ទើបចេញលក់ ២ ខែ សោះ អ្នកគាំទ្រនិយាយដើម iPhone X ឡើងហុយ

2018-02-05 08:23:01
ចំនួនមតិ 0 | ចំនួនចែករំលែក 0

ចន្លោះមិនឃើញ

យើងបានដឹងហើយថា iPhone X គឺជាកំពូលស្មាតហ្វូនមួយរបស់ក្រុមហ៊ុន Apple ដែលផលិតឡើងគម្រប់ខួប១០ឆ្នាំរបស់ផលិតផល iPhone ។ វាគឺជាស្មាតហ្វូនដែលអ្នកគ្រប់គ្នាតែងតែប្រាថ្នាចង់បានបើទោះជាវាមានតម្លៃថ្លៃក៏ដោយ។

ក្រោយពេលចេញលក់និងបានដល់ដៃអ្នកប្រើប្រាស់មានមតិមួយចំនួនបាននិយាយពីគុណសម្បត្តិ និងគុណវិបត្តិរបស់វាក្រោយពេលប្រើប្រាស់បានមួយរយះមក។

ខាងក្រោមនេះជាមតិអ្នកប្រើប្រាស់ដែល Sabay បានធ្វើការសាក់សួរកន្លងមក៖

លោក លីន ជាបុគ្គលិកបម្រើការងារនៅក្រុមហ៊ុនឯកជនមួយដែលកំពុងកាន់ទូរសព្ទ iPhone X ចុចបានប្រាប់ថាលោកបានទិញ ទូរសព្ទនេះតាំងពីពេលចេញដំបូងមក " កាល់ពីចាប់ផ្ដើមប្រើដំបូងខ្ញុំមានអារម្មណ៍ថាប្លែក ពិបាកប្រើជាងទូរសព្ទមុន បើនិយាយពីចំណុចទាំងនោះមានខ្លះៗដែរត្រង់វិធីដោះសោស្កេនមុខត្រូវយកដៃគ្រវាសលើអេក្រង់ ហើយវាមិនបាន Lock Screen វិញដោយខ្លួនឯងទេដោយយើងត្រូវចុចប៊ូតុង Lock Screen ទើបវាចាក់សោ។

លោកបន្តថាដូចជា Control,Notification, Serch រកកម្មវិធិ ត្រូវប្ដូរទៅទីតាំងផ្សេងដែលធ្វើឲ្យយើងប្លែកអារម្មណ៍បន្តិច និង Bluetooth បើកអូតូនៅថ្ងៃបន្ទាប់បើទោះជាយើងបានបិតវាក៏ដោយ និងរូបរាងដែលស្រោបតួប្រភេទកញ្ចក់ដែលងាយឆ្កូតនិងបែកពេលប៉ះធ្វើមួយ ពេលដោនកម្មវិធីចេញពី App ត្រូវចុចពីដងនៅត្រង់ប៊ូតុង Lock ហើយស្កេនមុខបន្ថែមទៀត មានអារម្មណ៍ថាធុញ"។

លោកបន្ថែមថាក្រៅបីនេះមិនមានអ្វីពិបាកច្រើនទេ ហើយលោកក៏ពេញចិត្តនិងរូបរាងតូចល្មមងាយស្រួលកាន់ មានអេក្រង់ពេញល្អ ច្បាស់ សលេងលឺល្អ និងងាយស្រួលសាកថ្មដោយមិនចាំបាច់ប្រើខ្សែ។

ចំណែក កញ្ញា ស្រីនិច ដែលធ្លាប់បានប្រើទូរសព្ទនេះដែរបានប្រាប់ថា កញ្ញាមានអារម្មណ៍ថាធុញនៅពេលដែលកំពុងមើលវិឌីអូ ហើយច្រឡំដៃចុច Lock Screen ត្រូវដាក់ទូរសព្ទស្កេនមុខម្ដងទៀត មិនដូចពេលប្រើក្រយៅដៃស្កេនដូចស៊េរីមុនៗ បើទោះជាមានអេក្រង់ពេញក៏ដោយតែនៅមានគែមខ្មៅនៅខាងលើដែលតែងមានអារម្មណ៍ថារំខាននៅពេលមើលវិឌីអូម្ដងៗ និងពិបាកកាន់បន្តិចដោយតួខ្លួនរបស់វាស្រោបទៅដោយកញ្ចក់រអិលងាយធ្លាក់បែកដោយចាំបាច់ត្រូវដាក់ស្រោមការពារជាប្រចាំ។

នៅពេលចង់លុបកម្មវិធីដែលយើងបានបើកប្រើហើយម្ដងត្រូវចុចឲ្យជាប់ទើបចុចសញ្ញាដក ឬគ្រវាសចេញ មិនដូចស៊េរីមុនៗគ្រាន់តែប៊ូតុងហូម២ដងឆូតចេញជាការស្រេច។

ងាកមកហាងលក់ទូរសព្ទ 3Plus និង អាន់ឆែ បានប្រាប់ថាតាំងពីពេលដែលអ្នកទិញទូរសព្ទ iPhone X ប្រើមានអតិថិជនរអ៊ូរឿងស្កេនមុខពេលដោះសោពេលខ្លះគ្រាន់តែចង់មើលម៉ោងក៏ទូរសព្ទ នេះដោះសោដោយខ្លួនឯង។ មួយទៀតនៅពេលដែលបើក Camera ថតរូបម្ដងរៀងគាំងបន្តិចតែវានិងដំណើរការវិញនៅពេលបិតហើយបើកវាម្ដងទៀត។ ក្រៅពីនេះមិនដែលមានអតិថិជនណាប្រាប់ថាមានបញ្ហាអ្វីផ្សេងឡើយ។

សរុបមកតាមការសាក់សួរខាងលើឃើញមានអ្នកប្រើប្រាស់មិនមានអ្វីជាបញ្ហាលើទូរសព្ទ iPhone X នេះច្រើនឡើយ គ្រាន់តែពុំសូវស្ទាត់ជំនាញនៅពេលប្រើប្រាស់ដំបូង។ ដោយ iPhone X គឺជាទូរសព្ទដែលរចនាឡើងមានភាពខុសប្លែកពីស៊េរីមុនៗច្រើនដូចនេះធ្វើឲ្យអ្នកប្រើប្រាស់ត្រូវការពេលយូរដើម្បីប្រើវាឲ្យស្ទាត់ជំនាញ។