ទិដ្ឋភាព ព្រះសង្ឃ និងបរិស័ទធ្វើពិធីបូជាមាឃបូជាព្រឹកមិញ

2018-01-31 07:14:04
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកកាន់ព្រះពុទ្ធសាសនាទាំងព្រះសង្ឃ និងគ្រហស្ថបានរៀបចំពិធីបុណ្យមាឃបូជាគ្រប់វត្តទូទាំងព្រះរាជាណាចក្រកម្ពុជា។ ក្នុងនោះភ្នំព្រះរាជទ្រព្យដែលជាទូទៅស្គាល់ថា ភ្នំឧត្តុង្គជាកន្លែងប្រារព្ធពិធីបុណ្យធំជាងគេក្នុងប្រទេសកម្ពុជាដែលភាគច្រើនពុទ្ធបរិស័ទធ្វើដំណើរពីរាជធានីភ្នំពេញ ពុទ្ធបរិស័ទនៅនៅជុំវិញភ្នំឧត្តុង្គ និងព្រះសង្ឃពីអារាមនានាក៏បាននិមន្តទៅដែរ។

មាឃបូជាកាលពីព្រឹកមិញនៅសក្យមុនីចេតិយ៍នៃភ្នំព្រះរាជទ្រព្យមានការយាង និមន្តចូលរួមពីសម្តេចព្រះសង្ឃរាជទាំងពីរគណៈ មន្ត្រីសង្ឃគ្រប់ឋានានុក្រម និងមន្ត្រីរាជការ ព្រមទាំងពុទ្ធបរិស័ទយ៉ាងច្រើនកុះករ។ ពុទ្ធបរិស័ទបានបូជាផ្កាភ្ញី ទៀនធូកដើម្បីរំលឹកដល់ព្រះពុទ្ធបរមគ្រូ ព្រមទាំងវេរថ្វាយ ប្រគេនចង្ហាន់ បច្ច័យ និងទាយទានផ្សេងៗដល់ព្រះសង្ឃ និងរាប់បាតផងដែរ។

មាឃបូជាជាបុណ្យដ៏សំខាន់មួយក្នុងព្រះពុទ្ធសាសនាដែលផ្តោតលើព្រឹត្តិការណ៍សំខាន់៣។ ទី១ ការរំឭកនឹកដល់ព្រះសម្មាសម្ពុទ្ធបរមគ្រូទ្រង់ដាក់អាយុសង្ខារ។ ទី២ ថ្ងៃរំលឹកទៅដល់ពេលដែលព្រះពុទ្ធអង្គសម្ដែងឱវាទបាតិមោក្ខ និងទី៣ដើម្បីប្រារព្ធនូវការធ្វើចតុរង្គសន្និបាតប្រកបដោយអង្គបួនរបស់ព្រះសម្មាសម្ពុទ្ធបរមគ្រូ៕