មិនស្មានថា Facebook រកលុយបានច្រើនដល់ថ្នាក់នេះ ពីការផ្សាយពាណិជ្ជកម្ម

2018-02-01 03:02:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មុននេះបន្តិច Facebook បានបញ្ចេញរបាយការណ៍ហិរញ្ញវត្ថុប្រចាំឆ្នាំ ២០១៧ និងប្រចាំត្រីមាសទី ៤ ឆ្នាំ ២០១៧ ដែលចំណូលមានការកើនឡើងយ៉ាងច្រើន។

នៅរយៈពេល ៣ ខែចុងឆ្នាំ ២០១៧ Facebook អាចរកចំណូលបាន ១២,៧៧ ពាន់លានដុល្លារពីការផ្សាយពាណិជ្ជកម្ម និងរកបាន ១៩៣ លានដុល្លារពីសេវាកម្មផ្សេងទៀត។ សរុបចំណូលនៅត្រីមាសទី ៤ ឆ្នាំ ២០១៧ មានចំនួន ១២,៩៧ លានដុល្លារ មានការកើនឡើង ៤៧% បើធៀបនឹងពេលដូចគ្នាកាលពីឆ្នាំ ២០១៦។

ដោយឡែកចំណូលប្រចាំឆ្នាំ ២០១៧ មានចំនួន ៤០,៦៥ ពាន់លានដុល្លារ ដោយមាន ៣៩,៩៤ ពាន់លានដុល្លារជាចំណូលបានពីការផ្សាយពាណិជ្ជកម្ម។ ចំណូលប្រចាំឆ្នាំ ២០១៧ មានការកើនឡើង ៤៧% ធៀបនឹងឆ្នាំ ២០១៦ ដែលរកបាន ២៧,៦៣ ពាន់លានដុល្លារ។

បញ្ជាក់ថា Facebook បានបំបែក News Feed ជាផ្លូវការនៅសហរដ្ឋអាមេរិក និងនៅប្រទេសដទៃទៀតជាបន្តបន្ទាប់ ដោយការបំបែកនេះនឹងបង្ខំឲ្យ Page ជាច្រើនចាយលុយលើការផ្សាយពាណិជ្ជកម្មដើម្បីឲ្យ Post របស់ខ្លួន Reach ទៅកាន់មនុស្សកាន់តែច្រើន។ ចំណុចនេះអាចនឹងជួយឲ្យចំណូលបានពីការផ្សាយពាណិជ្ជកម្មរបស់បណ្ដាញសង្គមយក្សមានការកើនឡើងបន្តទៀតនៅឆ្នាំខាងមុខ។

គិតត្រឹមថ្ងៃទី ៣១ ខែធ្នូ ឆ្នាំ ២០១៧ ចំនួនអ្នកប្រើប្រាស់ Facebook សកម្មប្រចាំថ្ងៃមានជាមធ្យម ១,៤ ពាន់លាននាក់ កើនឡើង ១៤% ធៀបនឹងឆ្នាំ ២០១៦។ ចំណែកចំនួនអ្នកប្រើប្រាស់សកម្មប្រចាំខែមាន ២,១៣ ពាន់លាននាក់ កើនឡើង ១៤% ធៀបនឹងឆ្នាំ ២០១៦៕

ប្រភព៖ investor.fb ប្រែសម្រួល៖ សុខហេង