស្មើជាមួយ Alves ក្រោយភ្លាត់មួយគ្រាប់មុននៅតង់ទីមួយ។ នៅនាទី ៨៤ ខ្សែប្រយុទ្ធ Lionel Messi បន្ថែមមួយគ្រាប់ទៀតតាមរយៈការស៊ុតបាល់ Free Kick ធ្វើឲ្យក្លឹបអ្នកមានបុណ្យសម្រេចក្នុងការវាយបកយកជ័យជំនះ៕

ប្រភព៖ Metro ប្រែសម្រួល៖ ហ៊ីម រស្មី