ស្ត្រីមានបំផុតនៅចិន រកបានខ្ទង់ពាន់លានដុល្លារត្រឹមរយៈពេល ៤ថ្ងៃ

2018-02-06 04:11:47
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកស្រី Yang Huiyan អនុប្រធានក្រុមហ៊ុន Country Garden ដែលជាក្រុមហ៊ុនអភិវឌ្ឍន៍អចលនទ្រព្យធំបំផុតក្នុងប្រទេសចិន គឺជាស្ត្រីមានបំផុតក្នុងប្រទេស បន្ទាប់ពីបុរសមានបំផុតឈ្មោះ Wang Jianlin នាពេលបច្ចុប្បន្ន។

គិតត្រឹមថ្ងៃទី ៥ ខែមករា ទ្រព្យសម្បត្តិរបស់អ្នកស្រី Yang បានកើនដល់ ២៥,៦ ពាន់លានដុល្លារ បន្ទាប់មានពីការកើនឡើងភាគហ៊ុនយ៉ាងគំហុក។ អ្នកស្រី រកប្រាក់ចំណូលបានសរុប ២,១ ពាន់លានដុល្លារ ក្នុងរយៈពេលត្រឹម ៤ ថ្ងៃដំបូងប៉ុណ្ណោះនៃឆ្នាំថ្មីនេះ។

យោងតាមទស្សនាវដ្តី Forbes ឲ្យដឹងថា អ្នកស្រី ក៏ជាប្រធាននៃក្រុមហ៊ុន Bright Scholar Education ដែលជាប្រតិបត្តិករធំបំផុតនៃសាលារៀន K-12 ក្នុងប្រទេសចិនផងដែរ។ ក្រុមហ៊ុននេះ មានភាគហ៊ុនរហូតទៅដល់ ២០០ លានដុល្លារនៅក្នុងផ្សារភាគហ៊ុន New York Stock Exchange កាលពីឆ្នាំមុន។

គួរឲ្យដឹងថា ឪពុករបស់អ្នកស្រី Yang គឺលោក Yang Guoqiang ជាសហស្ថាបនិកនៃក្រុមហ៊ុនអភិវឌ្ឍន៍អចលនទ្រព្យ Country Garden កាលពីឆ្នាំ ១៩៩២។ លោកបានផ្ទេរភាគហ៊ុនមកឲ្យអ្នកស្រី កាលពីឆ្នាំ ២០០៥ ហើយមកទល់បច្ចុប្បន្ននេះ អ្នកស្រី Yang គ្រប់គ្រងភាគហ៊ុនរបស់ក្រុមហ៊ុនសរុប ៥៧%៕